சூஃபி 1996 – துபாய் டைரிக் குறிப்புகள் (12)

அத்தியாயம் 01 | அத்தியாயம் 02 | அத்தியாயம் 03 அத்தியாயம் 04அத்தியாயம் 05 |  அத்தியாயம் 06அத்தியாயம் 07அத்தியாயம் 08அத்தியாயம் 09 |  அத்தியாயம் 10 | அத்தியாயம் 11

அத்தியாயம் 12

ஆபிதீன்

*

0.05.1996

முதலில் எனக்கிருந்த ஆசைகளுக்கும் (இருந்ததா?) இப்போது ஏற்படும் ஆசைகளுக்கும் வித்யாசம் நன்றாகத் தெரிகிறது. உடம்பெல்லாம் அனலாகக் கொதிக்கிறது. இரண்டு வருடப் பிரிவுகளில் தேக்கி வைத்திருக்கும் உணர்ச்சிகள் – பிள்ளைகளையும் மனைவியையும் பார்க்கும்போது எப்படிக் கிளர்ந்து எழுமோ அப்படி. ஆனால், இது தேக்கிவைக்காமல் , ஆசைப்பட்ட உடனேயே அடைய வேண்டும் என்கிற வெறி. நடுத்தெருவில் புணரும் ஆண் நாயின் உணர்ச்சிக் கொந்தளிப்பாக. ஃபரீது என்னிடம் கொடுத்து வைத்திருந்த பணத்தை எடுத்து , ஆசைப்பட்ட டிஜிடல் டைரியை (SF-7900) வாங்கினேன் நேற்று. இரண்டு நாளாக இதே நினைப்பு. இப்போது குளிர்காலத்தில் பனிக்கட்டியில் படுத்தாற்போல இருக்கிறது. அது தேவையா? இப்போது தேவையா? அதெல்லாம் இல்லை, நான் ஆசைப்பட்டேன். அவ்வளவுதான். மகனார் அனீஸ் கூட ‘ரெண்டு ரோதை சைக்கிள் வேணும்’ என்றுதான் ஆசைப்பட்டுக் கொண்டிருக்கிறான். ஆனால் ஸ்ட்ராங் இல்லை எண்ணத்தில்! இந்தப் பணத்தில் , டெலிஃபோனுக்கு டெபாசிட் கட்டுவதற்காக ஊரில் அஸ்மா யாரிடமோ வட்டிக்கு வாங்கியதை அடைத்திருக்கலாம். அனீஸுக்கு சைக்கிளும்.. உறுத்தலாக இருந்தது. இந்த கொழுந்துவிட்டெரியும் ஆசை , ஆசையை அடக்குவதில் இருந்திருக்கலாமோ? கடன்களை அடைப்பதில், நல்ல வேலை தேடுவதில், பிரிட்டிஷ் பாஸ்பார்ட்டுக்கு ஃபோக்கஸ் பண்ணுவதில்.

இன்று ஆசையை நசுக்கினேன். ஒரு சிகரெட் கூட குடிக்கவில்லை!

‘நாம் நினை என்றால் மனம் நினைக்க வேண்டும். நினைக்காதே என்றால் நினைக்காமலிருக்க வேண்டும். அப்போதுதான் மனம் நமக்கு ஸ்வாதீனமாயிற்று. நமக்கு சித்த ஸ்வாதீனம் இருக்கிறது என்று அர்த்தம்’ – ஜகத்குரு காஞ்சி காமகோடி நீ சந்திரசேகரேந்திர சங்கராச்சாரிய சுவாமிகள்.

