சூஃபி 1996 – துபாய் டைரிக் குறிப்புகள் (15)

அத்தியாயம் 01 | அத்தியாயம் 02 | அத்தியாயம் 03 அத்தியாயம் 04அத்தியாயம் 05 |  அத்தியாயம் 06அத்தியாயம் 07அத்தியாயம் 08அத்தியாயம் 09 |  அத்தியாயம் 10 | அத்தியாயம் 11 | அத்தியாயம் 12அத்தியாயம் 13 | அத்தியாயம் 14

அத்தியாயம் 15

ஆபிதீன்

*

01.06.1996

இன்னும் மாதத்தின் முதல்நாள் சம்பளம் கொடுக்கிற கம்பெனியாக முக்தார் அப்பாஸ் இருக்கிறது. சந்தோஷம்தான். ஆனால் முதல்நாளே எல்லாவற்றையும் இழந்துவிட்டு கடனாளியாக இருப்பதற்கு ஒரு similarity இருக்கிறதா? இருக்கிறது. மஸ்தான் மரைக்கான் போட்ட கறி இல்லாத தாழிச்சாவுக்கு (தொழில்திறமை அதிகமாவதில் , அவன் கூடிய சீக்கிரம் தாழிச்சா இல்லாமலேயே தாழிச்சா போடுவான்!) இரவில் ஒரு தந்துரொட்டி , ஒரு வாழைப்பழம் போதும் என்று நினைத்துவிட்டு இரவில் இரண்டு தந்துரொட்டியையும் இரண்டு வாழைப்பழத்தையும் சாப்பிட்டதைச் சொல்லலாம்.

*

02.06.1996

இன்று காலை கண்ணுவாப்பா ஃபோன் செய்து மறுபடியும் ஊரில் கலவரநிலை என்று சொன்னான். கடற்கரைக்குப் போன ‘நம்’ பெண்களைக் கிண்டல்செய்த ஒரு செம்படவ இனத்தைச் சார்ந்த இளைஞனை ‘நம்’ பையன்கள் கொன்று விட்டார்களாம். இதன்படி பார்த்தால் தர்ஹா மார்க்கெட்டில் தினம் வாங்கும் கிண்டல்களுக்கு தினம் பத்து ‘நம்’ பையன்களை கொன்றுபோட வேண்டும் அவர்கள். ஊரில் அமைதிக் குழுவினர் செயல்பட ஆரம்பித்துவிட்டார்களோ? ஆனால் அதென்னமோ ஊரில் நடக்கிற இனக்கலவரத்திற்காக பாதிக்கப்படும் முஸ்லீம்களுக்கு உதவ , பெரியமனசு பண்ணி துபாயிலுள்ள நாக்கூர் ஜமாஅத் தன் உள்சண்டைகளையெல்லாம் ஒரு நொடி ஒதுக்கிவிட்டு பணம் வசூல் பண்ண ஆரம்பிக்கும்போதுதான் இப்படி நடக்கிறது! ‘நம்ம பையன்’ M.L.Aவா வந்த சமயத்துல இப்படிலாம் நடக்க ஆரம்பிச்சா அவன் பேரு கெடுமே’ என்று மொம்மதுகாக்காவுக்கு வருத்தம். எனக்கோ பிள்ளைகளை நினைத்து கவலை. கோபம் கொண்டால் மீனவர்கள் சுலபமாக ஏறக்கூடிய சியாந்தெருவில் – ரயிலடிக்கு அருகாமையில் உள்ள வினித் நர்ஸரி ஸ்கூலில் – அஸ்ரா படிக்கிறாள். நாளை ஸ்கூல் திறக்கிறார்கள். அனீஸைக்கூட இந்த வருடம் சேர்த்துவிடலாமென்று அவன்தான் துடியாக இருக்கிறானே…இவன் பேசுகிற பேச்சில் ஸ்கூலில் மதக்கலவரம் நடக்காமல் இருக்க வேண்டும்! ‘ஒரே சலவாத்துதான் போங்க’ என்று உம்மாக்காரி செல்லமாக அலுத்துக்கொள்கிறாள். நானிருக்கும்போது கூட இரண்டு முறை அந்த மூன்றெழுத்து ‘புனித’ வார்த்தையை சொன்னான் அவன். நான் அதட்டல் போட்டதில் அடங்கியிருந்தது. ஒருமுறை ஏதோ கோபத்தில் ‘பு’ என்று ஆரம்பித்தான். நான் ஒரு பார்வை பார்க்கவே ‘பு…ட்டி’ என்று சமத்காரமாக முடித்தான்! கேட்டுக்கொண்டிருந்த அஸ்ரா , ‘அதை’ சொல்ல வந்தான், அப்படியே மாத்திட்டான்!’ என்று தம்பியின் சமாளிப்பில் சந்தோஷப்பட்டுக் கொண்டாள். அவள் ‘அதை’யெல்லாம் சொல்லமாட்டாள். பிள்ளைகள் ‘அதை’க்கூட சொல்லலாம் தப்பில்லை. ‘மாவு’ என்று ஒரு ஹிந்து மதத்தைச் சார்ந்தவரை சொல்லாமலிருக்கும் பக்குவம் வரவேண்டும். நாக்கூரில் இது நடக்கிற காரியமா? இப்போது ‘பவுடர்’ என்று சொல்கிறார்களாம் பஜாரின் மொட்டைத் தலைகள். கலவரம்!

*

20-27.10.95 கேஸட்:

‘தீர்ந்த குரல்’ண்டா என்னா? பொரிச்ச சட்டிலே போட்டு வறுத்த குரலா?’ – ‘S’

‘சரியான பேச்சு’ – ரவூஃப். M.A. Eng. Litt.

‘தேவையில்லாத பேச்சு..! பேசுனா ஆணி தெறிச்ச மாதிரி, உப்பு போட்ட மாதிரி பேசப் படிச்சிக்கிட்டோமுண்டா சொன்னதுலாம் பலிக்க ஆரம்பிக்கும்’

*

‘Ascimilating Forceங்குறது overhaul பண்ணுறமாதிரி. Thought Forceங்கிறது Overhaul பண்ணுனபிறகு எப்படி பிராக்டிஸ்லெ கொண்டுவரனும்ங்கிறது. Thought forceங்கிறது Action. செயல். தெய்வத்தன்மை கலந்தது. Ascimilating force – humanதான். பயிற்சி பண்ணப்பண்ண, Ascimilating force இல்லாமலேயே thought force வர ஆரம்பிக்கிம். ஆனா, வரனும்டு எதிர்பார்க்காதீங்க. படிப்படியாத்தான் மேலே போவனும். ஆனா ஒரு ஆளு தூக்கி உங்களை ஒண்ணுலேர்ந்து நாலாவது படிலெ வச்சா? அதே மாதிரி!’ – ‘S’

*

Quick Decision :

‘Quick Decision எடுக்குறதனாலே வர்ற நஷ்டத்தைவிட எடுக்காம குழம்பிக்கிட்டு நிக்கிறது முட்டாள்தனம்ங்குறேன். சக்தி விரயம். Quick Decision எடுத்து முட்டிக்கிறதை விட எடுக்காம நிண்டுக்கிட்டிக்கிறது மட்டம் , Mental வீக்னஸ்அது’ – ‘S’

*

‘ஒரு பொருள் கொடுத்தா , அவன் (உங்க) கிட்டெ வரைக்கிம் கையே நீட்டாதே. வந்து நீட்டுனா ‘டக்’குண்டு புடிச்சிடனும். நீட்டிப்புட்டு நவந்துட்டாண்டா பாய்ஞ்சி போயி குரல்வளையை கடிங்க, கொரம்புங்க!’ – ‘S’

*

எதிரில் வந்து நின்று நம்மை ஏதாவது கேட்கச் சொல்லும் இறைவனிடம் இப்படிக்கூட கேட்கலாமாம். ஒரே மூச்சு! ‘பணம்காசுஆரோக்கியத்துடன் குடும்பமகிழ்ச்சியுடன் சமுதாயசெல்வாக்குடன் டாக்டர்செலவில்லாத சூழ்நிலையுடன்கூடிய வாழ்க்கையைக்கொடு’!.

