மறக்கவொண்ணா மாமேதை

ஹஜ்ரத் எஸ். அப்துல் வஹ்ஹாப் பாகவி அவர்களின் மறைவின்போது ‘சொல்லரசு’ மு. ஜாபர் முஹ்யித்தீன் அவர்கள் எழுதிய கட்டுரை இது (முஸ்லிம் முரசு – நவம்பர் 2002).

ஹஜ்ரத்சிலர் பிறந்த ஊரினால் சிறப்படைவார்கள். வேறு சிலர் பிறந்த ஊருக்குச் சிறப்பு சேர்ப்பார்கள். வெகுச்சிலர் சீரிய சிந்தனையாலும் செம்மையான செயல்பாட்டினாலும் தானும் புகழ்பெற்று, பிறந்த மண்ணுக்கும் பெருமை சேர்ப்பார்கள். இத்தகு மேன்மக்களில் ஒருவர் நம்மிடையே வாழ்ந்து கடந்த 9.9.2002 அன்று இறைவனின் நாட்டப்படி மறுமைப் பேறு அடைந்த மார்க்க அறிஞர் , பன்னூலாசிரியர், மௌலானா மௌலவி ஹஜ்ரத் எஸ். அப்துல் வஹ்ஹாப் சாஹிபு காதிரி ஆவார். கூடுதல் சிறப்பு நாகூரில் அடக்கம் பெற்றுள்ள இறைநேசச் செல்வர், கருணைக் கடல் செய்யிது அப்துல் காதிர் ஷாஹூல் ஹமீது பாதுஷா நாயகம் அவர்களின் வழித்தோன்றல் அவர்.

1933ஆம் ஆண்டு அக்டோபர் திங்கள் 8ஆம் நாள் பிறந்தார். தந்தையார் பெயர் கே.எஸ். முஹம்மது கௌஸ் சாஹிபு. தாயார் பெயர் செல்ல நாச்சியார்.

வேலூர் பாக்கியத்துல் சாலிஹாத் அரபிக் கல்லூரியில் மாணவராக ஞானம் பயின்ற காலத்திலேயே எழுத்துத்துறை அவரைக் கவர்ந்து ஈர்த்தது. அப்போதே எழுத்துலகப் பிரவேசம். ஆரம்ப காலத்தில் விந்தியன், எஸ்யே.பி ஆகிய புனைபெயர்களில் சிறுகதைகள் எழுதினார். தமிழகத்தின் வார, மாத இதழ்களில் அவை இடம் பெற்றன. பின்னர் மணிவிளக்கு இதழில் அவரது எழுத்துக்கள் தொடர்ந்து வந்தன. அவருக்கு சமுதாயத்தில் தனி மதிப்பையும் மேன்மை சிறப்பையும் பெற்றுத் தந்த எழுத்தாற்றல், மொழித் திறன், சிந்தனைச் செறிவு வெளிப்பட்டது. ஆரம்ப காலத்திலேயே தமிழ் முஸ்லிம் சமுதாயத்தில் அங்கீகாரம் அவருக்கு உரித்தானது!

அறிவுலக மேதை இமாம் கஸ்ஸாலி (ரஹ்) அவர்களின் ‘இஹ்யாவு உலுமித்தீன்’ பேரறிவுப் பெட்டகமான பெருநூலினை இனிய-எளிய- எல்லோருக்கும் படிக்கக் கூடிய, மொழி நடையில் தமிழுருவாகக் கொணரும் முயற்சியில் ஈடுபட்டார். அவரது தனித்துவம் அதில் ஒளிர்ந்தபோது முத்திரை பதித்து முழுவெற்றியையும் ஈட்டினார். எழுத்தால் ஈர்க்கப்பட்டவர்கள் எண்ணிக்கையில் பெருகினர். வாசகர் வட்டம் உருவானது. அது காலப்போக்கில் விரிந்து பரந்து தமிழ் கூறும் நல்லுலகம் எங்கனும் அவரது பெயர் ஒலிக்க வழி கோலியது.