‘இரக்கமும் பண்பும் எவரிடத் தன்பும்
என்றுமுன் நினைப்பிலே மனமும்
பரந்த சிந்தனையும் பார்புகழ் செயலும்
பணிவ துனக்கெனும் திடமும்
அறத்துடன் அமைந்த வாழ்க்கையும்
யார்க்கும் ஆதரவாகிய வாழ்வும்
இரந்தெவர் முன்னும் நின்றிடா நிலையும்
என்றுமே தருக நீ அல்லாஹ்!’
– கவி கா.மு. ஷெரீப் (இறையருள் வேட்டல்)

‘ஒன்றென்றிரு ! தெய்வம் உண்டென்றிடு! உயர் செல்வமெல்லாம்
அன்றென்றிரு ! பசித்தோர் முகம்பார் ! நல்லறமும் நட்பும்
நன்றென்றிரு! நடு நீங்காமலே நமக்கு இட்டபடி
என்றென்றிரு! மனமே உனக்கு உபதேசமிதே’
– பட்டினத்தார்

‘உயிரே நினது பெருமை யாருக்குத் தெரியும்? நீ கண்கண்ட தெய்வம். எல்லா விதிகளும் நின்னால் அமைவன. எல்லா விதிகளும் நின்னால் அழிவன. உயிரே, நீ காற்று, நீ நதி, நீ நிலம், நீ நீர், நீ வானம். தோன்றும் பொருட்களின் தோற்ற நெறி நீ. மாறுவனவற்றை மாற்றுவிப்பது நின் தொழில். பறக்கின்ற பூச்சி, கொல்லுகின்ற புலி, ஊர்கின்ற புழு, இந்த பூமியிலுள்ள எண்ணற்ற உயிர்கள், எண்ணற்ற உலகங்களிலுள்ள எண்ணேயில்லாத உயிர்த்தொகைகள், இவையெல்லாம் நினது விளக்கம்… நமஸ்தே வாயோ, த்வமேவ ப்ரத்யஷம் ப்ரஹ்மாஸி.’

‘இன்னுமொரு முறைசொல்வேன்,பேதை நெஞ்சே!
எதற்குமினி உளைவதிலே பயனொன் றில்லை;
முன்னர்நம திச்சையினாற் பிறந்தோ மில்லை;
முதலிறுதி இடைநமது வசத்தில் இல்லை;
மன்னுமொரு தெய்வத்தின் சக்தி யாலே
வையகத்திற் பொருளெல்லாம் சலித்தல் கண்டாய்!
பின்னையொரு கவலையுமிங் கில்லை,நாளும்
பிரியாதே விடுதலையைப் பிடித்துக் கொள்வாய்!’

– பாரதி

*

‘பேசுறது எவ்வளவு பெரிய கலை!’ – ‘S’. ‘சட்டையிலே தேள் இக்கிதுப்பா’ என்று ஒருவர் எடுத்துச் சொல்லும்போது , ‘இத சொல்ல வந்திட்டிங்களோ? உங்க சூத்துலெ பாம்பு இக்கிதே’ என்று சொல்லக்கூடாது என்கிறர்கள்.

*

‘ஒரு செயலை செய்யிறது செயல்ண்டு சொன்னா அத செய்யவேணாம்டு சும்மா இருத்தலும் செயல்தான். ஒரு பிச்சைக்காரனை ஏசுறது தப்பு. இது செயல். ஏன் ஏசுறோம்டு சும்மா இக்கிறதும் செயல்தான்’ – ‘S’. ‘ரியாலத்’ பண்ணாமல் இருப்பதும் செயல்?!

