”ஆபத்து முஸ்லீம்களுக்கு மட்டுமல்ல, அனைவருக்கும்தான்” – ரவிக்குமார்

( 16.12.2019 அன்று காலை 10 மணியளவில் புதுச்சேரியில் விடுதலைச் சிறுத்தைகள் கட்சி,சிபிஐ,சிபிஐ எம், சிபிஐ எம்எல்,மனிதநேய மக்கள் கட்சி ஆகியவற்றின் சார்பில் குடியுரிமைத் திருத்தச் சட்டத்தை எதிர்த்து ஒருங்கிணைக்கப்பட்ட ஆர்ப்பாட்டத்தில் ரவிக்குமார் M.P ஆற்றிய உரை)

*

தோழர்களே!

மத்தியில் ஆளும் பாஜக அரசு கொண்டுவந்துள்ள குடியுரிமைத் திருத்தச் சட்டத்துக்கு எதிராக நாடு முழுவதும் மக்கள் போராட்டங்கள் வெடித்துள்ள நிலையில் அந்தப் போராட்டத்துக்கு நம்முடைய ஆதரவைத் தெரிவிக்கும் விதமாகவும், குடியுரிமைத் திருத்தச் சட்டத்துக்கு எதிர்ப்பு தெரிவிக்கும் வகையிலும் விடுதலைச் சிறுத்தைகள் கட்சி,இடதுசாரிக் கட்சிகள், மனிதநேய மக்கள் கட்சி ஆகியவற்றின் சார்பில் ஏற்பாடு செய்யப்பட்டிருக்கும் இந்த ஆர்ப்பாட்டத்தில் பங்கேற்றிருக்கும் அனைவருக்கும் எனது வணக்கத்தைத் தெரிவித்துக்கொள்கிறேன்.

நேற்று இரவு முழுவதும் டெல்லியில் மாணவர்கள்மீது போலீஸ் நடத்திய மிருகத்தனமான காட்சிகள் சமூக வலைத் தளங்களில் பரவியதைப் பார்த்திருப்பீர்கள்.நிராயுதபாணியாக நூலகத்தில், கழிவறையில் இருந்த மாணவர்கள்மீது மிகக் கொடூரமாகக் காவல்துறை தாக்குதல் நடத்தியது. போலீஸ்காரர்கள் மட்டுமின்றி ஜீன்ஸ் பேண்ட்டும் டி ஷர்ட்டும் போட்டுக்கொண்டு முகத்தை மறைத்துக்கொண்டிருந்த ஒருவன் மாணவிகளைக் கட்டையால் அடிக்கும் புகைப்படம் நெஞ்சைப் பதற வைத்தது. பேருந்து ஒன்றின்மீது போலீஸ்காரர் ஒருவர் கேனில் எடுத்துச்சென்று எதையோ ஊற்றுகிற வீடியோவைப் பார்க்க முடிந்தது. படுகாயமடைந்த மாணவர்களைக் கைது செய்து அவர்களுக்கு சிகிச்சைகூட அளிக்காமல் போலிஸ் லாக் அப்பில் அடைத்து வைத்திருக்கிறார்கள் என்ற செய்தி வெளியானதும் மாணவர்கள் அந்த போலிஸ் ஸ்டேஷனை முற்றுகையிட்டார்கள். அப்போது அங்கே வந்து தனது ஆதரவைத் தெரிவித்த முதல் அரசியல் தலைவர் இந்திய கம்யூனிஸ்ட் கட்சியின் பொதுச்செயலாளர் டி.ராஜா அவர்கள்தான். அவர் அங்கு மாணவர்களுக்குப் பாதுகாப்பாக, ஆதரவாக வந்து நின்றதற்குப் பிறகுதான் தோழர் பிருந்தா காரட் உள்ளிட்ட பிற அரசியல் தலைவர்கள் அங்கு வந்தார்கள். இரவு முழுவதும் இடைவிடாமல் நடந்த போராட்டத்துக்குப் பிறகு சில மாணவர்கள் விடுவிக்கப்பட்டாலும் பலபேர் இன்னும் லாக் அப்பில் அடைத்து வைக்கப்பட்டிருக்கிறார்கள். ஆனாலும் கொஞ்சமும் அஞ்சாமல் இன்றும் மாணவர் போராட்டம் தொடர்கிறது.

இப்போது நாடு முழுவதும் மாணவர்கள் தன்னெழுச்சியாகப் போராடுகிறார்கள். ஆனால் அவர்கள் மீது நடத்தப்படுகிற தாக்குதல் திட்டமிட்டு நடத்தப்படுகிற ஒன்றாக இருக்கிறது.பாஜக இப்போது மிகப் பெரும் எண்ணிக்கை பலத்தோடு வெற்றி பெற்றுள்ளது, அதனால் அது அடக்குமுறையை ஏவுகிறது என்று நாம் எண்ணிவிடக் கூடாது. இந்த குடியுரிமைத் திருத்தச் சட்டம் 2016 ஆம் ஆண்டிலேயே, பாஜகவின் கடந்த ஆட்சியின் போதே கொண்டு வரப்பட்ட ஒன்றாகும். இது 2016ஆம் ஆண்டு மக்களவையில் அறிமுகம் செய்யப்பட்டது. அறிமுக நிலையிலேயே எதிர்ப்பு எழுந்ததால் அது பாராளுமன்ற கூட்டுக் குழுவிற்கு அனுப்பப்பட்டது. அதற்கு முன்பாகவே இந்த சட்டத்தில் உள்ள அம்சங்களை அவர்கள் உள்துறை அமைச்சகத்தின் குறிப்பாணைகள் மூலமாக நடைமுறைக்குக் கொண்டு வந்துவிட்டார்கள்.

2015 ஆம் ஆண்டில் உள்துறை அமைச்சகம் வெளியிட்ட குறிப்பாணை மூலமாக குடியுரிமைத் திருத்தச் சட்டத்தில் இப்போது கொண்டு வந்துள்ள திருத்தங்களை ஏற்கனவே நடைமுறைக்குக் கொண்டு வந்துவிட்டார்கள். 2015ஆம் ஆண்டில் அயல்நாட்டவர் சட்டத்தில் முதலில் திருத்தம் கொண்டுவரப்பட்டது. 2016 ஆம் ஆண்டில் பாஸ்போர்ட் சட்டத்தில் திருத்தம் கொண்டுவரப்பட்டது. முதல் திருத்தத்தின் மூலம் பாகிஸ்தான், பங்களாதேஷ் ஆகிய இரண்டு நாடுகளைச் சேர்ந்த இந்துக்கள், சீக்கியர்கள் சமணர்கள், பௌத்தர்கள், பார்சிக்கள், கிறித்தவர்கள் ஆகியோர் சட்ட விரோதமாக இங்குவந்து குடியேறி இருந்தால் அவர்களுக்கு விலக்கு அளிக்கப்பட்டது. 2016 ஆம் ஆண்டில் வெளியிடப்பட்ட குறிப்பாணையில் பாகிஸ்தான் பங்களாதேஷ் ஆகிய நாடுகளோடு ஆப்கானிஸ்தானும் அந்தப் பட்டியலில் சேர்க்கப்பட்டது.

இந்த மசோதா முதலில் 2016ஆம் ஆண்டு பாராளுமன்ற கூட்டுக் குழுவுக்கு அனுப்பப்பட்டது. பாராளுமன்ற கூட்டுக்குழு தன்னுடைய அறிக்கையை 2019 ஜனவரி மாதத்தில் அரசிடம் அளித்தது. அதனால் ஆட்சிக்காலம் முடிவதற்கு முன்பாக அவசரஅவசரமாக மீண்டும் மக்களவையில் இந்த மசோதாவை தாக்கல் செய்தார்கள். மக்களவையில் அவர்களுக்கு எண்ணிக்கை பலம் இருந்ததால் அங்கே அது நிறைவேற்றப்பட்டது.ஆனால் மாநிலங்களவையில் அவர்களுக்குப் போதுமான பலம் இல்லாத காரணத்தால் அங்கு நிறைவேற்ற முடியாமல் போய் விட்டது. அத்துடன் அந்த ஆட்சியும் முடிந்துபோனது. தேர்தல் வந்துவிட்டது. எனவே மக்களவையில் நிறைவேற்றப்பட்ட அந்த மசோதா காலாவதி ஆகிவிட்டது.