‘இதல்லாம் அல்லாஹ்வுக்கு புரியாது. அவன் பெரிய கள்ளன். ‘மக்ரன் வ மக்ரன் குப்பாரா வல்லாஹூ கைரில் மஹக்கிரி! – இவன்லாம் இடக்கு பண்ணுறானுவ, அல்லாஹூத்தஆலா பெரிய மக்ரூஹ்க்காரண்டு (சூழ்ச்சி செய்பவன்) ஆயத்து இக்கிது!’ – ‘S’

*

‘SS’ல் ‘கில்லா’ கொடுத்த நோக்கம்:

‘உங்கள்ட்டெ திரள்ற சக்தி, that means, நீங்க நீக்குற அழுக்கு நீங்கி நெருப்பு பிரகாசிக்கும்போது மத்த தீயசக்திகள் அதை கெடுத்துடக் கூடாது.. Psychic self defence..’

*

‘வெளியேலேர்ந்து வர்ற vibration நம்மளை அட்டாக் பண்ணாம இக்கிறதுக்கு நாம் நம்ம பெர்ஸனல் லைஃப்லெ ஒரு லட்சியத்தொட வளரனும். இப்ப நேரா பார்த்து , கரெக்டா பேசுற வரைக்கிம் நம்மளை ஒண்ணும் பாதிக்காது. அலைபாய்ஞ்சிக்கிட்டு பார்த்தா எந்த செய்தியும் நெஞ்சில் பூர blankஆ வச்சிட்டீங்கண்டு அர்த்தம்’.

சர்க்கார், மதம் கொண்ட யானைய கண்ட்ரோல் பண்ணும் வழியைச் சொன்னார்கள்: ‘ ரொம்ப சிம்பிள். ஆனா ‘தில்’ இருக்கனும்’ – ‘S’.

அசப்பில் அரபிகளை கண்ட்ரோல் பண்ணும் வழிமாதிரிதான் இருந்தது!

*

‘அமெரிக்காவுல உள்ள வைப்ரேசனும் அடுத்தவீட்டு வைப்ரேசனும் equalதான். ஒரே velocityதான். ஒரே strengthதான். ஒரே intensityதான். ஒரே powerதான் இத செஞ்சிப்பாருங்க.. அமெரிக்காவுல உள்ள உங்க கூட்டாளிட்டேர்ந்து ஏன் லெட்டர் வரலேண்டு நினைங்க, வுட்டுடுங்க. நெனைச்சிக்கிட்டே இருக்கக்கூடாது. லெட்டர் வரும். அவன் எப்ப எழுதுனாண்டு பாருங்க. நீங்க நெனச்ச அதே நேரம்தான். லெட்டர் வரலேண்டா ஃபோன்’

‘ஏன் வுட்டுடனும்டு சொல்றீங்க?’ – ரவூஃப்’

‘நம்மை நெகடிவா நெனைச்சி நெனைச்சி பழக்கப்பட்டிருக்கிறோம். நெனைச்சி நெனைச்சி தோத்துப் போயிருக்கிறோம். இந்த தோல்வி மனப்பான்மை powerஐ கெடுக்கும். இது முக்கியமான பாயிண்ட். குறிச்சி வச்சுக்குங்க’ – ‘S’

*

‘SS’ன் கில்லா :

‘வரக்கூடிய நெகடிவ் ஃபோர்ஸை அந்தக் ‘கில்லா’வே கண்ட்ரோல் பண்ணிடும். our heart is open only to the positive thoughts. only to the positive vibrations. எவ்வளவு ரிலாக்ஸ்டா இக்கிறீங்களோ அவ்வளவு பவர்ஃபுல்லா இருப்பீங்க’

*

‘ஒரு மெழுகுவர்த்தி எரியிற நேரத்துக்குள்ளே அல்லாஹ்வை பாக்கலாம். அர்த்தம் என்னா? உங்களைப் பார்க்கலாம். ‘ஃபிக்ரு க ஃபீக யக் ஃபிக்’ (உன்னை உற்றுப்பார்; அது உனக்குப் போதும்) அல்லா மலை உச்சியிலே இக்கிறான், காட்டுலெ இக்கிறாங்குறதுலாம் பொய். எங்கும் இருக்கிறான். அப்ப இங்கேயும் இக்கிறான்லெ? முதல்லெ இங்கெ உள்ளவனை பாருங்கனி! க்வாஜா பந்தே நவாஸ் சொன்னாங்க, ‘நான் எங்கெங்கேயோ தேடிப்பார்த்தேன். ஆனா பெரிய வேடிக்கை என்னா, எங்கே நெருக்கமா தெளிவா இருக்கானோ அதை வுட்டுப்புட்டு எங்கெல்லாம் மறைவா இருக்கானோ அங்கே தேடியலைஞ்சேன்!.. சுட்ட சட்டி சட்டுவம் கறிச்சுவை
அறியுமோ?!’ – ‘S’

**

03.06.1996

என்னுடைய பயிற்சியில் ஏதோ குறைபாடு இருக்கிறது. அவசரம், கவனமின்மை இருக்கிறது. ஜெப்பார்நானாவிடம் வாங்கிவந்த கேஸட்டை ரிகார்ட் பண்ணி வைத்துக்கொண்டால் உடனே ஜெப்பார்நானாவுக்கு திருப்பிக்கொடுத்த மாதிரி இருக்குமே என்று மஸ்தான் மரைக்கானின் டபுள் கேஸட் ரிகார்டரில் பதிவு பண்ண பகல் எடுத்துப் போனேன். ‘மச்சி மார்கெட்’டைத் தாண்டி டிரைவர் வண்டியை இலேசாக நிறுத்துவான் , நான் இறங்க வசதியாக. பறக்கும் கார்கள் உள்ள சாலை அது. அவசரமாக இறங்கியபோதுதான் தெரிந்தது, கேஸட்கள் வண்டியில். அடுத்து இறங்க வேண்டிய கப்பமரைக்கார் அல்லது மொம்மது காக்காவின் கையில் கேஸட்கள் போய்விட்டால் என்ன செய்வது என்ற கவலையில் சாப்பாடே செல்லவில்லை.. மாலையில் பத்திரமாக டிரைவர் கேஸட்களை கொடுத்தபிறகுதான் நிம்மதி. சர்க்கார் ‘புஷ்து’ மொழியில் பேசியிருந்தால் அவன் கொடுத்திருக்க மாட்டான்! அடுத்த மாலை ஒரு JVஐ தவறாக நான் போஸ்ட் செய்து விட்டேன் என்று மொயீன்சாஹிப் சொன்னார். ஹாஷிம்முக்தாருக்கு க்ரெடிட் கொடுப்பதற்குப் பதிலாக ஹசன்முக்தாருக்கு கொடுத்துவிட்டாய் என்றார். நிவர்த்தி பண்ண நான் மறு எண்ட்ரி போடுகையில் ரிவர்ஸ் பண்ண மறுபடியும் ஹசனுக்கே க்ரெடிட் கொடுத்தேன். முகம் சுளிக்காமல் நோன்பின் ஜக்காத் கொடுக்கும் முதலாளி என்பதாலோ என்னவோ. முந்தையாவது பரவாயில்லை. இது ‘ஜம்’ நேரம்! ஆபிதீன், நீ திருந்த மாட்டாயா? திருந்த வேண்டும். திருந்தியே ஆகவேண்டும். திருந்த இயலும். திருந்துபவன் ஆபிதீனாக இருக்கக் கடவது!