*

‘எவன் கோபத்துலேயும் மகிழ்ச்சியிலேயும் தோல்வியிலேயும் வெற்றியிலேயும் எதிர்மறையான எல்லா சூழ்நிலைகளிலேயும் நிதானத்தைத் தவற வுடாம இக்கிறானோ – இல்லே, நிதானம் தவறாத பயிற்சி பண்ணிக்கிட்டானோ – இல்லே, நிதானம் தவறாத பழக்க வழக்கத்தை உண்டாக்கிட்டானோ – இல்லே நிதானம் தவறாத பழக்கம் தனக்குத்தானா உண்டாயிடிச்சோ – இல்லே, பெற்றோர்கள் அப்படியிருந்து அத பாத்து காப்பி அடிச்சிக்கிட்டானோ – இல்லே, unconsciousலெ ரிகார்ட் ஆயிடிச்சோ…(அந்தமாதிரி ஆட்களாக) இருந்தாலொழிய… எல்லாருமே குறை உள்ளவங்கதான். ரசூல் ஸல்லல்லாஹு அலைஹிவஸல்லம் காய்ஞ்ச ரொட்டியை திண்டுக்கிட்டு குகையிலே போயி தவம் கிடந்தாஹா. அஹலே அப்படீண்டா நாம எப்படி கண்ட்ரோல் பண்ணனும்? ஆனா சிலபேர் fortunate… ஒரு ஆளை fortunateண்டு சொல்லும்போது அவன் நூத்துக்கு நூறு பெர்ஃபெக்ட்ண்டு நெனைக்கிறோம். அதான் கிடையாது! ஒரு பொருள் இன்னும் கூட்டமுடியாத மாற்ற முடியாத ஒண்ணு இக்கிதுண்டு ஏதாச்சும் ஒண்ணு சொல்லுங்க பார்ப்போம். science, geometry, Astralogy, astronomy.. எத வேண்டுமானாலும் எடுத்துக்க. ஒரு பொருளப்பத்தி இங்கே density கூட இக்கிதுண்டு science சொல்லுது. அது static. கரெக்ட்தான். அதுக்கு முன்னாலெ சொல்லப்பட்ட செய்திலாம் பொய்யிண்டு ஆயிடும். எதுவரைக்கிம்? இதுக்கு மாறுபட்ட கருத்து வர்ற வரைக்கிம்’

‘அடுத்த கருத்து வர்ற வரைக்கிம்’ – நான்

‘அல்ல. மாறுபட்ட கருத்து வர்ற வரைக்கிம். அடுத்த கருத்துங்கறது சப்ளிமெண்டரியா கூட இக்கெலாமுல்லெ? அது மாதிரி அன்றாட லைஃப்லெ, இன்னும் இம்ப்ரூவ் பண்ணலாம்டு சொல்ல முடியாத ஒண்ணை சொல்லுங்களேன் பார்ப்போம். ஒரு வாட்ச் எடுத்துக்குங்க. Top Class வாட்ச். நிகரற்றது. உண்மையாகக்கூட இருக்கலாம். பார்க்குற நாலுபேரு சொல்லிட்டாக்கா நாலுகோடிப் பேர் சொன்னதா எடுத்துக்குறோம். சொல்றவன் அறிவாளியா இருக்கனும்டோ, அளந்து பாக்குற சக்தி உள்ளவனா இருக்கனும்டோ அவசியம் இல்லே. அழகனா இருந்தா போதும்; செல்வாக்குள்ளவனா இருந்தா போதும்; அழுக்கு சட்டை போடாம இருந்தா போதும். சரி, இப்ப வீட்டுல தோசை சுடுறாங்க.. அதுல பசுநெய் ஊத்துனா இன்னும் நல்லா இக்கிம்ங்குறோம். பாதாம்பருப்பையும் அரைச்சிப் போடுறாஹா. அட அக்ருட்டையும் சேர்த்துப் போடலாமுல்லே? இப்படி , இன்னும் இம்ப்ரூவ் பண்ணமுடியாத ஒரு அறிவு, செய்தி..மாறாத, மாற்ற முடியாத, என்னக்கிமே ஒரேமாதிரி இருக்கக்கூடிய ஏதாவது அறிவு இருக்கா இல்லையா?’ – ‘S’

‘நம்ம அறிவுதான், அத இம்ப்ரூவ் பண்ணவே முடியாது’ என்று அப்போது தோன்றிற்று எனக்கு! சொல்லவில்லை.