இப்போது பொதுத் தேர்தல் முடிந்து முன்பைவிட அதிக பலத்தோடு பாஜகவினர் வெற்றிபெற்ற காரணத்தினாலே முதல் கூட்டத் தொடரிலேயே இந்த மசோதாவை அறிமுகப்படுத்துவதற்கு முயற்சித்தார்கள். ஆனால் முடியவில்லை. எனவே இப்போது குளிர்காலக் கூட்டத் தொடரிலே இது அறிமுகம் செய்யப்பட்டது. அதுவும் அவசரஅவசரமாக அறிமுகம் செய்யப்பட்டு, விவாதத்துக்கு எடுத்துக் கொள்ளப்பட்ட நாளிலேயே நள்ளிரவு 12 மணிக்கு இந்த சட்டம் மக்களவையில் நிறைவேறியது. அதற்குப்பிறகு மாநிலங்களவைக்கு அந்த மசோதா சென்றது. மாநிலங்களவையில் இப்போதும் அவர்களுக்குப் பெரும்பான்மை கிடையாது. எனவே மாநிலங்களவையில் இந்த மசோதா தோற்கடிக்கப்படலாம் என்கிற எதிர்பார்ப்பு சிலரிடம் இருந்தது. ஆனால் அந்த நம்பிக்கையைப் பொய்த்துப் போகச் செய்தது தமிழகம்தான்.

ஜனநாயக சக்திகளும் இத்தகைய நம்பிக்கையோடிருந்தார்கள். அவர்களுடைய நம்பிக்கையில் மண்ணை அள்ளிப் போடும் விதமாக இந்த மசோதா மாநிலங்களவையில் நிறைவேற்றப்படுவதற்குத் தமிழகம்தான் காரணமாகி இருக்கிறது. இது வரலாற்றில் துடைக்க முடியாத பழியாக, கறையாகத் தமிழ்நாட்டின் மீது படிந்திருக்கிறது. மாநிலங்களவையில் இடம் பெற்றுள்ள அதிமுகவினுடைய 11 உறுப்பினர்கள், பாட்டாளி மக்கள் கட்சியின் ஒரு உறுப்பினர்- இந்த 12 உறுப்பினர்கள் வாக்களித்ததன் காரணமாகத்தான் மாநிலங்களவையில் இந்த மசோதா நிறைவேறி இருக்கிறது. இன்று நாடு முழுவதும் கொந்தளிப்பும், போராட்டமும் ஏற்பட்டிருக்கிறதென்றால் அதற்குக் காரணம் அதிமுகவும் பாமகவும் தான். இதை நாம் பேசாவிட்டாலும், பேசாமல் புறக்கணித்தாலும் இன்று இந்தியா முழுவதும் இந்த துரோகத்தை சுட்டிக்காட்டி கண்டனம் தெரிவித்துக்கொண்டிருக்கிறார்கள்.

இன்று ஆட்சியிலே இருக்கின்ற பாஜகவினர் மத அடிப்படையில் முஸ்லிம்களையும், இன அடிப்படையில் தமிழர்களையும் இந்த நாட்டுக்கு எதிரானவர்கள், அந்நியமானவர்கள் என்பதைப் போல சித்திரிக்க பார்க்கிறார்கள். இந்தியாவுக்கு அண்டை நாடுகளாக இருக்கிற நாடுகளில் ஒரு குறிப்பிட்ட மதத்தை அரச மதமாக அறிவித்துக் கொண்ட நாடுகள், அவற்றிலே இருக்கிற சிறுபான்மையினர் பாதிக்கப்படுகிறார்கள், அவர்கள் இங்கே தஞ்சம் புகுந்திருக்கிறார்கள், அவர்களுக்குக் குடியுரிமை வழங்குகிறோம் என்று இந்த சட்டத்துக்கு விளக்கம் சொல்லி இருக்கிறார்கள்.

இந்தியாவிலே இன்னும் பல நாடுகளைச் சேர்ந்த அகதிகள் இருக்கிறார்கள். அரசியல் தஞ்சம் தேடி வந்தவர்கள் ஏராளமாக இங்கே இருக்கிறார்கள். இந்தியாவில் மட்டுமல்ல, உலகில் எந்த நாட்டை எடுத்துக் கொண்டாலும் அந்த நாட்டில் அந்த நாட்டுக் குடி மக்களும் இருக்கிறார்கள், அங்கு புகலிடம் தேடிவந்த அகதிகளும் இருக்கிறார்கள்.அகதிகள் இல்லாத நாடே இந்த உலகத்திலே இல்லை. இந்த நிலை இப்போது ஏற்பட்டதல்ல, 50ஆண்டுகளுக்கு முன்பாகவே 60 ஆண்டுகளுக்கு முன்பாகவே ஏற்பட்டுவிட்டது.

இரண்டாம் உலகப் போருக்குப் பிறகு உலகின் பல்வேறு நாடுகளில் புகலிடம் தேடி ஆயிரக்கணக்கில், லட்சக்கணக்கில் மக்கள் ஓடினார்கள். ஐநா பொது மன்றம் இதற்காக முதலில் 1951 ஆம் ஆண்டில் ரெஃப்யூஜிஸ் கன்வென்ஷன் என்று ஒரு ஒப்பந்தத்தை நிறைவேற்றியது. அகதிகளுக்கான உரிமைகளையும் அவர்கள் தஞ்சம் புகும் நாட்டின் கடமைகளையும் அது வரையறுத்தது. தஞ்சம் புக வருபவர்களையும் ஒரு நாடு தனது குடிமக்களைப் போலக் கருதிப் பாதுகாக்க வேண்டும் என்று அந்த ஒப்பந்தத்தில் கூறப்பட்டது. அதற்குப் பிறகு 1967 ஆம் ஆண்டில் அகதிகளுக்காக ப்ரொட்டகால் ரிலேட்டிங் டு த ஸ்டேட்டஸ் ஆஃப் ரெஃப்யூஜிஸ் என்று இன்னொரு ஒப்பந்தம் ஏற்படுத்தப்பட்டது. அகதி என்பதற்கான விளக்கத்தை விரிவுபடுத்தியதோடு அவர்களுக்கான உரிமைகள் எவ்வாறு வழங்கப்பட வேண்டும், அவர்களுக்கான பாதுகாப்புகளை எப்படி ஒவ்வொரு அரசும் செய்ய வேண்டும் என்று ஐநா அந்த ஒப்பந்தத்தில் நெறிமுறைகளை உருவாக்கியது. இதுவரை அகதிகளுக்காக இப்படி இரண்டு ஒப்பந்தங்கள் ஐநா மன்றத்தால் ஏற்படுத்தப்பட்டிருக்கின்றன. அதில் உலகின் 145 நாடுகள் கையெழுத்திட்டுள்ளன. ஆனால் அந்த இரண்டு ஒப்பந்தங்களையும் மதிக்காத, அவற்றில் கையெழுத்திடாத நாடு இந்தியா. அது காங்கிரஸ் அரசாக இருந்தாலும் சரி, பாரதிய ஜனதா கட்சி ஆட்சியாக இருந்தாலும் சரி, ஐக்கிய முன்னணி ஆட்சியாக இருந்தாலும் சரி, ஜனதா ஆட்சியாக இருந்தாலும் சரி எந்த ஆட்சியானாலும் அகதிகள் பிரச்சினையில் இந்திய அரசுக்கு ஒரே நிலைப்பாடு தான். ’அகதிகளுக்கு எந்தப் பாதுகாப்பையும் கொடுக்க மாட்டோம், அவர்களை நாங்கள் சமமாக நடத்த மாட்டோம், அவர்களை சட்டவிரோதமாகக் குடியேறியவர்கள் என்றுதான் அழைப்போம்’ என்பதுதான் மத்திய அரசின் நிலைப்பாடு. இதில் பாஜகவுக்கும் எந்த வித்தியாசமான நிலைப்பாடும் கிடையாது.