மார்க்க அறிஞர் என்ற மதிப்பிற்கும் மரியாதைக்கும் உரியவரான அவர், எழுத்தாளர், மொழி பெயர்ப்பாளர், நூலாசிரியர், வரலாற்று விற்பன்னர் என்றெல்லாம் புகழ்ந்துரைக்க பெற்றமைக்குரிய தெளிவான சரியான காரணம் அவர் பெற்றிருந்த பன்முகத் திறனே ஆகும்.

இஹ்யா நூல் வரிசையில் முதல் நூலாக 1957ஆம் ஆண்டு ‘பாவமன்னிப்பு’ அச்சில் வந்தது. அதனைத் தொடர்ந்து அந்த வரிசையில் 2000 ஆண்டின் பிற்பகுதியில் வெளிவந்த ‘ஞானக்கோட்டையின் தலைவாசல்’ என்ற தலைப்பிலான நூல்வரை அத்தனையும் பொற் குவியல்கள். போற்றுதற்கும் புகழுதற்கும் உரிய அவர் நம் காலத்தில் வாழ்ந்தது நாம் பெற்ற பேறு எனில் அது பொய் அல்ல.

அறிவுக்கோட்டையின் தலைவாயில் ஹலரத் அலீ (ரலி) அவர்கள் எழுதிய கடிதங்களையும், கருத்துக்களையும் ஆதாரமாகக் கொண்டு அவர் எழுதிய நூலின் தலைப்பு ‘மகனுக்கு’ என்பதாகும்.

பாரசீகம் தந்த ஞான வள்ளல் மௌலானா ரூமி அவர்களில் அறிவுக் கருவூலங்களையும் தமிழுரு கொடுத்துள்ளார். அவை முறையே ‘மௌலானா ரூமியில் தத்துவங்கள்’ மற்றும் ‘ஏகத்துவமும் எதிர்வாதமும்’ ஆகும்.

ஆத்மீகத் தந்தை ஹலரத் இமாம் ஜாபர் சாதிக் (ரலி) அவர்களின் வாழ்க்கை வரலாற்றை விரிவாக – தெளிவாக தமிழில் தந்த தனிச்சிறப்பு இவருக்கு உரியது.

மணிவிளக்கு இதழில் தொடர்ந்து கட்டுரையாக வந்த ‘மக்கா யாத்திரை’ பின்னர் அத்தொகுப்பு ‘அரேபியாவில் சில நாள்’ என்னும் நூலாக வெளிவந்தது. மணிவிளக்கில் கட்டுரைத் தொடராக வந்தபோதும், தனி நூலாக வந்தபோதும் பல்லாயிரக்கணக்கான வாசகர்களின் வரவேற்பைப் பெற்றது.

இஹ்யாவு உலுமித்தின் பெருநூலின் மொழிபெயர்ப்பாளர் என்ற மதிப்பீட்டிலிருந்து விடுபட்டு அல்லது அந்த அளவுக்கோட்டைக் கடந்து இஹ்யாவின் விரிவுரையாளர் என்ற அளவில் உயர்ந்தார். அப்படித்தான் அறிஞர் பெருமக்கள் கருத்துரைத்து அடையாளம் காட்டினார்கள்.

அவருடைய எழுத்துக்களால் உருப்பெற்ற நூல்களைப் பதிப்பிக்கவும் வெளியிடவும் பல்வேறு நிறுவனங்களும் தனிநபர்களும் முனைந்தனர். வேறு வார்த்தைகளில் சொல்வதானால் போட்டிபோட்டுக்கொண்டு முன் வந்தன. அப்படி ஆர்வத்துடன் முதலீடு செய்தவர்கள் யாரும் இழப்பிற்குள்ளாகவில்லை. ஏமாற்றம் அடையவும் இல்லை. அத்தனை நூல்களும் பல பதிப்புகளைக் கண்டது.