‘சயின்ஸ்ங்குறது குழந்தை விளையாட்டு. இன்னக்கி கமர்கட் முட்டாயை விரும்பிக்கேட்குற புள்ளை நாளைக்கி மல்லாக்கொட்டை முட்டாயி கேட்கும். இல்லே, இந்த ரெண்டு முட்டாயிம் வாணாம்டு சொல்லும். என்னக்கிமே மாறாத , ஒரே மாதிரி இருக்குற பொருள் இருக்கா இல்லையா? இருக்க முடியும்டு நம்புறீங்களா இல்லையா? ‘ – ‘S’

‘Shape of the World, Whiteலெ எல்லா கலரும் இக்கிது.இப்படி…’ – ரவூஃப்

‘அதல்லப்பா.. ஒரு Question Paperலெ உள்ள கேள்விக்கு பதிலெழுதி நீ நூத்துக்கு நூறு வாங்க முடியாது. ஏன்னா, இன்னும் தெளிவாவும் சொல்ல முடியும். இவ்வளவுதான்..இதுக்கு மேலே கிடையாதுண்டு சொல்ற மாதிரி ஒண்ணு இக்கிதா?’

‘Saturated Pointஆ?’ – நான்

‘ம்ஹூம்..இல்லையா, இருக்குற மாதிரி தெரியலையா?’

‘இருக்கு’ – சு.மைதீன்

‘சொல்லுங்க!’ – சர்க்காரின் குரலில் உற்சாகம்.

‘அல்லாஹ்வைச் சொல்லலாம்’

‘முதல்ல அல்லாஹ்ட்டெயிலாம் போவாதீங்க, என்னெட்ட வாங்க! அல்லாஹ்வை தெரியாமதான் இங்கெ வந்திரிக்கீங்க? அல்லாஹ் யாரு ரசூல் யாருண்டு நான் காட்டுறேன். அப்புறம்போயி கிழிங்க. முதல்ல இங்கெ கிழிச்சிக்குங்க. ஆனா அங்கேயிலாம் இந்தமாதிரி ‘ஜம்ப்’ பண்ணிக்கிற வேலையிலாம் வச்சிக்கிடாதீங்க’ – தெரியாமல்தான் உற்சாகம் வந்துவிட்டது முதலில், சர்க்காருக்கு . ஒரு நொடியில் அதை மாற்றிய சீடரை ஒரு பிடிபிடிக்கிறார்கள்..: ‘அல்லாஹ்ண்டா என்னா? அப்படி வாங்களேன். அல்லாஹ்ண்டா என்னா, அல்லாஹ்ண்டா யாரு?’

‘இல்லே..கேஸட்டுலே..’

‘ச்! என்னாங்குறதுக்கு பதில் சொல்வீங்களா, யாருங்குறதுக்கு பதில் சொல்லுவீங்களா? இல்லே ரெண்டுக்கும் கேட்டு சொல்லுவீங்களா? யாரைக்கேட்டு?’

‘ஒரு கேஸட்டுலெ..என்னக்கிம் மாறாத ஒன்னு அல்லாஹ்ண்டு சொல்லியிக்..’

‘மாறாத ஒருவன்டு சொன்னேனா, மாறாத ஒன்னுண்டு சொன்னேனா?’

‘மாறாத ஒன்னுண்டு’

‘ஏன், மாறாத ஒருவன்டு சொன்னா என்னா தப்பு?’

சர்க்கார் ஒரு கொலைக்கேஸை சொல்கிறார்கள். ‘ராமசாமி குத்திட்டான்’ என்பது ‘ராமசாமி (இவன்) குத்திட்டான்’ என்று பொருள் தருவதைச் சொல்கிறார்கள். சர்க்கார் குத்திட்டாஹா!. ‘இது அறிவல்ல, ப்யூர் காமன் சென்ஸ்’- ‘S’

‘இப்ப சொல்லுங்க..மாறாத ஒண்ணு – அரபில ‘இல்முல்ஹக்’குங்குறது – ஞானமல்ல, கணக்கு!. எட்டும் எட்டும் பதினாறு! இதுதான் மாறாது!’ – ‘S’

‘மனசுல வந்திச்சி இது!’ – அல்லாஹ்வை சொன்ன அதே சீடர்தான். யா அல்லாஹ், நீ ஒருவனா, ஒன்றா?! 1+1=2…!