‘ஜம்’ நீங்கள்லாம் பெர்ஃபெக்டா செய்ய ஒரு வழி இக்கிது. அந்த மூணு மணி நேரமும் தூங்கிடுங்க!’ – சர்க்காரின் கிண்டல்.

*

27-10 to 10.11.95 கேஸட் :

‘சக்தி அதிகமாகும்போது கை கால்கள்லெ அசைவுகள் வருது. இத குறிச்சிக்குங்க. சக்தி, வெளிலே போற பாதை தெரியாம கைகால்கள் மூலமா, கண்ணசைவு மூலமா, பேச்சு மூலமா வெளியே வருது. நமக்கே தெரியாம unconscious, subconscious levelக்கு என்னென்னமோ மெஸ்ஸேஜ் வருது. அதை வெளிலெ காட்டத் தெரியாம சொறியிறது மூலமா, அடிக்கிறது மூலமா, கிண்டல் பண்ணுறது மூலமா வெளிவருது. இப்படி வெளிவர்றதை கண்ட்ரோல் பண்ணி செய்யாம இருந்தா என்னா வரும்?’ – ‘S’

‘அந்த பவர் உள்ளேயே பொய்டும்’ – ரஃவூப். ‘சக்தி அதிகமாவும்’ – இன்னொருவர்.

‘சரிதான் நீங்க சொல்றது. ஆனா நான் எதிர்பார்க்கிற பதில் அல்ல. இப்படி அடக்குன உடனேயே , மூச்சோட்டம் முதல்லெ கண்ட்ரோல் ஆவும். அதோட frequency மாறும். அதாவது , ஞானிகள் தியானம் பண்ணும்போது என்ன மூச்சு வுட்டாங்களோ அது வரும். கொஞ்சநேரம் மனசில வரும் எண்ணங்களை தட்டிவிட்டுக்கொண்டே இருந்தா நாம நினைச்ச மாதிரி நாம் அல்ல. நாம பவர்ஃபுல்ண்டு தெரியும். சும்மா உக்காந்திருங்க அப்படியே. 20 minutes. அப்புறம் உங்க முகத்தை பாருங்க. பெர்ஸனாலிடியே வேற ஆளாத் தெரியும். இந்த மனப்பான்மைய நிலைப்படுத்துறது எப்படி? ஒரு நாளைக்கி 5 நிமிஷம் வந்துட்டுப்போயிட்டா? 24 hours வரணும். இதோட குழந்தையக் கொஞ்சனும், ‘கும்பலமாசி’ திங்கனும், பிசினஸ் பண்ணனும், ஃபுட்பால் ஆடனும். திரண்டு வெளிவர முயற்சி பண்ணுற சக்தி பூரா அப்படியே திரும்பி கீழே போயி, உங்க லைஃப்லெ எதனாலெ டென்சன் வந்திச்சோ , அதைமுறியடிக்க என்னா வேணுமோ, அது mindலெ வர ஆரம்பிக்கிம். இப்ப கையில வர்ற டென்சன் – இது consious levelதான் இருந்தாலும் – subconsious memoryலெயும் வருது. ரெண்டும் சேர்ந்து unconscousக்கு பொய்டும். அல்லாட வீடு அது. அல்லாமியான் அங்கேதான் இக்கிறாரு! அவர் ஆர்டர் கொடுப்பாரு. அதனாலெ , அசைவு தேவையில்லாம வரப்புடாது. கையை காலை காட்டித்தான் emphasis பண்ணி புரியவைக்க முடியும்டா அந்த அளவு மட்டும் காட்டுங்க’

‘எப்படி அந்த statusஐ கண்டினியூ பண்ணுறது?’ – ரவூஃப்

‘ஒண்ணும் செய்ய வாணாம். செயலைக் குறை; பார்வையைக் குறை; பேச்சைக் குறை. ஒண்ணும் செய்ய வாணாம். குறை! அவ்வளவுதான்!’ – ‘S’

*

‘வாழ்க்கை என்பது மேடு பள்ளம்தான்’டு சொல்றது பள்ளத்துலெ வுளுந்தவன் பேசுற பேச்சு. டிரங்க் ரோட்ல போவாதவன் பேசுற பேச்சு. பள்ளமில்லாம வாழலாம். ஆனா பள்ளத்துல வுழுந்த ஆளை நக்கல் பண்ணாதீங்க. பண்ணுனீங்க…நீங்க கீழே பொய்டுவீங்க! இது பட்டத்து தாள் மாதிரி. ரொம்ப delicate..’ – ‘S’

*

‘இப்ப நாம ஓதுறதையெல்லாம் வுட்டு மேலே போய்க்கிட்டிக்கிறோம். சொன்னாவே பலிக்கிற நிலைக்கி வளர்ந்துக்கிட்டிக்கிறோம். தீர்ந்த எண்ணம் வந்துட்டா நெனைச்சதை அடைய முடியும். அதுக்காக நெனைச்ச உடனே வாழைப்பழம் வாங்கிடலாம். பென்ஸ் கார் வாங்க முடியாதுல்லே? கொத்துப்புராட்டா வாங்கிட்டோம், கார் வாங்க முடியலேண்டு துப்பாக்கியை கீழே போட்டுடாதீங்க. கொஞ்சம் ஃபோகஸ் தேவை. ஒவ்வொண்ணா உடைய ஆரம்பிக்கிம். அப்படி வரும்போது ‘ பணமா?’ ‘நத்திங்’ண்டு தெரிய ஆரம்பிக்கிம். ஆனா அப்ப ரியாலத்தை உட்டுடாதீங்க’ – ‘S’. (கடன் தொல்லை தீர)