அகதிகளுக்காக ஏற்படுத்தப்பட்ட ஒப்பந்தங்களில் கையெழுத்திடாத அரசு, சர்வதேச அளவில் அகதிகளுக்காக ஏற்படுத்தப்பட்டிருக்கும் பாதுகாப்புகளை மதிக்காத அரசு திடீரென்று அகதிகள் மீது எங்களுக்குப் பரிவு வந்துவிட்டது என்று சொன்னால், அவர்களுக்கு நாங்கள் குடியுரிமை கொடுக்கிறோம் என்று சொன்னால் அது ஏன் என்று நாம் சிந்திக்க வேண்டும். அதற்காக சட்டத்திருத்தத்தை ஏற்படுத்துகிற நேரத்தில் மனித உரிமை மீது அக்கறை கொண்டவர்கள் என்கிற முறையிலே அது நல்ல நோக்கத்தோடு இருந்தால் நாம் வரவேற்றிருப்போம். அகதிகளுக்கு இந்த நாட்டிலுள்ள குடிமக்களைப்போலவே உரிமைகள் வழங்கப்பட்டால் அது சரியானதுதான் என்று கூறியிருப்போம். ஏனென்றால் ஈழத் தமிழ் அகதிகளுக்குக் குடியுரிமை வழங்கப்பட வேண்டும் என்று நாம் நீண்டநாட்களாகக் கேட்டுக் கொண்டிருக்கிறோம்.

தமிழ்நாட்டில் இருக்கின்ற ஒரு லட்சத்துக்கும் மேற்பட்ட ஈழத் தமிழ்அகதிகள் பல்வேறு முகாம்களில் தங்க வைக்கப்பட்டிருக்கிறார்கள். 1983 ஆம் ஆண்டு நடைபெற்ற கலவரத்தால் இங்கே வந்தவர்கள்; ஆயுதப் போராட்டம் நடந்த நேரத்தில் வந்தவர்கள்;முள்ளிவாய்க்கால் இனப்படுகொலை நடந்தபோது தப்பித்து வந்தவர்கள் – இப்படி இங்கே வந்த ஈழத் தமிழர்கள் முகாம்கள் என்ற பெயரில் எந்தவித வசதியுமில்லாத இடங்களில் தங்க வைக்கப்பட்டிருக்கிறார்கள். அவர்களில் 30 ஆண்டுகளுக்கும் மேலாக இந்த மண்ணிலே இருக்கிறவர்கள் உள்ளனர்; இங்கே வந்ததற்குப் பிறகு பிறந்த குழந்தைகள் பெரியவர்களாக ஆகி விட்டார்கள். நீண்ட நெடுங்காலமாக இங்கே அவர்கள் அகதிகளாக வாழ்ந்து கொண்டு இருக்கிறார்கள். அவர்களுக்குக் குடியுரிமை அளிக்கப்பட வேண்டும் என்று சொல்லி பல்வேறு தீர்மானங்களைத் தமிழ் நாட்டிலே இருக்கிற அரசியல் கட்சிகள் நிறைவேற்றி இருக்கின்றன. ஈழத் தமிழர்களுடைய உரிமைகளுக்காக உருவாக்கப்பட்ட ’டெசோ’ அமைப்பின் மாநாட்டில் முன்னாள் முதல்வரும் திமுக தலைவருமான கலைஞர் தலைமையில் நிறைவேற்றப்பட்ட தீர்மானத்தில் ஈழத் தமிழ் அகதிகள் அனைவருக்கும் குடியுரிமை வழங்கப்பட வேண்டும், அதற்கான நடவடிக்கையை மத்திய அரசு எடுக்க வேண்டும் என்று வலியுறுத்தப்பட்டது. ஆனால் எந்த நடவடிக்கையையும் மத்திய அரசு எடுக்கவில்லை.

இந்த ஈழத்தமிழ் அகதிகள் சட்டவிரோதக் குடியேறிகள் என்றுதான் சித்திரிக்கப்படுகிறார்கள். இந்த மசோதா அறிமுகப்படுத்தப்படுவதற்கு முன்பாக நான் மக்களவையில் ஒரு கேள்வியை எழுப்பினேன். ”30 ஆண்டுகளுக்கும் மேலாக தமிழ் நாட்டிலே அகதிகளாக இருக்கின்ற ஈழத் தமிழர்களுக்கு நிரந்தரக் குடியுரிமை கொடுக்கப்படுமா?”என்ற வினாவை நான் எழுப்பினேன். இந்த மசோதா அறிமுகப்படுத்தப்படுவதற்கு முன்பாக அதற்கு எழுத்துப்பூர்வமான பதில் எனக்கு மக்களவையில் அளிக்கப்பட்டது. இந்திய குடியுரிமை என்பது இந்தியக் குடியுரிமைச் சட்டம் 1955 மற்ரும் குடியுரிமை விதிகள் 2009 இன் அடிப்படையில் வழங்கப்படுகின்றது. அந்த சட்டத்தின் பிரிவு 5இன் படி பதிவுசெய்துகொண்ட அயல்நாட்டவர் எவரும் இந்திய குடியுரிமையைப் பெற முடியும்.,அந்த சட்டத்தின் பிரிவு 6 இன் படி இயல்புரிமை அடிப்படையில் குடியுரிமை பெற முடியும்.ஆனால் சட்டவிரோதமான குடியேறிகள் இந்த இரண்டு விதங்களிலும் குடியுரிமையைப் பெற முடியாது” என அந்தப் பதிலில் உள்துறை இணை அமைச்சர் தெரிவித்திருந்தார்.

பாகிஸ்தானிலிருந்து வந்தவர்களாக இருந்தாலும் சரி, வங்கதேசத்திலிருந்து வந்தவர்களாக இருந்தாலும் சரி அவர்கள் எல்லோருமே பாஸ்போர்ட் எடுத்துக் கொண்டு வந்தவர்களில்லை. இந்தியாவுக்குள் வந்துள்ள அகதிகள் எல்லோருமே இந்த நாட்டின் சட்டப்படி ‘சட்டவிரோதக் குடியேறிகள்’தான். ஈழத்தமிழர்களுக்கு மட்டுமல்ல எல்லோருக்குமே இது பொருந்தும். ஈழத் தமிழர்கள் எப்படி இங்கே வந்தார்களோ அப்படித்தான் பாகிஸ்தானிலிருந்தும் மியான்மரிலிருந்தும் இங்கே வந்திருக்கிறார்கள். ஆனால் இந்த அரசு என்ன சொல்கிறதென்றால் அப்படி வந்தவர்களில் இந்துக்கள் சீக்கியர்கள், பார்சிக்கள், கிறித்தவர்கள்,சமணர்கள், பௌத்தர்கள் இவர்களுக்கு மட்டும் தான் நாங்கள் குடியுரிமைக் கொடுப்போம் என்று சொல்கிறது. குடியுரிமைப் பெறுவதிலிருந்து முஸ்லிம்களை விலக்கி வைக்கிறார்கள். நம்முடைய அரசியலமைப்புச் சட்டம் ஒருவர் இந்தியராக இருந்தாலும் சரி, அயல்நாட்டவராக இருந்தாலும் சரி அவர்களை சமமாக நடத்த வேண்டும் என்று தான் கூறுகிறது. நம்முடைய அரசியலமைப்புச் சட்டத்தின் உறுப்பு 14 எல்லோரையும் சமத்துவத்தோடு நடத்தவேண்டும் என வலியுறுத்துகிறது.இந்த சட்டம் அந்த சமத்துவக் கோட்பாட்டுக்கு எதிராக இருக்கிறது.