அவருடைய நூல்களுக்குரிய வாசகர் வட்டம் உலகளாவியது என்று சொன்னால் கூட அது தவறு அல்ல. தமிழ் முஸ்லிம்கள் எங்கெல்லாம் வாழ்கிறார்களோ அங்கெல்லாம் அவருடைய நூல்களை விரும்பிப் படிக்கிறார்கள். கடந்த அரை நூற்றாண்டாக அப்படியொரு நிலை நீடிக்கிறது. நிலைத்த பயன் தருகிறது.

இஹ்யா வரிசையிலான நூல்கள் அனைத்தும் அற்புதமானவை. அவற்றுள் ‘இறைவணக்கம்’, ‘பக்தர்களின் பாதை’ , ‘தர்க்கத்துக்கு அப்பால்’ ஆகிய மூன்று நூல்களும் தமிழ் முஸ்லிம் வாச்கர்களையும் கடந்து முஸ்லிம் அல்லாத தமிழர்களும் வாங்கி விரும்பி படிக்கிறார்கள்; பாராட்டுகிறார்கள். நாம் பெருமையும், பெருமிதமும் கொள்ள வழி அமைத்துள்ளது.

மாண்பமை ஹஜ்ரத் எஸ். அப்துல் வஹ்ஹாப் சாஹிபு பாகவி அவர்கள் எழுதிய ஜாபர் சாதிக் (ரலி) வரலாற்று நூலின் முதற்பதிப்பு (1965) 209ஆம் பக்கத்தில் இமாம் அவர்களின் ஈடுகட்ட முடியாத இழப்பை விவரித்த நூலாசிரியர், “…ஒவ்வொரு நாளும் விளக்கு ஏற்றி வைத்தார்கள், உறவினர்கள். அணைந்த விளக்கினால் ஏற்பட்ட வெற்றிடத்தை இந்தப் புதிய விளக்கினால் நிரப்ப முடியவில்லை” என்று எழுதியுள்ளார்.

அது இவருக்கும் – எங்கள் ஹஜ்ரத் அவர்களுக்கும் – பொருந்தும். இன்னாலில்லாஹி வ இன்னா இலைஹி ராஜிஊன்…

*

Jafer Mohiyudeen1

‘சொல்லரசு’ மு. ஜாபர் முஹ்யித்தீன்
*

நன்றி : முஸ்லிம் முரசு

ஆறுதல் தரும் ஆன்மீகப் பொக்கிஷம் (pdf)

சத்தியமாக இது சாதிக், தாஜ், மஜீதுக்கு அல்ல; மனிதர்களுக்கு!.  சூஃபிஸத்தில் நாட்டம் உள்ளவர்கள் சுலபமாக தரவிரக்கலாம் , அனுமதி வாங்கியபிறகு. சுட்டி அனுப்பிய அன்பரிடம், ‘மாபெரும் ஆன்மீகப் பொக்கிஷத்தை கொடுத்திருக்கிறீர்களே சீதேவி.. உங்களைப் பற்றி தெரிந்து கொள்ள வேண்டுமே… எழுதுங்கள். நூல்களை மொழிபெயர்த்த ஹஜ்ரத் அப்துல் வஹாப் பாக்கவியின் பெயர் ஒரு பிடிஎஃப்-லும் இல்லை; காரணத்தைக் குறிப்பிடுங்கள்.  Public Access கொடுத்தால் எல்லா அன்பர்களும் தரவிறக்கம் செய்யலாம் என்று நினைக்கிறேன். என் வலைப்பக்கத்தில் செய்தியை வெளியிடவா? சொல்லுங்கள்’ என்று கேட்டேன். ‘அல்லாஹுக்காகவும், நமது நாயகம் நபி (ஸல்) அவர்களுக்காகவும் செய்தேன். என்னை அறிய முற்பட வேண்டாம். நீங்கள் அறிந்த உண்மையை பிறரும் அறிவதற்கு உதவுங்கள். அல்லாஹ் நமக்கு போதுமானவன்.’ எனும் சுந்தர பதில் வந்தது. நல்லது, நாயன் தந்த நல்வாய்ப்பை பயன்படுத்திக் கொள்ளுங்கள். நன்றி : Sufi Islam அஹ்லுஸ் சுன்னத் வல் ஜமாஅத் (ஷரியத்,தரீக்கத்)