*

‘(பல் விளக்க) பிரஷ் பண்றதுக்கு இடையிலே தோன்றி மறையும் எண்ணங்கள் கூட ஒரு சமுதாயத்தையே கம்ப்ளீட்டா நல்வழிக்கு கொண்டு வர்றதா இருக்கலாம். உங்களையே குழிதோண்டி புதைக்கிறதாவும் இருக்கலாம். அப்செர்வ் பண்ண ஆரம்பிச்சீங்கண்டா அந்தந்த வேலையை செய்யும்போது வாய்க்குள்ளே- ஆபிதீன், இது Personal Instruction அல்ல – இந்த வேலையை செய்யிறோம்டு நெனைச்சு mind அலைபாய்றது நிண்டு போய்டும். என்னா நன்மை? Hunches வரும்போது சுத்தமா – with clarity- தெரியும்’ – ‘S’

*

08.05.1996

‘ஜெயலலிதா அபி நீச்சே ஹை’ – மொம்மதுகாக்காவுக்கு சந்தோஷம். அவர் சொந்தக்கார் ஒருவரும் நாக்கூரில் இப்போது எம்.எல்.ஏ.!

‘ஔரத்லோக் நீச்சே ஹோனா அச்சாஹை (பொம்பளைங்க கீழே படுத்தாத்தான் நல்லது)!’ என்றார் மொயீன்சாஹிப்.

பரங்கிப்பேட்டை நானாவும் ஃபோன் செய்தார். ‘நல்லா போட்டுட்டானுவ தம்பி!’

‘சரி நானா, நாளைக்கிப் பேசுவோமே’ – நான் ஃபோனை வைத்தேன். கோடிக்கணக்கான ரூபாய் செலவு செய்து நடத்தப்படும் விளையாட்டில் அனைவருக்கும் உற்சாகம் இருக்கத்தான் செய்கிறது. இந்த விளையாட்டால் யாருக்கு நன்மை என்று பார்ப்பவர்களுக்கு புரியவும் வேண்டாம். கூச்சல் போட்டு தன் சக்திகளை இழக்கும் சந்தர்ப்பங்களை விட்டுவிடலாமோ? எனக்கு சிரிப்பாக வந்தது. நக்கும் ஜாதி போனால் ஊம்பும் ஜாதி வருகிறது. அரை நூற்றாண்டாக குறிகளுக்குத்தான் கொண்டாட்டம் – இந்த தேர்தல் முறையில். ஆனால் நல்லவர் கெட்டவர் என்பது ஒருபுறமிருக்க லட்சக்கணக்கான மனிதர்களை தன் சுண்டுவிரலில் கட்டுப்படுத்தும் தலைவனும் தலைவியும் எந்த இடத்திலிருந்து சக்தியைப் பெற்றார்கள்? இவர்களின் குரு யார்? ஆஃபீஸுக்கு லீவு போட்டுவிட்டு ‘சன் டி.வி’யில் (இன்று வாங்கி இணைக்கப்பட்டது) துபாயின் தமிழ் சமுதாயம் புகுந்திருக்கிறது. ராஸ்-அல்-கைமாவில் கூட தமிழ்வானொலி நிலையம் இருக்கத்தான் செய்கிறது. ஆனால் ‘மயானம் , அதில் ஓர் மர்ம ஆராய்ச்சி’ என்ற தொடர் ரொம்ப நாளாக தமிழை ஆராய்ச்சி பண்ணிக்கொண்டிருக்கிறது , செய்திகள் தராமல். இந்த ஆராய்ச்சி எதற்கு? ராவ் சிரித்தால் என்ன சிரிக்காவிட்டால் என்ன? எப்படி இருந்தாலும் பாப்ரி மஸ்ஜிதுகள் இடியத்தான் செய்யும். ராஜீவ் மனிதவெடிகுண்டால் சிதறுண்டுதான் போவான். நாடு வாழ்க!