நமது அரசியலமைப்புச் சட்டத்தின் ஆதாரமான அடிப்படை அம்சங்கள் எவை என்று உச்சநீதிமன்றம் ஆராய்ந்து ஒரு தீர்ப்பை வழங்கியிருக்கிறது. அடிப்படை உரிமைகள் அரசியலமைப்புச் சட்டத்தின் அடிப்படை அம்சங்களில் ஒன்று. அது போலவே சமத்துவம் என்பது அரசியலமைப்புச் சட்டத்தின் அடிப்படை அம்சம் என்று உறுதி செய்யப்பட்டிருக்கிறது. இந்த அடிப்படை அம்சங்களில் எந்த மாற்றங்களையும் திருத்தங்களையும் செய்யக் கூடாது என்று உச்சநீதிமன்றம் உறுதியாகக் கூறியிருக்கிறது. நீங்கள் எத்தனை சட்டத்திருத்தத்தை வேண்டுமானாலும் கொண்டு வரலாம். அண்மையில்கூட 126 ஆவது சட்டத் திருத்தம் நாடாளுமன்றத்தில் நிறைவேற்றப்பட்டது. ஆனால் அரசியலமைப்புச் சட்டத்தின் அடிப்படை அம்சங்களைத் திருத்த முடியாது என்பதுதான் உச்ச நீதிமன்றம் அளித்த தீர்ப்பு. ஆனால் அரசியலமைப்புச் சட்டத்தின் அடிப்படை அம்சங்களில் ஒன்றாக இருக்கிற சமத்துவம் என்ற கோட்பாட்டை கெடுக்கும் விதமாக இந்த குடியுரிமை திருத்தச் சட்டம் கொண்டு வரப்பட்டிருக்கிறது.

பாகிஸ்தான்,வங்கதேசம்,ஆப்கானிஸ்தான் ஆகிய இந்த மூன்று நாடுகளில் முஸ்லிம்கள் பெரும்பான்மையாக இருக்கிறார்கள், அங்கே பாதிக்கப்படுவது அங்குள்ள சிறுபான்மை மதங்களைச் சேர்ந்தவர்கள்தான். எனவேதான் நாங்கள் முஸ்லிம்களை உள்ளடக்கவில்லையென்று சொல்கிறார்கள். ஆனால் உண்மை என்னவெனில் பாகிஸ்தானில் அகமதியா முஸ்லிம்கள் என்று ஒரு பிரிவினர் இருக்கிறார்கள். அவர்களை முஸ்லிம்களாகவே அங்கே கருதுவதில்லை அவர்களும் அந்த நாட்டில் ஒடுக்கப்படுகிறார்கள். அவர்களும் இங்கே தஞ்சம் தேடி வந்திருக்கிறார்கள் . வங்கதேசத்தில் இறைமறுப்பாளர்கள், பகுத்தறிவுக் கொள்கையைப் பின்பற்றி வருபவர்கள் எல்லாம் கொலை செய்யப்படுகிறார்கள். அத்தகைய கொள்கை கொண்டவர்களும் இங்கே தஞ்சம் தேடி வந்திருக்கிறார்கள். அவர்கள் முஸ்லிம்கள் என்றாலும் அவர்களும் அந்த அரசுகளால் பாதிக்கப்பட்டவர்கள்தான். அப்படி வந்தவர்களுக்கு இங்கே குடியுரிமை கொடுக்கப்பட வேண்டும். ஆனால் அவர்களுக்கு கொடுக்க முடியாது என்று இந்த அரசாங்கம் மறுக்கிறது. அதுபோலவே இன அடிப்படையில் தமிழர்களை ஒதுக்கி விட்டிருக்கிறார்கள். அண்டை நாடுகளைத் தான் நாங்கள் இந்த சட்டத்திலே சேர்த்து இருக்கிறோம் என்று சொன்னால் இலங்கையும் அண்டை நாடுதான்.அரச மதமாக ஒரு மதத்தை அறிவித்துக்கொண்ட நாடுகளைத்தான் நாங்கள் சேர்த்திருக்கிறோம் என்றால் இலங்கையிலும் அரச மதம் என்று ஒன்று இருக்கிறது. அரச மதமாக பௌத்தம் அங்கே அறிவிக்கப்பட்டிருக்கிறது. தமிழர்களுக்கு குடியுரிமை வழங்க கூடாது என்பதற்காகத்தான் இலங்கை இந்தப் பட்டியலில் சேர்க்கப்படாமல் விடப்பட்டுள்ளது. மத அடிப்படையில் முஸ்லிம்களையும் இன அடிப்படையில் தமிழர்களையும் இந்த நாட்டில் அந்நியர்களாக சித்திரித்து இந்த சட்டம் இயற்றப்பட்டிருக்கிறது.

இன்று முஸ்லிம்கள் அதிகமாக இருக்கின்ற மாநிலங்கள் எல்லாவற்றிலும் இந்த சட்டத்தை எதிர்த்துப் போராட்டங்கள் நடைபெற்றுக்கொண்டிருக்கின்றன. நேற்றிரவு கேரளாவில் மிகப் பெரிய பேரணி நடைபெற்றது. ஆனால் தமிழகத்தில் ஒரு லட்சத்துக்கும் மேற்பட்ட ஈழத் தமிழர்கள் பாதிக்கப்பட்டிருக்கிறார்கள் என்றாலும்கூட பெரிய அளவில் போராட்டம் எழவில்லை. இந்த சட்டத்தின் காரணமாக இங்கிருக்கிற ஈழத் தமிழர்கள் எல்லாம் ஒன்று இந்த நாட்டை விட்டுப் பலவந்தமாக வெளியேற்றப் படுவார்கள், அங்கே இருக்கிற இனவாத அரசின் முன்னால் பலி ஆடுகளாக கொண்டுபோய் நிறுத்தப்படுவார்கள். அல்லது, அசாமில் எப்படி சட்டவிரோத குடியேறிகளுக்குத் திறந்த வெளி சிறைச்சாலைகளை உருவாக்கியிருக்கிறார்களோ அதேபோல பெரிய முள்வேலி முகாம்களை உருவாக்கி ஈழத்தமிழர்களை அதிலே கொண்டு போய் அடைப்பார்கள்.

அதிமுகவை உருவாக்கிய திரு எம்.ஜி.ஆர் அவர்கள் ஈழத் தமிழர்களுக்கு மிகப்பெரிய பாதுகாப்பாக இருந்தார். விடுதலைப் புலிகளுக்கு நான்கு கோடி ரூபாய் வழங்கினார் என்பது நாடறிந்த உண்மை. அவருக்கு அடுத்து அந்தக் கட்சியை வழிநடத்திய செல்வி ஜெயலலிதா அம்மையார் அவர்களும் முள்ளிவாய்க்கால் இனப்படுகொலைக்குப் பிறகு ஈழத் தமிழருக்கு ஆதரவான நிலைப்பாட்டைத்தான் எடுத்தார். அதற்கான தீர்மானங்களையும் அவர் சட்டப்பேரவையில் நிறைவேற்றினார்.திரு எம்ஜிஆரை, ஜெயலலிதா அம்மையாரைத் தமது முன்னோடிகளாக சொல்லிக்கொண்டிருக்கிற இன்றைய ஆட்சியாளர்கள் தமது கட்சியை உருவாக்கிய தலைவர்களுக்கு மிகப்பெரிய துரோகத்தை இழைத்து இந்த குடியுரிமைத் திருத்தச் சட்டத்திற்கு ஆதரவாக வாக்களித்திருக்கிறார்கள். இது எவ்வளவு பெரிய துரோகம்!