***

bgnd-11b

ஆன்மா பரிசுத்தபடுத்தும் ஆத்மீக (SUFISM) பாதைகாக்க ஹுஜ்ஜத்துல் இஸ்லாம்‘ ‘இமாம் கஸ்ஸாலி (ரஹ்) அவர்கள் பார்ஸி (PERSIAN) மொழியில் எழுதி முடித்த இஹ்யா உலூமித்தீன்நூல் தமிழில்.

 விதிக்கப்பட்டதும் விலக்கப்பட்டதும்-PART-1.pdf

​​ விதிக்கப்பட்டதும் விலக்கப்பட்டதும்-PART-2.pdf

 திருமணம்.pdf

 நாவி்ன்-விபரீதங்கள்.pdf

 பாவ மன்னிப்பு.pdf

 கோபம் வேண்டாம்.pdf

 ஏகத்துவம்.pdf

​​ பொறுமையாய் இரு.pdf

 உள்ளத்தின் விந்தைகள்.pdf

 இம்மையும்-மறுமையும்.pdf

 சிந்தனையின் சிறப்பு.pdf

​​ உளத்தூய்மை.pdf

 இறையச்சம்.pdf

 இறை நம்பிக்கை.pdf

 இறையன்பு.pdf

 தனிமையின் நன்மைகள்.pdf

 தொழுகையின் இரகசியங்கள்.pdf

 பொருளீட்டும் முறை.pdf

 செல்வமும் வாழ்வும்.pdf

 பயணத்தின் பயன்.pdf

 பொறாமை கொள்ளாதே.pdf

 முகஸ்துதி.pdf

 பெருமை.pdf

 நோன்பின் மாண்பு.pdf

 நல்லெண்ணம்.pdf

 புறம்பேசாதே.pdf

 பதவி மோகம்.pdf

மூன்று வகை முஸ்லிம்கள்!

ரமலான் ஸ்பெஷல்.  எங்கள் ஹஜ்ரத் மர்ஹூம் எஸ். அப்துல் வஹ்ஹாப் பாக்கவி அவர்கள் 1972-ல் எழுதிய ‘ஏகத்துவமும் எதிர்வாதமும்‘ நூலிலிருந்து இந்தப் பதிவு.

ஏகத்துவத்தின் உச்சியில் நின்று விளக்கம் கொடுத்த மார்க்க மேதைகள் மவ்லானா ரூமி, இமாம் கஸ்ஸாலீ, ஜுனைதுல் பக்தாதி, இப்னு அரபி போன்றோரின் எழுத்துக்களைப் படித்து தன் மனத்தில் உருவான உணர்வே இப்படியொரு நூலாக உருவெடுத்தததாக தன் முன்னுரையில் ஹஜ்ரத் குறிப்பிட்டிருக்கிறார்கள். மூன்று படித்தரங்களாகப்  பிரிக்கிறார்கள். இதன்படி, ‘அங்கனெ ஒண்ணு இங்கனெ ஒண்ணு’ சிறுகதை எழுதிய அப்-பாவி நான்,  மட்டமான முதல் படித்தரத்தில் வரலாம் (ஆமாம், ‘முனாஃபிக்’ என்று என்னைத் திட்டி சில மாமேதைகள் மெயில் அனுப்பியிருந்தார்கள்). என் இறைவனே எல்லாம் அறிவான். மற்ற 99 விழுக்காடு பாமர முஸ்லிம்கள் இருக்கிறார்களே… இவர்கள் நடுவிலுள்ள – 2ஆம்- படித்தரத்தில் இருப்பவர்கள் (இந்த படித்தரத்தில் குறைந்தது மூணு லட்சம் உட்பிரிவுகள் இருக்கின்றன. இது விளக்கப்படவில்லை). மூன்றாவதாக வரும் முக்கியமான ஸூபி படித்தரத்திற்கு சதா இறைவனைப் பற்றி குறை கூறும் சீர்காழி தாஜும் , இவரைக் குறை கூறும் ஜாஃபர்நானாவும் வர முயற்சிப்பார்களாக!