*

‘இப்ப நீங்க காலையிலேர்ந்து என்னான்னா செஞ்சீங்கண்டு (ராத்திரி) பார்க்க ஆரம்பிக்கும்போது மனசுடைய பேச்சு , மனசுக்கு அடியிலே உள்ள subconscious, Unconscious அல்லது மேலிடத்துலேர்ந்து instructions வர்றது சுத்தமா தெரியும். தீர்ந்த அசைவு, தீர்ந்த பேச்சு, தீர்ந்த பார்வை, தீர்ந்த எண்ண ஓட்டம் (Chain of Thought) முக்கியம். பிரஷை பிரஷ் பண்ணுறதுக்காகத்தான் செய்யனும். குளிக்கும்போது பசியாறுறதைப்பத்தி நெனைக்காதீங்க. பசியாறும்போது மத்ததை நினைக்காதீங்க. ஏன்? பசியாறுறதை சுவைக்க முடியாது. பசியாறும்போது ஏன் எண்ணங்கள் புகுது? நம்ம மனசை Blankஆ வச்சிக்கிறோம் எப்பவுமே. திறந்த வூட்டுலெ நாய் பூறும்பாங்களே, அதைவிட மோசம் மனசு. இப்ப பாயிண்ட்டுக்கு வாங்க. பிரஷ் பண்ண ஆரம்பிச்சதிலேர்ந்து கொஞ்சநேரம் வரைக்கிம் நெனச்சீங்கண்டா நீங்க தூங்கிடுவீங்க. இது தூக்கத்துக்கு உள்ள வழியும்கூட, மெமரி பவர் டெவலப் பண்ணுறதுக்கு ஒரு வழியும்கூட. இது எப்படி fully ஃபோட்டோகிராஃபிக் மெமரியா வரும்? எப்ப வரும்? நைட்லெ பூரா நெனைச்சிக்கிட்டே வரணும். ஆக மொத்தத்துலெ ஒவ்வொரு அசைவும் கண்ட்ரோல் பண்ணுறதுக்கு பதிலா என்னா என்னா செஞ்சோம்டு நெனைச்சாவே போதும். அன்னைக்கே சொன்னேன், லைஃப்ங்குறது ஃபோட்டோகிராஃபிக் ஃபிலிம் மாதிரி. once , understandingங்குற லைட் விழ ஆரம்பிச்சா அது அழிய ஆரம்பிச்சிடும். உங்கள்ட்டெ நெகடிவ் இக்கிதுண்டு எப்ப நீங்க புரிஞ்சிக்கிட்டிங்களோ, will இருக்கிறதோ, தானா அதுக்குள்ள மாறுபட்ட வழி வந்துக்கிட்டிக்கும். ‘அப்செர்வ் பண்ணிப்பண்ணி பழக்கப்பட்டு ,cosmic habit force பிக்-அப் பண்ணி, எத எடுத்தாலும் ஊடுருவிப்பாக்குற பழக்கம் வந்துடும். வந்துடுச்சீண்டா எந்த செய்தியும் கண்ணை விட்டு மறையாது. இது ரெண்டாவது நன்மை. ஃபோட்டோகிராஃபிக் மெமரி வந்துடும்..’ – ‘S’. மெமரி Powerக்காக, எனக்கு.

*

‘இன்னொரு ஆளைப் பாக்கும்போது நம்மள பாக்கத்தான் இன்னொரு ஆளைப் பாக்கனும்’ – ‘S’