பாட்டாளி மக்கள் கட்சி 1992 இல் தமிழர் வாழ்வுரிமை மாநாட்டை நடத்திய காரணத்தால் அந்த கட்சியைத் தடை செய்ய வேண்டும் என்று பலர் வலியுறுத்தினார்கள். அப்போது அந்த கட்சிக்கு ஆதரவாக நாமெல்லாம் குரல் கொடுத்தோம். ஈழத்தமிழர்களுக்கு நாங்கள் தான் உண்மையான ஆதரவாளர்கள் என்று மார்தட்டிக் கொள்பவர்கள் பாட்டாளி மக்கள் கட்சியினர். அவர்கள் இன்று இந்த சட்டத்துக்கு ஆதரவாக வாக்களித்து இருக்கிறார்கள். கூட்டணி தர்மத்துக்காக நாங்கள் வாக்களித்தோம் என்று இப்போது அதற்குக் காரணம் சொல்கிறார்கள். கூட்டணி தர்மத்துக்காக ஒரு இனத்தை அழிப்பதற்கு நீங்கள் ஆதரவளிப்பீர்கள் என்று சொன்னால் உங்களுடைய அரசியல் எவ்வளவு துரோகத்தனமானது என்பதை இன்று இந்த நாடு பார்த்துக் கொண்டிருக்கிறது.

இந்த இரண்டு கட்சிகளின் துரோகத்தால் இன்றைக்கு நாடே தீப்பற்றி எரிகிறது. இந்தியாவில் இருக்கும் லட்சக்கணக்கான முஸ்லிம்கள் இன்று மிகப்பெரிய அச்சத்தில் இருக்கிறார்கள். குடியுரிமைத் திருத்தச் சட்டத்தோடு இது முடிந்து விடப் போவதில்லை,

இதற்கு அடுத்ததாக ‘என்.ஆர்.சி (NRC) முறையை இந்தியா முழுவதும் கொண்டு வரப் போகிறோம்’ என்று உள்துறை அமைச்சர் அமித் ஷா கூறியிருக்கிறார்.அப்படி வந்தால் நாம் ஒவ்வொருவருமே நம்முடைய பாட்டன் முப்பாட்டன் கால ஆவணங்களைக் காட்டித்தான் நாங்களெல்லாம் பூர்வமாக இந்த நாட்டைச் சேர்ந்தவர்கள் என்று நிரூபிக்க வேண்டும். இல்லையென்றால் நம்மையெல்லாம் இந்த நாட்டுக் குடிமக்கள் இல்லை என்று சொல்லி நம்முடைய குடியுரிமையைப் பறித்து விடுவார்கள். எனவே இந்த ஆபத்து முஸ்லிம்களுக்கு மட்டும்தான் என்று நாம் இருந்துவிடக்கூடாது.நம் எல்லோருக்குமே ஆபத்து வரப்போகிறது. ஏற்கனவே தமிழினத்தைக் குறி வைத்து விட்டார்கள். இங்கே இருக்கிற பாஜக எதிர்ப்பாளர்களை, சங்கப் பரிவார அரசியலை எதிர்ப்பவர்களைக் குறிவைத்து அவர்களுடைய குடியுரிமைகளையெல்லாம் பறிப்பதற்கு சதி செய்து கொண்டிருக்கிறார்கள்.இதை நாம் மறந்துவிடக்கூடாது.

இதைப்பற்றி திரிணாமுல் காங்கிரஸைச் சேர்ந்த நாடாளுமன்ற உறுப்பினர் ஒரு கேள்வி எழுப்பினார்: “நமது பிரதமர் பட்டப்படிப்பு படித்திருப்பதாகத் தேர்தலின்போது தாக்கல் செய்த தன்னுடைய பிரமாணப் பத்திரத்தில் தெரிவித்திருக்கிறார். ஆனால் அதற்கான சான்றுகள் எங்கே என்று கேட்டால் இதுவரை அவரால் அளிக்க முடியவில்லை. பிரதமர் எந்த கல்லூரியில் படித்தார்? என்ன பட்டம் வாங்கினார்? என்று ஆர்.டி.ஐ மூலமாக கேட்கப்பட்ட கேள்விக்கு இத்தனை ஆண்டுகாலமாகப் பதில் அளிக்க முடியவில்லை. பிரதமருடைய கல்விச் சான்றிதழையே தேடிக் கண்டுபிடிக்க முடியாத நிலையில் நம்முடைய பாட்டன் முப்பாட்டனுடைய ஆவணங்களைக் கொண்டு வரச்சொன்னால் எப்படி நாம் கொண்டு வர முடியும்?” என்று அவர் கேட்டிருக்கிறார். பிரதமர் மட்டுமல்ல இப்போது மத்திய அமைச்சரவையில் இடம்பெற்றுள்ள இன்னும் சிலர்மீதும் இத்தகைய குற்றச்சாட்டுகள் இருக்கின்றன.

இன்றைய ஆட்சியாளர்கள் எதையும் செய்யத் துணிந்துவிட்டார்கள். இந்திய அரசியலமைப்புச் சட்டத்தை, இந்திய ஜனநாயகத்தைக் காப்பாற்றும் மிகப்பெரிய பொறுப்பு நமக்கு இருக்கிறது. அதற்கான போராட்டங்களை முன்னெடுத்துச் செல்வோம். நன்றி வணக்கம்.

*

Thanks to : Ravikumar

சால்வடார் டாலியின் ஓவியங்கள் – பிரம்மராஜன்

பிரம்மராஜனின் மீட்சி இதழ் 28-இல் இருந்து, நன்றியுடன்..

பெரும் பயப்பதியும், காரண அறிவும் பிணைந்து நம்மை இயக்குகிற இந்த இருபதாம் நூற்றாண்டின் நிகழ்வுகள் நமக்கு அர்த்தத்தை அளிக்க வேண்டுமானால் அது ஸர்ரியலிஸத்தின் மூலமாகவே அதிகமாய் சாத்தியப்படும். வேறு எந்தவித கோணத்திலும், ஆய்வு முறைமையிலும் பிடிபடாத பல உறுத்தும் உண்மைகள் – ஹிரோஷிமா, வியத்நாம், கம்பூச்சியா, டெஸ்ட் ட்யூப் குழந்தைகள், பெர்ஷிங் IIs ஏவுகணைகள்- இவை யாவும் ஸர்ரியலிஸ வெளிப்பாட்டில் நமது பிரக்ஞையில் கச்சிதமாகப் பதிவாகின்றன. ஸர்ரியலிஸ ஓவிய இயக்கத்தில் டாலியின் பங்கு தனித்துவமானது இருபதாம் நூற்றாண்டின் இரட்டை நிகழ்போக்குகளான Sexம், paranoiaவும் டாலியின் உலகத்திலும் நமது உலகத்திலும் ஒரே மாதிரி இயங்குகின்றன. மற்றொரு ஸர்ரியலிஸ ஓவியரான Max Ernst மற்றும் அமெரிக்க நாவலாசிரியர் William Burroughs ஆகிய இருவரிடமிருந்தும் டாலி வேறுபடுகிறார். முந்திய இருவரும் தமது தனித்துவ உலகங்களின் நிழல்களில் சமைந்துவிடும்போது டாலி தனது ஓவிய வெளிப்பாடுகளில் இருந்து வெளிப்படுகிறார்.