‘ஏகத்துவத்தின் படித்தரங்கள்’ உங்கள் சிந்தனைக்கு…

***

haz-qa1

வினா : ஏகத்துவத்திற்கு நீங்கள் படித்தரங்களை உருவாக்குகிறீர்கள் அல்லவா? அவற்றை இப்போது விளக்குவீர்களா?

விடை:……. ‘முனா·பிக்’குகளை (உள்ளொன்று வைத்து புறமொன்று பேசும் வஞ்சகர்கள்) முஸ்லிம்கள் என்று குறிப்பிட முடியாது. என்றாலும் இவர்கள், ‘இறைவன் ஒருவனே. அண்ணலார் அவனுடைய திருத்தூதர்’ என்று வாயளவிலேனும் கூறுவதால், இவர்களை ஆரம்பப் படித்தரத்திலுள்ள ஏகத்துவ வாதிகள் எனலாம். எனினும் இந்தப் பெயரை விடப் பச்சோந்திகள் எனும் பெயர் இவர்களுக்குப் மிகப் பொருத்தமானது. எனவே இவர்களை இத்துடன் நாம் மறந்து விடுவோம்.

அடுத்த படித்தரத்திற்கு வருகிறவர்கள் ஏகத்துவத்தை வாயால் கூறுவதோடு மனத்தாலும் நம்புகிறார்கள். இறைவன் ஒருவன்தான் என்பதிலோ அண்ணலார் இறுதித் தூதர்தான் என்பதிலோ இவர்களுக்குச் சந்தேகம் கிடையாது. இதனை வெளியில் கூறுவதற்கும் இவர்கள் தயங்குவதில்லை. இவர்கள்தான் முஸ்லிம்களில் அதிகம். இமாம் கஸ்ஸாலி குறிப்பிடுவதைப்போல், பாமர முஸ்லிம்கள் அனைவரும் இந்த இனத்தை சேர்ந்தவர்களே.

இவர்கள் திருக்குர்ஆன் ஒளியில் தம் வாழ்க்கையை அமைத்துக் கொண்டிருக்கிறார்கள். பகல் முழுவதும் செயலாற்றுகிறார்கள். ஐங்காலத் தொழுகையில் ஈடுபட்டிருக்கும்போது அவர்களின் மனநிலை எப்படி இருந்தாலும் பள்ளி வாசலிலிருந்து வெளியே வந்ததும் அவர்களில் பலர் இறைவனை மறந்து விடுகிறார்கள்; அவனன்றி அணுவும் அசையாது என்பதை எண்ணிப் பார்க்கத் தவறி விடுகிறார்கள்.

இவர்களை முஸ்லிம்கள் என்று குறிப்பிடுவதில் எந்தத் தவறும் கிடையாது. என்றாலும் இஸ்லாத்தின் கலீஃபாக்கள் அடைந்திருந்த படித்தரத்தை இவர்கள் இன்னும் அடையவில்லை என்று துணிந்து கூறலாம். உலகத்திற்கே வழிகாட்டிய அந்தப் பெருந்தகைகளின் வரலாற்றைப் பார்க்கும்போது நமக்கு ஆச்சரியமாகத்தான் இருக்கிறது. அவர்களின் சொல்லிலும் செயலிலும் ஆழ்ந்த ஏகத்துவம் தெரிந்தது. அவர்கள் இறை வணக்கத்தில் ஈடுபட்டால். உலகிலுள்ள அனைத்தையும் மறந்து விடுவார்கள். இன்னும் சொல்லப் போனால் அவர்கள் நம்மைக் கூட நினைத்துப் பார்ப்பதில்லை.