*

‘வெளிக்கி முக்கிக்கிட்டு இக்கிறீங்க, பீ மாட்டிக்கிட்டு இக்கிது, ஆனா அரைவாசி உள்ளே இக்கிது. எவ்வளவு நீளத்துலெ இக்கிதுண்டு தெரியாது.. நெட்டையனா குட்டையனாண்டு தெரியாது. ஆட்டம்புழுக்கை மாதிரி வருமா இல்லே கரண்டி போட்டு நோண்டனுமாண்டு தெரியாது.. இந்த அளஹான நேரத்துலே ஒரு ‘செண்ட்’ வாசம் அடிக்கிதுண்டு வச்சிக்குங்க. இதெ ‘செண்ட்’ஐ நீங்க ‘புர்தாஷரீஃப்’லெ போட்டிருக்கீங்க. நீங்க அடுத்ததடவை ‘புர்தாஷரீஃப்’லெ உட்காரும்போது முக்குன பீயும் ஞாபகம் வரும்! நம்புறீங்களா இல்லையா? என்னா பாயிண்ட்டு? நீங்க ஒரு குறிப்பிட்டு postureலெ உட்கார்ந்து , குறிப்பிட்டு பாசிடிவ் or நெகடிவ் நெனைப்பை நெனைச்சிட்டீங்கண்டா , அப்படி உட்காரும்போதெல்லாம் அந்த நெனைப்பு வரும். ஒரு குறிப்பிட்ட மோதிரத்தைப் போட்டு , குறிப்பிட்ட மாதிரி மனசை வச்சிட்டீங்கண்டு சொன்னா , அந்த மோதிரம் போடும்போதெல்லாம் அந்த மனசு வரும். ஒரு குறிப்பிட்ட சேர்லெ உட்கார்ந்து , குறிப்பிட்ட எண்ணம் வச்சீங்கண்டு சொன்னா , அந்த சேர்லெ உட்காரும்போதெல்லாம் அந்த எண்ணம் வரும். ஆனா வேற ஆளு உட்காரக்கூடாது. இப்ப உங்களுக்கு தெரியும்டு நெனைக்கிறேன், என் சீப்பர்-ஐ யாரும் தொடக்கூடாதுண்டு சொல்றதுக்கும், என் குவளையிலே யாரும் குடிக்கக்கூடாதுண்டு சொல்றதுக்கும் காரணம் புரியும்டு நெனைக்கிறேன். இது காரணங்களில் ஒன்னுதான்’ – ‘S’

சர்க்காரின் பேச்சு மாவு கலந்து, பீ கலந்த, அத்தர் கலந்த பனியான் ! ‘ஜம்’மில் உட்காரும் posture , மத்த காலங்களில் வரக்கூடாது என்று சொல்லும்/சுடும் இந்தக் கலவையில் 999% கூட குறைக்க முடியாது. குறைப்பவர்கள் பீயே பேலாதவர்கள். எனவே இந்த வாழ்க்கைக்கும் அவர்களுக்கும் சம்பந்தமில்லை.

*

”உலகே மாயம்’, ‘விதி’, ‘சந்தர்ப்பமும் சூழ்நிலையும் சதிசெய்துவிட்டன’ – இதெல்லாம் பண்டிஹராம், பச்சை ஹராம்’ – ‘S’

*

‘ஜம் சமயத்தில் சோப்பு போடுவது (குளிக்கக்கூட செய்யலாம்!) :

‘சோப்பு போடும்போது உணர்ந்து செய்யிங்க – செயல் அதிகமா செய்ய வேண்டி இருக்குண்டா . ‘சோப்பு போடுறோம்’டு சொல்லி – நினைச்சிக்கிட்டு – செய்யிங்க’ – ‘S’

*

‘எஜமான்ற ‘இஸ்மு’ ஒண்ணு இக்கிது.. ‘யா ஹக் யா முபீன்’. நாங்க பண்ற எந்த ‘திக்ரு’வையும் விட இந்த ‘திக்ரு’ பண்ணும்போது ஒரு மாதிரியான affinity. afinityண்டா என்னா? ஒரு ஆளுக்கும் ஒரு ஆளுக்கும் ஏற்படுறது. எனக்கும் அந்த ‘திக்ரு’க்கும் ஏற்படுறது. நம்ம செட் புள்ளைங்களுக்கும் அந்த ‘திக்ரு’க்கும் ஏற்படுறது. இல்லே.., ‘திக்ரு’வோடமூலகர்த்தா யாருக்கோ அவங்களுக்கு ஏற்படுறது’ – ‘S’

*

‘உயிர் இல்லாத ஒரு கல் கூட கிடையாது. கல் அணுக்கள்தானே? அணுவோடு அணு சிதைஞ்சி போகாம சேத்துப் பிடிச்சிக்கிட்டிக்கிதுலெ? ஏன் இதுக்கு உயிர் இருக்குண்டு சொல்லக்கூடாது? ரூஹ் இஸ்மானி, ரூஹ் நபாத்தி, ரூஹ் ஹைவானி, ரூஹ் இன்ஸானி..

ரூஹ் இஸ்மானி: ஜடங்களுக்கு உள்ள உயிர். வெற்று ஜடங்கள்.  ரூஹ் நபாத்தி : வளர்ச்சி இருக்கும். sense இருக்காது. தொட்டாச்சுருங்கி exception. ரூஹ் ஹைவானி : பேசாது. வளரும். இஷ்டப்படி இயங்கும். மிருகம்; ரூஹ் இன்ஸானி- நம்ம உயிர். இதுக்கு 6 சென்ஸ் இல்லாம இன்னொன்னு ஸ்பெஷல் – அந்த ஆறையும் அளக்க – இக்கிது. இதுக்கு மூன்றாம் கண் அப்படீண்டு சொல்றதுண்டு. ESP..’ – ‘S’

**

04.06.1996

நேற்று நானாக அலையாமல் பெரிய வேலை ஒன்று கைக்கு வந்தது. புகழ்பெற்ற ஜூவல்லரிக்காரர்கள். அவர்களின் கம்பெனிக்கு சீஃப் அக்கவுண்டண்டாக இருக்கக் கூப்பிட்டார்கள். முக்தார் அப்பாஸின் கவலைக்கிடமான நிலையைக் கருதி தம்பி ஹலால்தீனிடம் ஒரு பயோடேட்டா கொடுத்து வைத்திருந்தேன். அதன் மூலமாக அந்த வாய்ப்பு. அக்கவுண்டன்ஸி தெரிந்து கொண்டாகிவிட்டது. ஆனால் அக்கவுண்டண்டாக அத்தனை பெரிய கம்பெனியில் – இந்த போஸ்டில் எந்த அனுபவமும் இல்லாமல் – இருக்க இயலுமா என்ற ஐயத்தில் மறுக்க வேண்டியதாகி விட்டது. பெரும் பெரும் கம்பெனிகளில் , கரிக்கோடு போடுபவர்கள்தான் அக்கவுண்டண்டாக இருக்கிறார்கள் என்று தெரிந்தாலும் அவர்களுக்கு அக்கண்டன்ஸியை விட வேறு ‘கணக்குகள்’ கை வந்த கலை. இந்த வாழ்க்கைக் கணக்கின் ஃ·பார்முலா புரியாமலோ அல்லது சுலபமாக மாற முடியாத விசா பிரச்சனைகளாலோ அல்லது என பயத்தாலோ இந்த மறுப்பு. அந்த கம்பெனி தப்பித்தது! நான் பொருளாதார பலத்தை , வேலைக்கான தகுதியை , அதிகப்படுத்திக்கொண்டு அடைய வேண்டும் என்று எண்ணுகிறேன். பெரிய பெரிய சி.ஏக்கள் , கையெழுத்து போடத்தெரியாத அரபிக் கம்பெனியில் குப்பைக் கொட்டுவதைப் பார்த்தால் நாயும் பிழைக்கும் இந்தப் பிழைப்பு என்று சொல்லத் தோன்றுகிறது. நான் ஒரு ப்ரோக்ராமர். நான் ஒரு அக்கவுண்டண்ட். நான் ஒரு சேல்ஸ் எக்ஸ்க்யூடிவ்.. நான் ஒரு டீச்சர். நான் ஒரு முதலாளி.. நான் யாரோ , ஆனால் முன்புபோல் வாய்ப்புகள் வராமலிருந்த ஆபிதீன் அல்ல. கொஞ்சம் ஃபோகஸ். போதும்! மாறிவிடலாம். ஆனால் மாறுதல் எப்போது வரும்? when you are ready for a thing it is sure to achieve.. You can surely achieve it – ‘S’. வரும், அது ரியாலத்திற்கு இடைஞ்சல் தராத ஒன்றாக இருக்க வேண்டும். வா!