ஃபிராய்டிஸ யுகத்தின் தாக்கத்தை முழுமையாக ஏற்றுக்கொண்டவர்களில் முதன்மையானவர் டாலி. இருபதாம் நூற்றாண்டு ஸ்வயத்தினுடைய (Peyche)வினோத வியாபக உலகினை, தொலைபேசிகள், குழையும் கைக்கடிகாரங்கள், பொறிக்கப்பட்ட முட்டைகள். கடற்கரைகள் போன்ற சாதாரண உலகின் படிமங்களைக் கொண்டு சித்தரிக்கிறார். டாலியின் ஓவியங்களில் நடக்கும் ‘நிகழ்ச்சிகளுக்கும் நமது நடைமுறை யதார்த்தத்தின் நிகழ்ச்சிகளுக்கும் அதிக வேறுபாடில்லை என்று சொல்ல முடியும். டாலியின் ஓவியங்களின் பிரதான குணம் என்று சொல்லப்படக் கூடியது அவற்றின் hallucinatory naturalism of the Renaissance. இதற்கு மேற்பட்டு டாலி புகைப்படத் தன்மையான யதார்த்தத்தையும், குறிப்பிட்ட ஒருவித திரைப்பட வெளிப்பாட்டு முறையையும் உத்திகளாகப் பயன்படுத்துகினர். இந்த உத்திகள், பார்வையாளனை அவனுடைய வசதிக்கு ஏற்ப மிக நெருக்கமாக ஓவியங்களுடன் தொடர்புபடுத்துகின்றன.

பிற ஸர்ரியலிய ஓவியர்களான Max Ernat, Rene Magritte. Tanguy ஆகியோர் சம்பிரதாய விவரணை வெளியைப் (Traditional Narrative Space) பயன்படுத்தினார்கள். இவ் விதமான விவரணை வெளி, ஓவியத்தின் காட்சிப் பொருளை முன்பார்வை கொண்டதாகவும் (Frontal) பொதுப்படுத்தப்பட்ட கால அமைப்பை உடையதாகவும் ஆக்குகிறது. மாறாக டாலி தனது ஓவியங்களை, திரைப்படத்தில் ஒரு Frameலிருந்து மற்றொரு Frameக்கு கடந்து செல்வது மாதிரியான உணர்வைத் தரும்படி ஆக்கியிருக்கிறார். டாலியின் ஓவிய உலகில் நம்மை அமைதியில்லாமல் துன்புறுத்தும் வெளிச்சம், சூரியனைச் சார்ந்தது என்பதை விட மின் ஒளியைச் சார்ந்தது என்பது சரியாக இருக்கும். மேலும் டாலியின் ஓவியங்கள், சென்டிமென்டலிஸத்தைத் தவிர்த்த அழகான நியூஸ் ரீல்களாக நமது மண்டைகளில் தயாரிக்கப்பட்ட சினிமாப் படங்களின் இயக்கமற்ற Stillகளைப் போலிருக்கின்றன. முழு மனிதனையே தனது சித்திரங்களில் படைக்கும் டாலியின் ஒவிய வளர்ச்சிக் கட்டங்கள் பின்வருமாறு அமைகின்றன.

1.The classic Freudian Phase.
2. The Metamorphic phase. (A Poly-perverse Period) .
3. The Religious Phase.
4. The Nuclear Phase.

1968ம் ஆண்டு டாலி கூறிய வார்த்தைகள் ஒய்வற்று ஒலித்துக் கொண்டேயிருக்கின்றன !
“The Specialized Sciences of our times are concentrating on the study of the three constants of life: the Sexual instinct, the sentiment of death, and the anguish of space – time.”
*
மீட்சி முகப்பு அட்டை ஓவியம் : டாலியின் ‘Geopoliticus’ Child Watching the Birth of a New Man. 1943 Reynolds – Morse Collection, Cleveland, Ohio.

*

நன்றி : பிரம்மராஜன்

*

மேலும் :
சால்வடார் டாலி – பிரம்மராஜன் தொகுப்பில் இருந்து…  –  நன்றி : யுவன் பிரபாகரன்

The Cave of the Yellow Dog – சென்ஷி விமர்சனம்

”அப்பா.. வாலினை என்ன செய்வீர்கள்?”

“புதைக்கையில் அதை நாயின் தலைப்பகுதியின் அடியில் வைத்துவிடுவோம். அப்போதுதான் வால் கொண்ட நாயாக அல்லாமல் இதன் மறுபிறப்பில் குதிரைவால் சிகை கொண்ட குழந்தையாக பிறக்கும்”

***

ஒரு பெரிய பணக்கார குடும்ப வாரிசான அழகான பெண் ஒருத்திக்கு திடீரென உடல் நலம் சரியில்லாமல் போய்விட்டதாம். எந்தவித சிகிச்சைகளும் பலனளிக்காததால், அவளது தந்தை ஒரு அறிவிற் சிறந்த பெரியவரிடம் சென்று அறிவுரை கேட்கிறார். அதற்கு அந்த பெரியவர், “உங்கள் வீட்டில் உள்ள மஞ்சள் நிற நாயின் கோபமே இந்நோய்க்கு காரணம். அதை அகற்றிவிட்டால் நோய் குணமாகிவிடும்” என்று பதில் தருகிறார்.

ஆனால் அந்த நாய் தங்கள் குடும்பத்தினரையும் மந்தை கூட்டத்தையும் காப்பாற்றுகிறது என்ற தந்தையின் கேள்விக்கு பதிலாக பெரியவர் ’உனக்கு தேவையான பதிலை தந்துவிட்டேன்’ என்று சொல்கிறார்.

இவ்வளவு காலமாக தங்களின் பாதுகாப்பிற்காக உழைத்த நாயைக் கொல்ல செல்வந்தர்க்கு மனம் வரவில்லை. ஆனால் தன் மகளின் நோய் தீர வேறு எந்த வழியும் தெரியாததால், அந்த நாயை அதனால் வெளியேற இயலாத ஒரு குகையினுள் விட்டு விடுகிறார். தினமும் குகைக்குச் சென்று நாய்க்கு உணவும் கொடுத்து வருகிறார். ஒரு நாள் அந்த நாய் அங்கிருந்து காணாமல் போய்விடுகிறது.

ஆனால் பிறகு அந்த பெண் குணமாகிவிட்டாள். காரணம் அவள் ஒரு இளைஞன் மேல் கொண்டிருந்த காதல். காதலர்களின் சந்திப்பிற்கு அந்த நாய் மிகுந்த இடைஞ்சலாக இருந்ததால் ஏற்பட்ட நோய் அது. நாய் தொலைந்ததால் காதலர்கள் சந்திப்பிற்கு இந்த இடையூறுமில்லை.

“பாட்டி! அந்த மஞ்சள் நிற நாய்க்கு என்ன ஆனது?”

”அந்த காதலர்கள் திருமணம் செய்து கொண்டார்கள். அந்த நாய் குதிரைவால் முடி கொண்ட குழந்தையாக மறுபிறப்பு கொண்டது.”