*

‘பெண்களோட அதிகம் பழகுறவங்க பெண் மாதிரி பேச ஆரம்பிப்பாங்க. நடக்கவும் ஆரம்பிப்பாங்க. அதே மாதிரி இங்கெ – இது யாருடைய ரூட்? ஞானிகளுடைய ரூட், அவுலியாக்கள்ற ரூட் – அந்த தன்மை உங்களுக்கு வர ஆரம்பிக்கும். ‘ஜீன்’லெ என்னா இக்கிதுண்டு நமக்கு தெரியாது. ஆனா ஒவ்வொரு ஜீன்-உம் பிந்தைய ஜீன்-ஐ விட பவர்ஃபுல். இப்ப ஒரு குழந்தை கோபம் வந்தா தலைகாணியை ஏன் தூக்கி எறியுது? வாப்பாவோட செயல் அது! வாப்பா குழந்தையிலெ செஞ்சதை இது எங்கே பாத்திச்சி? கோவம் வந்தா தலைகாணியைத்தானா தூக்கி எறியனும்? சட்டியை எறியலாம், டேபிளை கவிழ்க்கலாம், முட்டிக்கலாம், எதுவும் செய்யலாமுல்லெ? பர்டிகுலர் பேட்டர்ன்லெ எறியுது இதை..இதே – same incident- அங்கே நடந்திருக்கு! ‘ஜீன்’லெ என்னான்னா இக்கிதோ.. ஒண்ணுமில்லே..மைக்ரோஸ்கோபிக் க்ரியேச்சர். இதுல ஆண்டவன் என்னென்னமோ திணிச்சி வச்சிக்கிறான், அப்படி இக்கிம்போது ஆண்டவனை கூப்புடுறீங்களே! அவன்ட்டெ அப்புறம் பேசிக்கலாம், இப்ப நாம பேசிக்குவோம். நம்மள்ட்டெ எவ்வளவு flaw இக்கிதுண்டு பாத்துப்புட்டு அங்கே போலாம்!’ – ஆண்டவனை கூப்பிட்ட சீடருக்கு. இனி அல்லாஹ் இல்லை அவருக்கு!

*

‘தூங்கும்போது நினைத்த அதே நினைப்பு முழித்த உடனேயே ,சரியாகச் சொன்னால் கண்ணைத் திறக்கும் முன்பு வந்துவிட்டால் தன்னிடம் உடனே வருமாறு சர்க்கார் சொன்னார்கள். சொன்னால் அடுத்த ஸ்டேஜ் தருவதாகச் சொன்னார்கள். தூங்குவதற்கு முன்பு எதையும் நினைக்காமல் இருக்கிறேனோ என்னவோ..!

*

சர்க்காருக்கு முன்னால் உள்ள தட்டில் வட்டலப்பம் (இனிப்பு) ஏழெட்டுத் துண்டுகள் இருக்கிறது..

‘இந்த வட்டலப்பத்தோட கதி என்னாகும்? சொல்லுங்க!’ – ‘S’

‘சாப்புட்டா பீயாப் போய்டும்’ – சீடர்

‘பீயாப் போவுதா பாதம்கீரா போவுதாங்கிறது இக்கிட்டும், இதுக்குள்ள வாய்ப்புகள் என்னான்னா?’

‘ஊசிப் போய்டும்’

‘கேள்வியே புரியமாட்டேங்குதே..அட, இதை நான் என்னா செய்வேன்?’

‘சாப்புட..’

‘சாப்புடுவேனா, சாப்பிடக் கொடுப்பேனா, சாப்புடச் சொல்வேனா?’

‘சாப்பிடக் கொடுத்துடுவீங்க!’

‘அவ்வளவையும்! இப்ப நான் பேசுறது வட்டலப்பத்தைப் பத்தியா மனசைப்பத்தியா? இந்த வட்டலப்பத்தோட நிலை என்னாகும்டு கேட்குறேன்’

‘சரியாப் பொய்டும்!’

‘யே அப்பா! யாருக்குமே தெரியாதே இது! தெரியுமா யாருக்காச்சும்?! உலகத்துலேயே யாருக்கும் தெரியாது – திண்டா சரியாயிடும்! இந்த வட்டலப்பத்தோட நெலைமை என்னா? இதை என்னா செய்யலாம்? இத எடுத்து கீழேதட்டி சிமெண்ட் மாதிரி தடவலாம். ஒரு பைத்தியக்காரன் உட்கார்ந்தா செய்யத்தான் செய்வான். சூத்துல தேய்ச்சிக்கலாம். மூக்குல உட்டுக்கலாம், எடுத்து வாயிலெ தடவி வுடலாம், போர்டுலெ தடவலாம், சுவத்துல அடிச்சிப் பாக்கலாம்..ஆளுக்கு கொடுக்கலாம். புரியுதா? இது சரியாபோனபிறகு இதோட சூழ்நிலை என்னா? ஒண்ணு ஒண்ணுதான். ரெண்டு ஆபிதீன் திண்டிப்பாரு, ஒண்ணு கவுஸ்மெய்தீன் சாப்பிட்டிருப்பாரு, ஷேக்சாபுக்கு கொடுக்கவேண்டிய மூணையும் சாவன்னாசாபு திண்டிருப்பாரு. இது மாறுமா? இந்த சூழல்லெ இது சரியாபோனபிறகு என்ன உண்டோ அத முன்னாடியே தெரிஞ்சிக்கனும். அப்ப, வட்டலப்பம் இப்படித்தான் ஆவும். கொடுத்துத்தான் தீருவீங்க. சூத்துலெயிலாம் தேய்க்க முடியாது. இதேமாதிரி புரியும். in other words பின்னாலெ என்னா நடக்கும்டு முன்னாலேயே தெரிஞ்சி பொய்டும். prediction வந்துடும். chances இருக்கலாம், ஆனா செய்ய முடியாது. மாற்றவே முடியாது. அப்ப எட்டும் எட்டும் பதினாறுங்கிற அதே definite இங்கேயும் இக்கிது’ – ‘S’