வினா : இந்த நபித் தோழர்கள் பாமரர்களை விடப் படித்தரத்தில் உயர்ந்து நின்றார்கள் என்பதுதானே உங்கள் கருத்து?

விடை : ஆம். அவர்கள் அடைந்திருந்தது மூன்றாம் படித்தரம்; பாமரர்கள் அடைந்திருந்த படித்தரத்திற்கு முற்றிலும் மாறுபட்டது. காணும் பொருள்கள் அனைத்திலும் அவர்கள் இறைவனின் ஆற்றலைக் கண்டார்கள்.

வினா : தொழுகை முடிந்த பிறகு பாமரர்கள் இறைவனை நினைத்துப் பார்ப்பதில்லை என்று கூறினீர்கள் அல்லவா?

விடை : ஆம். பாமரர்கள் பலர் தொழுகையின்போதுகூட இறைவனை மறந்து விடுகிறார்கள். இஸ்லாமியச் சட்டப்படி குனிந்து நிமிரும் இவர்கள் தம் மனத்தை வேறு ஏதோ ஒன்றில் செலுத்திக் கொண்டிருக்கிறார்கள்.

வினா : இந்த மூன்றாம் படித்தரத்தவர்கள் தொழும்போது மட்டுமின்றி தொழுகை முடிந்த பிறகும் இறைவனை எண்ணிக் கொண்டிருக்கிறார்கள் என்று சொல்கிறீர்களா?

விடை : ஆம்.

வினா : அப்படியானால்  அவர்கள் வேறு எந்த வேலையும் செய்ய வேண்டியதில்லையா?

விடை : உங்கள் வினா என் மனத்தில் ஆச்சரியத்தைத் தோற்றுவிக்கிறது. எப்போதும் இறைவனைப் பற்றியே நினைத்துக்கொண்டிருப்பவர்களால் மற்ற வேலைகளைச் செய்ய முடியாது என்று நினைக்கிறீர்களா? மனிதனின் வேலைகளுக்கு இறைவனைப் பற்றிய எண்ணம் துணை செய்யுமே தவிர , தீங்கு செய்யாது. தவிர, இறைச் சிந்தனையின் ஈடுபட்டிருப்பவர்கள் வேறு எந்த வேலையும் செய்யக் கூடாது என்று எந்தச் சட்டமும் கிடையாது.

இதோ மெய்ஞ்ஞானி ஒருவர் கூறுகிறார்: “ஸூபிகள் மார்க்கத்துக்கு முரண்படாத எல்லா வேலைகளையும் செய்யலாம். அவர்கள் கடைவீதிக்குப் போகலாம்; கடையில் உட்கார்ந்து விற்பனை செய்யலாம். ஆனால், ஒரே ஒரு வினாடி கூட அவர்கள் இறைவனை மறக்கக் கூடாது.”

வினா: ஸூபிகள் என்றால் யார்?

விடை : மேற்குறிப்பிட்ட மூன்றாம் படித்தரத்தவர்களையே நாம் ஸூபிகள் என்று குறிக்கிறோம்.. உலகில் தோன்றிய தோன்றுகிற மெய்ஞ்ஞானிகள் அனைவரும் இந்தப் படித்தரத்தைச் சேர்ந்தவர்களே. ‘அவ்லியா’ எனப்படும் நல்லறிவாளர்கள் அனைவருக்கும் இது சொந்தமான படித்தரம். இமாம் கஸ்ஸாலீ குறிப்பிட்டதுபோல், இது ஆழம் காண முடியாதொரு தலைப்பு. இத்துடன் நிறுத்திக்கொள்வது நல்லது.

***

நன்றி : அன்ஸார் பப்ளிஷர்ஸ்

***

தொடர்புடைய பதிவு :

சென்ற ரமலானில் ஒரு நோன்பாவது பிடித்தவர்கள் இதை வாசிக்கலாம்.  இதை மட்டும் வாசிக்கக் கூடாது!

« Older entries