– மங்கோலிய நாடோடி பழங்கதை

நன்சால் தனது முதல் பள்ளிக்கூட விடுப்பில் இருப்பிடம் வந்து சேரும் தினத்திலிருந்து கதை தொடங்குகிறது. மங்கோலியாவில் சமவெளியில் ஆட்டு மந்தைகளை நாடோடிகளாய் மேய்த்து வாழ்ந்து வரும் இரண்டு பெரியவர்கள்மூன்று குழந்தைகள் அடங்கிய குடும்பம் அது. மேய்ச்சலுக்கு உகந்த நிலங்களில் நிகழும் ஆபத்துகளில் ஒன்றான ஓநாய்களின் தாக்குதலில் பலியான ஆட்டின் தோலை உரித்து தொலைவில் இருக்கும் நகரத்தில் விற்கத் தயாராகின்றார் தந்தை. அங்கங்கு பலியான விலங்கின் மிச்சங்களுக்காக அலையும் பிணந்தின்னிக்கழுகுகளின் கூட்டம். வறட்டி அள்ளச் செல்லும் நான்சல் மலைக்குகையினுள் சிக்கிக் கொண்ட நாயினைக் காப்பாற்றி ஜோகோர் என்று பெயரிட்டு வளர்க்க வீட்டிற்கு கொண்டு வருகிறாள். குகையில் வெளியேற இயலாமல் சிக்கிய நாய் என்பது கெட்ட சகுனத்திற்கான அறிகுறி என்பதால் தந்தை அதை விட்டுவிடும்படி சொல்கிறார். ஆனால் தந்தைக்கு தெரியாமல் வளர்க்க சிறுமி ஆசைப்படுகிறாள். நகரம் சென்று திரும்பும் தந்தை நகரத்தில் தனக்கு ஒரு வேலை கிடைத்திருப்பதையும் குடும்பத்தினருடன் அங்கு வீடு மாறிவிடலாமென்றும் கூறுகிறார். நாயை அழைத்துச் செல்ல மனமின்றி அதை அங்கேயே கட்டிப்போட்டுவிட்டு பொருட்களை வண்டியிலேற்றி குடும்பத்தினருடன் சற்று தூரம் வந்தபின்னே சிறிய தம்பியைக் காணாமல் விட்டதால் மீண்டும் குழந்தையைத் தேடி பழைய இடத்திற்கு தந்தை விரைய அங்கு ஒரு இயல்பான முடிவு நிகழ்கிறது.

திரைப்படத்தில் அனைத்துமே பிடித்தமான விசயங்களாய் இருந்தாலும் முதலிடத்தை எளிதாய்ப் பெற்றுக்கொள்கின்றன குழந்தைகள். ஒரே குடும்ப நாயகரின் குழந்தைகள் என்பதால் வெகு இயல்பாக நடிப்பென்ற அச்சு இன்றி பொருந்திக்கொள்கிறார்கள். குழந்தைகளுக்கு இடையிலான இயல்பான விளையாட்டு அன்னியோன்யம் பாசம் கண்ணை விட்டு நீங்குவதில்லை.

இரண்டாவதாய் வசனங்கள் மற்றும் காட்சிகள். நாயைத் தேடி வழி தப்பிப்போன சிறுமி நான்சல்-ஐ நாயுடன் புயல் மழையிலிருந்து காப்பாற்றும் பாட்டி ஒருவர் சொன்ன பழங்கதையை கேட்டபின்பு, தாயிடம், “உங்களின் பழைய வாழ்வு நினைவில் உள்ளதா?” என்று கேள்வியும் அதற்கான பதிலும் நமக்கு இந்த மங்கோலிய திரைப்படத்தைக் குறித்த சித்திரத்தை பதிய வைத்துவிடும். அதிலும் அந்த கிழவியின் முகத்தை நமக்கு பதிய வைக்கும் அந்த ஒளி. நிச்சயம் மறக்கவியலாதது.

காட்சிகளில் மழலையைத் தொலைத்துவிடாது பத்திரப்படுத்தி வைத்துக்கொள்ளும் சிறுமி, இளமையில் அந்த மஞ்சள் நிறங்கொண்ட வண்ணக்கனவுகள் சுமக்கும் மழலைத்தன்மையை வெளியேறிவிடாத குகைக்குள் போட்டு தன்னிடமிருந்து விடுதலை பெற்றுக்கொள்ளுதலை அந்த மங்கோலிய நாடோடிக்கதை சொல்கிறதா! சகுனங்களின் மீது அபரிமிதமான அச்சங்கொண்ட எளிய குடும்பத்தினர் பரிசாய்க் கிடைத்த பொருள் சூட்டில் உருகிவிடுதலையும், புத்தருடன் விளையாடும் தம்பியை எச்சரிக்கும் இன்னொரு குழந்தையுமாய் இருத்தலை உணர்த்தும். நாகரீகத்திற்கும் பழங்காலத்திற்கும் இடையிலான மரப்பாலமாய் உணர்வுகள். பெருமலையின் அடிவாரத்தில் பசுஞ்சமவெளியில் வாழும் வாழ்வு நிச்சயம் நகரின் மையத்தில் கிடைத்துவிடாது. ஆனால் ஓநாய்கள் என்ற ஒற்றைச் சொல்லைக் கைக்கொண்டு நகர்கிறது குடும்பம். குறிப்பாய் தாங்கள் தங்கி இருந்த இருப்பிடத்தை கழற்றி எடுக்கும் இடம்.

நான்சலிடம் இரண்டு கேள்விகள் முன்வைக்கப்படுகின்றன. முதலாவது தாயிடமிருந்து, உனது விரித்துப் பிடித்து பின்னால் மடித்த உள்ளங்கையை உன்னால் கடிக்க இயலுமா? இரண்டாவது கிழவியிடமிருந்து, கோணிஊசியின் கூர் முனையின் மேலே ஏதும் ஒரு அரிசிமணியை நிறுத்தி வைக்க முடியுமா? இரண்டு செயல்களையும் நான்சலால் செய்ய முடிவதில்லை. பருவம் தொலைக்கப்படாத மழலைத்தன்மைக்கு காரணம் தேட இடம் இல்லை.

நாய் தன்னை குகையில் விட்டுப்போனவர்களைத் தேடிப்போகும் இடமும், இடிபாடுகள் கூடிய காலி செய்யப்பட்ட இருப்பிடத்தின் மத்தியில் படுத்துக்கொண்டு வருந்துவதுமாய் எப்படி பயிற்சியளித்தார்களோ!

முதல் காட்சியில் இறந்துபோகும் நாயைப் புதைக்க கொண்டு செல்லும் தந்தை மகளுடன் ஆரம்பமாகும் திரைப்படம், இறுதிக்காட்சியில் முதல் காட்சியின் நினைவைக் கொண்டு வந்து பதறவைத்து, பின் நீண்ட வரிசை கொண்ட மாட்டு வண்டியின் கடைசியில் அமர்ந்திருக்கும் நாயுடன் முடிவது மகிழ்வு.

என்னதான் மசாலா ஆக்சன் மொக்கை படங்களை நேரங்கடத்துதலுக்காக பார்த்தாலும் மிகச் சிறந்த திரைப்படத்தை பார்த்து முடித்தபின் கிடைக்கும் மன நெகிழ்வும் ஆசுவாசமும் வேறு எவையும் தருவதில்லை. The Cave of the Yellow Dog. 2005ம் வருடத்திற்கான சிறந்த வெளிநாட்டு திரைப்படத்திற்கான ஆஸ்கர் விருதைப் பெற்ற மங்கோலியன் திரைப்படம்.

*

நன்றி : சிந்தனையாளர் சென்ஷி

கடற்காகமும் காயல் சுபுஹானும்

’கனவுப் பிரியன்’ முஹம்மது யூசுப்-ன் இரண்டாம் நாவலான கடற்காகம் பற்றி நண்பர் அ.மு.நெருடா மிகச்சிறப்பாக ஒரு விமர்சனம் எழுதியிருக்கிறார் . பிரியத்திற்குரிய நூருல் அமீன்பாய் உள்பட பலரும் தொடர்ந்து விமர்சனங்கள் எழுதிக்கொண்டிருப்பதைப் பார்க்கிறேன். எல்லாவற்றையும் தொகுத்து அதையே மூன்றாவது நாவலாகக் கொண்டுவரும் திட்டம் தம்பி யூசுபிற்கு உண்டு என்று நன்றாக அறிவேன். அது இருக்கட்டும், இப்போது பிரபல புகைப்படக் கலைஞர் சுபுஹான் பீர் முஹம்மது அவர்களின் நிக்கான் பார்வையை இங்கே பகிர்கிறேன். நன்றி. – AB

*

“நாம் உயிருள்ள ஒவ்வொன்றையும் நீரிலிருந்தே உருவாக்கினோம்” –(21: 30) அல் குர் ஆன்…

கடற்காகம் முன்னுரையில் இப்படித்தான் தொடங்குகிறார் முஹம்மது யூசுப் .
எதோ தண்ணீர் பிரச்சனையை தான் எழுதி இருப்பார் என நினைத்தேன் .