*

06.06.1996

இன்று காலை ஒரு கனவு. எனக்கும் அலிமுக்தாருக்கும் தகராறு – தங்கும் இடம் சம்பந்தமாக. நான் 3 மாதத்தில் வேலையைவிட்டு போய்க் கொள்கிறேன் என்று கறாராகச் சொல்லிவிட்டேன். கனவில்தான் சொல்லலாமே! ஆனால் எதனாலோ மனது இன்று குழப்பமாக இருக்கிறது. அரைநாள் ஓய்வு எடுத்துக்கொண்டால் என்ன என்று கேட்கிறது. ஆஃபீஸுக்கு நாமாக விடுமுறை போட்டு இரண்டு வருடத்திற்கு மேலாகிறது. பேசாமல் சர்க்கார் கேஸட்டைக் கேட்டுக்கொண்டு ரிலாக்ஸ்டாக ஆக படுத்திருப்போம் என்று மேலேபோய் , கப்பமரைக்கார் மேசையில் ‘இன்று தலைவலி’ என்று எழுதிவைத்துவிட்டு வந்து ஹைட்ஃபோனை காதில் வைத்தேன். கார் வந்து நிற்கும் சத்தம். மொயீன்சாஹிப் கதவைத் தட்டினார். ‘ஆபிதீன், ஆஃபீஸ் சாவியைத் தருகிறாயா?’ அவரிடம் சாவி உண்டு. ஆனால் காரில் இருக்கும். கார் எங்கே இருக்கிறது? ஒரு அடி தூரத்தில் இருக்கிறது. தினமும் மறப்பது ஒரு கலை! நான் இன்று காலை வரவில்லை என்று சொன்னேன். ‘ஏன்?’ ‘தலைவலி.’. அவர் சாப்பாட்டுப் பிரியர். ‘முப்பது நாப்பது மாத்திரையைப் போடு, சரியாகி விடும்!’ என்றார். மாத்திரையா? அவரது BPயும் மற்ற நோய்களும் இலேசில் குணமாகாத காரணம் மாத்திரைகளின் எண்ணிக்கைதான். அந்த நோய்களும் கூட ஒன்றும் இல்லாதபோது அவர் போட்ட மாத்திரைகளின் காரணமாக வந்தவையாக இருக்கும். ஒன்றுக்காக இன்னொன்று. சர்க்காருக்காக நாமா? நமக்காக சர்க்காரா? ஒரு கேஸட்டில் சொல்வார்கள் : ‘நீங்க பன்ற பயிற்சியால யாருக்கு நன்மை? எனக்குத்தான் நன்மை. ஆனால் எனக்கு அப்படி நன்மை கிடைக்கிம்போது உங்களுக்கும் நீங்க நெனைச்சுப்பார்க்க முடியாத நன்மைகள் கிடைக்கும்’ என்று.

**

‘வெறும் பிராக்டிஸ்லெ ஆபத்து இக்கிது (துப்பாக்கி பற்றி அறியாமல் துப்பாக்கி வைத்திருப்பது). Instructionலெதான் safety இக்கிது. அப்ப அதும் வேணும், இதும் வேணும். பத்தாதுக்கு , இத சொல்லச் சொல்லத்தான் stimulation கிடைக்கிம்’ – ‘S’

*

‘நான் சொன்னேன் , ‘டென்சனைக் குறைங்க, Mindஐ ரிலாக்ஸ் பண்ணுங்க’ண்டு. ஏன் தெரியுமா? டென்சனான பிரச்சனையை சமாளிக்கிறதுக்கு டென்சன் தேவை. அதுக்கு தெம்பு வேணுமுலெ? தெருவுலெ போற ஒவ்வொரு பொருளையும் டென்சனோடு பார்த்து சக்தியை செலவு பண்ணிக்கிட்டே இந்தோம்டா கடைசில ஒண்ணும் (தெம்பு) இருக்காது. தேவையில்லாம சிரிச்சா தேவைக்கு சிரிக்க முடியாது. தேவையில்லாம செலவு செஞ்சா தேவைக்கு காசிருக்காது. அதனாலே நிறைய ஃபோர்ஸை சேர்த்துக்கிட்டே இரிங்க. தேவைப்படும்போது தனக்குத்தானா ‘டக்’ ‘டக்’குண்டு முடியும்’ – ‘S’
*

‘உனக்கு வேண்டியதை அடையிறதுலே யாருக்கும் தொல்லை கிடையாது. உனக்கு எது வேணுமோ அதே பொருள் இவருக்கும் வேணும்டா இவரும் ஃபோகஸ் பண்ணுவாருலெ? பம்பாய் மிட்டாய் வாங்க ஆசைப்படுறா.. ஒரு உருண்டைதான் இக்கிது. அதே நேரத்துலே ஒரு பொடியனும் ஆசைப்படுறான். இவனாலே அவன் அம்மா, அப்பா, அண்ணன், தம்பி சேர்ந்து ஆசைப்படுறாங்க. இப்ப நீ சிங்கிள் மேன். உன் ஃபோர்ஸை விட அவங்களுக்கு ஃபோர்ஸ் அதிகம் இப்ப. அவனுக்குத்தான் கெடைக்கிம்! அதனாலே ஐயோ, பம்பாய் மிட்டாய் வாங்க முடியலேங்கிற கவலைப்படனும்டு அவசியம் இல்லே’ – ‘S’
*

‘லைஃப்லெ Aim தெரியாத காரணத்துனாலே , Aimஐ உண்டாக்குற சக்தியை வளர்த்துக்கிட்டா போதும். Aim தானா ஃபார்ம் ஆயிடும்’ – ‘S’

*

‘Quick decision (20 seconds..) எடுக்கும்போது தப்பாக்கூட பொய்டலாம். அதனாலே வருத்தப்பட வேண்டிய அவசியம் இல்லே. ரைட்டா போனதுனாலே சந்தோஷப்பட வேண்டிய அவசியம் இல்லே. Quickஆ decision எடுக்குறான் இவண்டு unconscious உணரனும். இவனுக்கு quickஆ ரிப்ளை கொடுக்கனும்டு பதில் கொடுக்க ஆரம்பிச்சிடும். அது ஒரு பெரிய ப்ராஸஸ் வேலை செய்யுதுப்பா அங்கே.. தீர்மானிச்சபிறகு மறுபடி அது பத்தி சிந்திக்கக்கூடாது. அப்படி சிந்திச்சீங்க, யோசனை பண்ணிக்கிட்டே இருக்க வேண்டியதுதான்..’ – ‘S’

*

எழுதிக்கொண்டிருக்கும்போது மறுபடி கதவு தட்டப்பட்டது. இது மொயீன்சாஹிப் அல்ல என்று தெரிந்தது. அல்லதான். மொம்மது காக்கா வந்தார். ‘என்னா தம்பி, உடம்பு என்னா பண்ணுது’ என்று. செருப்போடு அறைக்குள் வந்தார். வந்தவர் , சர்க்காரின் ஓவியத்தைப் பார்த்து உடன் ஏதோ தப்பு பண்ணிவிட்ட குழந்தை மாதிரி வாசலில் செருப்பைக் கழட்டிவிட்டு மறுபடி வந்து உட்கார்ந்தது வேடிக்கையாக இருந்தது. இத்தனைக்கும் அவருக்கு சர்க்காரைப் பிடிக்காது!

*

‘What is life? It is what you make’ – ‘S’

*

‘(கும்பலுள்ள) ‘மனாராடி’ பக்கம் உட்காரக்கூடாது. டீ குடிக்கக்கூடாது, பசியாறக்கூடாது. அப்படி இருந்து பாருங்க. அங்கே பசியாறுனதாலே என்னா நஷ்டம் வந்திச்சிண்டு உங்களுக்கு புரிய ஆரம்பிக்கிம். அதுக்காக மத்தவங்களை இளக்காரமா நெனைக்கச் சொல்லலே. நீங்க உட்காரக்கூடாது அங்கே. டீ வாங்கிக்கிட்டு இங்கே வந்துடுங்க’ – ‘S’

துபாய்க்கு ‘மனாரடி’ எது? தமிழர்கள் கூடும் சிக்கத்-அல்-ஹைல் ரோடு. முக்கியமாக சிங்கப்பூர் சாமான்கள் விற்கிற எவர்பிரைட், டிரஸ்வெல் இத்தியாதி… கலாச்சாரம் காப்பாற்ற கைலி வேறு, அதுவும் வழித்துக்கொண்டு. அப்போதான் டி.வி பார்க்க வசதியாக இருக்கிறதாம்! வெள்ளிக்கிழமை மாலையில் அங்கு போய் நின்றால் ஆஸ்திரேலியா ஆடுகளை அடைத்துவரும் பெரும் பெரும் அடுக்கு டிரக்குகள் 500 நிற்பதுபோல தோற்றம். அதே நாற்றம்..

*

‘பணம் வேணும், டெஃபனட்டா வேணும். ஆனா அது தானா வரணும். அப்ப அதெ வாங்க ரெடியா இருக்கனும். when you are ready for a thing it is sure to happen. இது நூத்துக்கு நூறு உண்மை – ‘S’

*

‘மூளமுள் (எலும்பு மஜ்ஜை. என் மகள் அஸ்ரா மொழியில் ‘பிச்சுக்கா’) என்பது Brainதான். முதுகுத்தண்டுக்கு ஞானயோகத்துலே ‘சிறுமூளை’ண்டு பெயர் இக்கிது. மூளை எந்த மெட்டீரியலோ எந்த substanceஓ அதே substanceதான் இங்கெ!’ – ‘S’

*

‘SS’ல் ஒரு சிறிய மாற்றம்;

நாற்பது அடி மேலே போய் ‘கில்லா’வைப் பார்த்து , இப்போது 11 தடவை சுற்ற வேண்டும்.

*

‘எல்லாம் செல்வம்தான். நாம் அடையிற, அனுபவிக்கிற, சுவைக்கிற எல்லாம் செல்வம்தான். குழந்தைட சிரிப்பு செல்வமல்லவோ? குடும்பத்தோட அனுசரிப்பு செல்வமல்லவோ? கசங்கி, பசியில் சாவுறவளுக்கு ரெண்டு வேளை மீனு ஆக்கிப்போடுறது செல்வமல்லவோ? இப்படி இருக்க.. ‘பணம் வேணும், அத வச்சி நான் இவனை தூக்கி வுடுவேன்.. என் புள்ளேண்டு சொல்லிப் பார்த்து சந்தோஷப்பட்டுக்குவேன். பிஸாது பண்ண மாட்டேன்’ அப்படீண்டு எவனாச்சும் சொல்லியிக்கிறானா நாக்கூருலெ? நாக்கூருலெ பணமா இல்லே? கட்டிகட்டியா வச்சிக்கிறான்! அப்ப…அவன் செல்வந்தன் அல்ல!’ – ‘S’

*

‘மறதி என்பது அறிவுக்கு ஆபத்து’ – ‘S”

*

‘பாம்பைப் பார்த்தாலும் அப்படியேதான் உட்கார்ந்திருக்கனும். ‘பாம்பு’ண்டு பதறி அசைஞ்சீங்க..(பயம்) கடிச்சிடும்!’ – ‘S’.

அனீஸ் , நீ ‘புட்டீ..’ சொல் – பார்த்தால்! மகனே , எதற்கும் பயப்படாதே உன் வாப்பாவைப் போல. பாத்ரூம் ,ஆபீஸில் இருக்கிறது. என் அறைக்கு அடுத்து ஆஃபீஸ். இரவில் ஒண்ணுக்குக் போகக்கூட நான் ஆஃபீஸில் நுழைவதில்லை. பின்பக்கம் விரிந்துள்ள திடல்தான். அதிலேயே இருமுறை வெளிக்கிப் போயிருக்கிறேன். ‘ஆஹா.. வெட்டாத்துக் காத்து மாதிரிலே இக்கிது’ என்று சமாதானப்படுத்தி ரசித்திருக்கிறேன். ஆனால் அது போன வருடம். இப்போது அப்படியல்ல. நடுநிசியில் மேலே போய் பத்துநிமிடம் உட்கார்ந்துவிட்டு என்னால் வர இயலும். Face the Truth. பயம் பீயாகிவிடாதோ?!

*

‘பேய் வாஸலாத், ஜின் வாஸலாத், மலக்கு வாஸலாத், சைத்தான் வாஸலாத்…. அதே மாதிரி வாஸலாத் ‘பரக்கத்’துக்கும் உண்டு. இதையும் வாஸலாத் பண்ணலாம். ‘வாஸில்’ண்டா அடைஞ்சாண்டு அர்த்தம். நீங்க ஒரு பொருளை நெனைச்சி நெனைச்சி அதாகவே மாறிடுவீங்க. ‘ரஹ்மான்’ங்குற வார்த்தைக்கு ‘அன்பானவன்’டு அர்த்தம். ‘யா ரஹ்மான்’டு திக்ரு பண்ணுனீங்கண்டா அன்பு மயமாகிவிடுவீங்க’ – ‘S’
*

‘இம்ப்ரூவ்மெண்ட் அடையிறோங்குறதுக்கு , ‘ஏன் வாட்டமா இக்கிறா, கவலையா இக்கிறா?’ண்டு கூட்டாளியோ, சொந்தக்காரங்களோ கேக்கனும். ‘பழையமாதிரி இல்லையே..என்னாச்சு?’ண்டு எவனாச்சும் கேட்கனும். ‘பைத்தியமா புடிச்சிப்போச்சி?’ண்டு கேட்டா ரொம்ப நல்லது, இம்ப்ரூவ் ஆவுறோம்டு அர்த்தம். விளையாட்டுக்குச் சொல்லலே, உண்மையா சொல்றேன்’ – ‘S’
*

‘சிந்திக்கிறவனை தொல்லை கொடுக்காதே. ஆனா அவன் சிந்திக்கத்தான் செய்றானா , குழம்பிக்கிட்டிக்கிறனாண்டு மட்டும் பாத்துக்க!’ – ‘S’
*

‘பேசப்படுகிற ஒவ்வொரு வார்த்தைக்கும் என்னிடம் அழுத்தமான கணக்கு உண்டு’ – குர்-ஆன் ஆயத்து.