டெல்மாதீவு அபுதாபிக்கு சொந்தமானது தானே ? ஆமாண்ணே முன்னே அது ஈரானை சேர்ந்து இருந்திச்சி .. அதை பற்றியும் எழுதி இருக்கேன்

ஈரானில் கிருஸ்துவர்கள் இருக்காங்களா? ஆமா அதை பற்றியும் எழுதி இருக்கேன் ,

MSF அமைப்பு அப்படின்னா என்ன ? ஆமாண்ணே அதைப்பற்றியும் எழுதி இருக்கேன்

Man Made Disaster அப்படின்னா? ஆமாண்ணே அதைப்பற்றியும் எழுதி இருக்கேன்.

இப்படி நான் எதைக் கேட்டாலும் ஆமாண்ணே அதைப்பற்றியும் எழுதி இருக்கேன்னுதான் கடந்த எட்டு மாசமா சொல்லிகிட்டே இருந்தார். எதை எங்கே கோர்க்கப்போறார்.புரியாமல் மண்டையை பிச்சிகிட்டு இருந்தேன்.

கடற்காகம் கடல் பற்றி சொல்கிறது,கடலாடிகள் பற்றி சொல்கிறது,கரைமடிகள் பற்றி சொல்கிறது,கபட நாடகம் பற்றிச் சொல்கிறது, காதல் சொல்கிறது .காமம் சொல்கின்றது.கவிதை சொல்கிறது ,திருட்டு பற்றி சொல்கின்றது, திருந்தச் சொல்கிறது, சரித்திரம் சொல்கின்றது, ,நினைவுகளை சொல்கின்றது,மருத்துவம் சொல்கிறது .மருத்துவர் ,மருத்துவ உபகரணங்கள் பற்றி சொல்கிறது. யுத்தம் சொல்கிறது,பறவைகளின் இதமான சத்தமும் சொல்கிறது, . மரணம் ,ஜனனம் சொல்கிறது,சூது ,சூன்யம் , அழகியல் ,கோபம்,தாபம்.பரிவு,பாசம் நேசம் ,வெட்கம்,துக்கம்,மதம் ,மார்க்கம் கூடவே விரசம் கலக்காத சரசமும் சொல்கிறது .

இணையம் புத்தன் தருவையில் தொடங்கி அபுதாபி,டெல்மா தீவு ,பெசன்ட் நகர் கடற்க்கரை ,தூத்துக்குடி,ராமநாதபுரம் ,கீழக்கரை,பெரியப் பட்டினம் ,ஈரான் ,பாலஸ்தீன் என உலகெல்லாம் பறந்து வரலாற்றினையும் உலக அரசியல் பற்றியும் சொல்கிறது இறுதியாக சிரியாவின் அலீப்போ நகரின் Al Quds மருத்துவமனையில் “இவங்க எல்லாம் ஏன் முஸ்லீமா பிறந்தாங்க சத்யா?.முஸ்லீமா பெறக்குறது என்ன அவ்வளவு குற்றமா? இல்லே இந்த மண்ணுலே பெட்ரோல் கிடைகிறது இவுங்க செஞ்ச தப்பா….? என்று நம்முள் இறங்குகிறது .

தாரிக்,சத்யா,அய்டா,முவாசின்,சமீரா,மர்வான்,செல்வராஜ்,அன்வர் ராஜா ,சுல்தானா,அலவிக்குட்டி , காசர்கோடு ஹமீது,டேனி,எஸ்தர் என மறக்க முடியாத பாத்திரங்கள்.

ஒரு சிறிய தீவில் நடக்கும் சம்பவங்களில் ஒருவருக்கொருவர் பேசிகொண்டிருக்கும் போதே சுவையாக உலக அரசியல் சொல்கிறார். ஷியா பிரிவு எப்படி தோன்றியது என்பதையும்,இஸ்லாமியர்களை பிரிக்க நடந்த ( நடந்து கொண்டிருக்கும்) சதிகள் பற்றியும் ,Haarp எனும் அதி நவீன வானிலை ஆயுதம் பற்றியும்.

சவக்காடு ஹமீது தாரிக்கிடம் “நபி நூஹுவோட காலத்துலே வந்த பிரளயம் பத்தி அல் குர் ஆன் பேசுது. இந்துக்களின் யுகத்தில் கலியுகம் என்பது நூஹு நபியின் வெள்ளப்பிரளய காலத்தில் துவங்குது.அவர்கள் அதை ஜலப் பிரளயவான் நீர் பெருக்குன்னு குறிப்பிடுவாங்க.’மனு’ மனித குலத்தின் வழிகாட்டியாகவும் , நிகரற்றவராகவும் இருந்தார் .அனைத்துமனித குலத்தின் தந்தையாகவும், மனித ஜீவராசிகளின் வாழ்கையை முறைப்படுத்தும் சட்டங்களைத் தோற்றுவிப்பவாரகவும் இருந்தார் (ரிக்வேதம் 1-13-4 ) ன்னு அவுங்க வேதம் கூறுது “மனித இனம் முழுமையாக அழிந்து போய் விட்டது . ஏழு பிரபலமான ரிஷிகளளாகிய வணக்கஸ்தர்களை தவிர எழு ரிஷிகளும் ஒரு கப்பலில் ஏறி உலகளாவிய அந்த அழிவில் இருந்து தப்பினர் .விஷ்ணு அக்கப்பலை செலுத்தினார் .இன்னொரு மகத்தான மனிதரும் அந்த அழிவில் இருந்து தப்பித்தார் அவர் “மனு”வாகும்ன்னு மார்க்கண்டேய புராணத்திலும் இந்த சம்பவம் வருது “ என சொல்லும் போது பிரான்ஸ் நாட்டின் அபுதாபியில் உள்ள லூவர் அருங்காட்சியகத்தில் கண்ணாடி பேழையில் வைக்கப்பட்டிருந்த படகும் மனிதர்களுமே நினைவுக்கு வந்தார்கள்.

தாரிக்கும் ஜானுவும் கொஞ்சி குலவும் நேரம்
“துயில் கொண்ட வேளையிலே குளிர் கண்ட மேனியிலே
துணை வந்து சேரும்போது சொல்லவோ இன்பங்கள்”
என்ற பாடல் நினைவுக்கு வந்தது .

டேனியல், எஸ்தர் இடையே நடக்கும் சம்பாஷனைகளில் வரிகளில் யூசுபை மறந்தேன் சுஜாதா நினைவுக்கு வந்தார் .சிறந்த சொல்லாடல் .

எத்தனை முறை முயன்றாலும் தவிர்க்க இயலாத் நிழல் போல் எப்போதும் தொடரும்,கடலில் அழிந்து போன நகரின் மிச்சம் போன்றது நினைவின் வடுக்கள். என்பதைப்போல அருமையான நிறைய உவமானங்கள் . செறிவான

நடை . நிறைந்த தகவல்களோடு சிறப்பாய் நகர்கிறது நாவல் .

யோவ் ..எங்கே போய் இவ்வளவு தகவல் சேகரித்தீர். வாழ்த்துக்கள் நண்பா .

என் போன்ற தகவல் கொண்டாடிகளுக்கு பெரும் பொக்கிஷம். தமிழ் இலக்கிய உலகத்தில் சிறப்பான இடம் இந்த ”கடற்காகம்” நாவலுக்கு உண்டு . மீண்டும் வாழ்த்துக்கள் முஹம்மது யூசுப் .

என்றென்றும் அன்புடன்

சுபான்

*

தொடர்புடைய காணொளி : யூசுப் ஏற்புரை (@ ஷார்ஜா புத்தகத் திருவிழா – 2019)

« Older entries Newer entries »