*

07.06.1996 வெள்ளி செஷன் முடிந்து..

a) Zenith கேமரா கைக்கு வந்தது. தம்பி ஹலால்தீன் ஒரு கள்ளப்பயல். தான் ஊருக்கு அனுப்பும் ‘கார்கோ’ சாமான்களுக்கும் அங்கிருந்து வரும் பணத்திற்கும் கணக்கு வைத்துக்கொள்ள ஒரு ப்ரோக்ராம் தயாரித்துக் கேட்டான். அழகாக ஒன்று தயாரித்து நேற்று கொடுத்துவிட்டு அவனிடம் கேட்டேன், ‘இதுக்கு பரிசாக zenith தரப்போகிறாயா?’ என்று. ‘இல்லே நானா.. இது நூறு ரூவா’. ப்ரோக்ராமுக்கு வேறு ஒரு பரிசு தர்றேன் என்று சொல்லி ஒரு ‘சாக்ஸ்’ கொடுத்தான். பம்பாய் சாக்ஸ், விலை 30.50 என்று போட்டிருந்தது. 3 திர்ஹம்! கூடவே ஒரு தொப்பியும் கொடுத்தான். பிலிப்பைன் ஏர்லைன்ஸ் தொப்பி. கீழக்கரை கம்பெனியில் வேலைபார்ப்பவன் அல்லவா, அதனால் தொப்பி! எப்படியோ zenith .. ஆனால் கூடவே நான் கேட்காமலேயே அனது 486 கம்ப்யூட்டரை எடுத்துக்கொள்ளச் சொன்னான். இன்னும் இரண்டு வருடத்திற்குள் அது 8088 நிலைக்கு வந்துவிடும், சந்தையில் பெண்டியம்-புரோ சிரிப்பாய் சிரிக்க ஆரம்பித்துவிட்டது. பழைய ப்ராசஸ்ஸர்களைப் பார்த்து ஏளனமாகவும் சிரிக்கிறது. ஆனால் எனக்கு 486 போதும். மேற்கொண்டு 4 MB ராம் போட்டு Maths ப்ராசஸ்ஸரையும் போட்டுவிட்டால் வெள்ளம் இப்போதைக்கு. இது பணத்திற்குத்தான். ஆனால் பாதி விலைக்கு. எப்போது வேண்டுமானாலும் கொடுங்கள் என்று சொல்லிவிட்டான். இன்று இரவு 12 மணிக்கு ஃபோன் செய்தாலும் செய்வான். ஹலால்தீனா, கொக்கா? ஆனால் ஆசைப்பட்ட சாமான் சர்வசாதாரணமாக கையில் சுலபமாக வீழ்ந்து விட்டது. ஷார்ஜாவில் உள்ள கம்பெனி இதே கான்ஃபிகரேசன் உள்ள சிஸ்டத்தை மாதம் 189 திர்ஹம் தந்தால் போதும் என்று விளம்பர செய்திருந்தது. கேட்டால் இரண்டு வருடம் அப்படியே செய்ய வேண்டுமாம். அந்த பகல் கொள்ளைக்கு இது நூறுமடங்கு மேல். உபயோகித்துவிட்டு , தேவையில்லை என்று கூட கொடுத்துவிடலாம். உபயோகித்ததற்கு 30 ரூபாய் 50 காசு கொடுத்துவிடலாம்!

b) ‘தேரா’டவர் பக்கமுள்ள ஹலால்தீனின் இருப்பிடத்திலிருந்து புறப்பட்டு காலையில் மஸ்தான் மரைக்கான் ரூமுக்கு வந்தேன். வரும் வழியில் நண்பர் ஃபாருக்கைப் பார்த்தேன். பகல் ஜூம்ஆவுக்கு எங்கு போகலாம்? ஒட்டக பஜாரிலுள்ள அல்குரேர் பள்ளிக்கா, நைஃப் ரோடின் மலையாளி பள்ளிக்கா அல்லது அப்பாகடை பக்கமுள்ள கோட்டைப்பள்ளிக்கா? கோட்டைப்பள்ளி எனக்கு நெருக்கம். தவிர வெயில் பாதிக்காமல் செண்ட்ரல் ஏசி உள்ள புதிய பில்டிங்குகள் நிறைய வந்துவிட்டன. அங்கே போகலாம். தொழத்தான்! அவரை 12 1/2 மணிக்கு ரூமுக்கு வரச்சொல்லிவிட்டு வந்தேன். ஜெப்பார்நானாவிடம் கேஸட்களை கொடுத்துவிட்டு புதியவைகள் வாங்கவேண்டும் என்று 12 மணிக்கு புறப்படும்போது ஃபாருக்குக்கு ஃபோன் பண்ணி நேராக கோட்டைப்பள்ளிக்கு வரச்சொல்லலாமா என்று நினைத்த அடுத்த நொடியில் ஃபாருக் வந்து நின்றார். கீழுள்ள அவர்களின் அறைக்கு குளிக்கப் போனவர் டவலைத் தூக்கிக்கொண்டு இரண்டாவது ஃப்ளோருக்கு (லிஃப்ட் 3 வது ஃப்ளோர் என்று காட்டும் – மஸ்தான் மரைக்கான் ரூமுக்கு!) என்னைப் பார்க்க வேண்டிய அவசியம்? ஜெப்பார்நானாவுக்கு ஒரு கடிதம் ஊரிலிருந்து நஸ்ருதீன் எழுதி அனுப்பியிருக்கிறாராம்.

‘சரி லெட்டரைக் கொடும். போய் கொடுத்துடுறேன்’

‘லெட்டர் கடையில் இக்கிதுப்பா. அவர்ட்டெ சொல்லி வந்து வாங்கச் சொல்லு’

கடையில் அவரைப்பார்த்தபோது சொல்லியிருக்கலாம், கொடுத்திருக்கலாம். ஆனால் அவரை 12 மணிக்கல்லவா நினைத்தேன்!

c) பகல் 3 1/2 மணிக்கு ரூமிலிருந்து புறப்பட்டபோது (இரவு 8 மணிவரை பகல்தான். ஆ..என்ன humidity..) என் ‘ஹாட்பேக்’கில் தாழிச்சாவையும் ‘பாங்கான்’ஐயும் வைத்தேன். வைக்கும்போது தாழிச்சா ஏனத்தை நன்றாக இறுக்க மூடினேன். இது பஸ்ஸில் போகும்போது உருண்டால் பாகிஸ்தானி டிரைவர் எரிந்து விழுவான் என்று நினைப்பு வந்தது. சரியாக பஸ்ஸில் உருண்டு ஓடியது தாழிச்சா ஏனம். ஒரு சொட்டுகூட சிந்தவில்லை.

d) எல்லாவற்றையும் விட ஆச்சரியம் அனீஸ், ஸ்கூலில் டீச்சர்களை திட்டாமல் ரொம்ப நல்லபிள்ளையாக இருக்கிறானாம். (எங்க கிளாஸ் புள்ளையிலுளைப் பார்த்து ‘அதை’ சொல்லுறான் வாப்பா! – அஸ்ரா) எப்போதும் பிள்ளைகளுடன் வெள்ளிக்கிழமைதான் பேசுவது. காலையில். காலையில் லைன் சுலபமாக கிடைக்கிறது. இன்று 11 மணிக்கு பண்ணுவோம் என்று காலையில் நினைப்பு வந்தது. கூப்பிடச்சொல்லி அஸ்மாயைப் பிடிப்பதற்குள் 11 1/2 மணியாகிவிட்டது. அனுப்பிய பணம் கிடைத்துவிட்டது. டெலிஃபோனுக்கு வைத்த நகையை மீட்டாகிவிட்டது.

‘நகசுத்தி வந்து ரொம்ப அதாபா பொய்டிச்சி மச்சான்..’

‘கையிலெ சூடான சாமான் வச்சா சரியாப்பொய்டும், வரவா?’

அஸ்மா சிணுங்கியது கிளப்பிற்று. ‘சரி புள்ளே..புள்ளையிலுவள்ட்டெ கொடு..பேசனும்’

‘அல்லாவே.. புள்ளைங்க ஸ்கூலுக்குலெ போயிருக்குதுளுவ.. இப்ப சனியும் ஞாயிறும் லீவு. மாத்தியாச்சும்மா’

பகல் நான் அவீருக்கு வரவேண்டும். இனி குறைந்த காசுக்கு என் பிள்ளைகளுடன் பேசமுடியாதோ..அல்லது சாயந்தரம் தங்கி பேசுவதா? அனீஸுடன் பேச வேண்டும். அஸ்ராகுட்டியிடம் ரேங்க் கேட்க வேண்டும். என் பிள்ளைகள்..

அடுத்தநொடியில் பிள்ளைகள் ஸ்கூல் விட்டு வந்து நின்றார்கள். ‘என்னெட்ட பேசாம ஹலோ ஹலோண்டு சொல்லிக்கிட்டிக்கிறாக வாப்பா..!’ – அனீஸ். ‘எனக்கு ஸ்கூல் பேக் வாப்பா..!’ – அஸ்ரா. பிள்ளைகள் முத்தமிட்டார்கள்.

நான் சர்க்கார் பாதங்களை முத்தமிட்டேன்.

(தொடரும்)

குறிப்புகள் :

சலவாத்து – கெட்டபேச்சு பேசுவதை மறைமுகமாகச் சொல்வது
க்வாஜா பந்தே நவாஸ் – அஜ்மீரில் அடங்கியிருக்கும் இறைஞானி ஹாஜா முஹ்யித்தீன் சிஷ்தி
ஜம் – ஒரு பயிற்சி
ரியாலத் – (‘SS’) பயிற்சி
புர்தாஷரீஃப் – பூஷரி இமாம் இயற்றிய பாடல்களை ஓதுதல்
சீப்பர் – சாப்பிடும் தட்டு
பனியான் – பனியாரம்
எஜமான் – ஷாஹூல்ஹமீது பாதுஷா
திக்ரு – இறைநாமங்களை ஜெபித்தல்
வாஸலாத் – மாந்திரீகவேலை
பரக்கத் – கிருபை, வளம்
ஆயத்து – வசனம்
பாங்கான் – ஸ்பெஷல் மீன் மசாலா
ஏனம் – பாத்திரம்

8 பின்னூட்டங்கள்

  1. அனாமதேய said,

    28/10/2017 இல் 13:30

    சாதாரணர்களுக்கானதல்ல மேற்படி என்று குறிப்பு எழுதணும். நிறைய சங்கிலி அந்து போகிறது. போற போக்கில் ஓட்டமும் நடையுமாக கூடவே வர வேண்டிருக்கிறது. பெரிய தும்பமையா இது!.. ச்சே.

    மனசுல ஒரு சின்ன உறுத்தல். உமக்கு வலிச்சதான்னு தெரியலை. நம்ம தலையின் துபாய்க் குறிப்பு கண்டீரா,

    மண்டைக்கு ஏதாச்சும் உரைக்கிறதா?

  2. அனாமதேய said,

    28/10/2017 இல் 13:32

    மறந்து போச்சு….சோமன்,.,,.

  3. அனாமதேய said,

    28/10/2017 இல் 13:39

    அனாமதேயன் அல்ல… நாமம் சோமன்.

  4. சோமன் said,

    28/10/2017 இல் 13:40

    அட…

  5. 28/10/2017 இல் 16:19

    நான் என்ன கதையா விட்டுக்கொண்டிருக்கிறேன் சோமன்?

    • சோமன் said,

      28/10/2017 இல் 20:35

      சத்தியமா சொல்லணும்னா நீர் செய்த எல்லா தகிடு தத்தங்களும் நான் பண்ணி இருக்கிறேன். அல்பங்கள் திங்க்ஸ் alikeனு சொல்லலாமான்னு தெரியலை. அதிலும் நான் ரெண்டு சிவா பிசி மூன்று லக்ஷம் கொடுத்து ஒன்று ஆபீஸ் மற்றது பாக்டரிக்குமாக வந்தது கண்ணுக்குள்ளே இருக்கிறது.

      டி பேசில் ப்ரோக்ராம் எழுதும்போது பரமானந்தமாக இருக்கும்…. கிளிப்பரில் கம்பைல் பண்ணி ஒரு டாட் exe
      பெத்துப் போடும்போது உள்ள சுகம் யாரறிவார்.?

      அது சரி…நான் சொன்னது சரியா தப்பா?

  6. சோமன் said,

    28/10/2017 இல் 20:57

    fb -இல் எங்க குரு வுடன் நான்.. ஒரு துளி இருக்கிறேன். பார்த்துக்கும். சோமசுந்தரம் எஸ். வாழ்விலும் அது போல் தான்.
    https://www.facebook.com/soman.sundaram.509 அந்த வயலின் காரர் பின் இருக்கும் முகத்தில் எதாச்சும் களை தெரிகிறதா?

    • 29/10/2017 இல் 09:27

      ஹை! பின்னால் ஏதாவது செய்வதே உங்கள் வேலையாகப் போய்விட்டது :). சும்மா வெடைத்தேன், என்ன செய்கிறீர்கள் அங்கே? அழகான புகைப்படம்.

      ஆமாம், FB-இல் பப்ளிக்-ஆ நீங்கள் (போஸ்ட்) போடுவதில்லையா? August2014க்குப் பிறகு October 5 போஸ்ட்தான் என் fake id கண்ணுக்குத் தெரிகிறது.

      அத்தியாயம் 18 வந்துவிட்டது. இன்னும் இங்கேயே நிற்கிறீர்கள்! நீங்கள் சொல்வது போல இது எல்லோருக்கும் அல்ல. சூஃபிஸத்தில் ஈடுபாடுள்ளவர்களுக்கு மட்டும்தான். அதுதான் தலைப்பே சொல்கிறதே.. அதற்கப்புறமும் ஏன் சீரியல் கதைகள் எழுதுவதில்லை என்று கேட்டால்?

      உங்களுக்குப் பிடித்தமாதிரி ஒன்று எழுதிவைத்திருக்கிறேன். பிறகு போடுகிறேன், இன்ஷா அல்லாஹ்.


மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s