**

10.05.1996 வெள்ளி செஷன் முடிந்து.
06-13.10.95 கேஸட்டின் தொடர்ச்சி..

‘என் மேலே நம்பிக்கை வச்சிட்டீங்கண்டா நான் சொல்ற வார்த்தை பலிக்கும். அவ்வளவுதான். என் கருத்து உங்க நெஞ்சிலே ஏறிடும். இதுதான் Suggestion. இதை voluntaryயா செய்யலாம். involuntaryயாவும் வரலாம். எப்படி? நீங்க பலசாலியா ஆயிடுவீங்க.ஆயிடனும்டு நான் சொல்லிட்டா , பலசாலியா ஆவுறதுக்கு என்னான்னா வேணுமோ அது தானாகவே ஃபார்ம் ஆகும். நல்ல பசி, நல்லா திங்கிற ஆசை, திங்..கிறது, செரிக்கிற அளவு ரெஸ்ட் எடுத்துக்குறது, மேலும் மேலும் வயித்துல போட்டு குத்தி வாந்தி வராமலும் வயித்தால போவாமலும் இக்கிற ஒரு பக்குவம்.. எல்லாம் சேர்ந்து வந்துடும். ஒருத்தனை regression பண்ணி சின்ன வயசுக்கு கொண்டு போயிட்டா அந்த வயசுல கையெழுத்து எப்படி போடுவானோ அது வரும். அதே குரல் வரும். அதுக்காக மீசைலாம் வுழுந்து போய்டாது. சிலது மாறாது – மயிரு மாதிரி!. இப்ப இதிலேர்ந்து என்னா தெரியுது? ஒரு பொருளைப்பத்தி அழுத்தமா நெனைச்சா அந்த பொருளாவே மாற ஆரம்பிப்போம். இல்லே, அந்த சூழ்நிலை நமக்கு ஞாபகம் வரும். மனசுல பதியும். அப்படீண்டா லைஃப்லெ நினைக்க வேண்டியது past success-ஐத்தான். கடந்த கால கசப்பான அனுபவங்களை நெனைக்கிறதா இருந்தா..அது நிகழ்காலத்துக்கு வெளிச்சம் கொடுக்குறதா , எதிர்காலத்துக்கு வழிகாட்டுறதா இருக்கனும். ரெண்டுமில்லாம past-ஐப் பத்தி நெனைக்கிறது டைம்-ஐ வேஸ்ட் பண்ணுறது.

மத்தவங்கள்ற குறையை கண்டுபிடிக்கிறது ஈஸி. அது நம்மள்ட்டெ இக்கிதாண்டு பார்க்க பார்த்து நீக்க முயற்சி பண்ணனும். அதில்லாம ‘பிஸாது’ பண்ணுறதுக்கு ஒரு materialண்டு பார்த்தா totally time வேஸ்ட்.

ஒரு J.E. Junior Engineer. ‘ஏற்பாடு பண்ணிட்டேன்..curtain போடச்சொல்லி ஆர்டர் போட்டுட்டேன்’டாரு. ‘curtainண்டா என்னா?’ண்டு கேட்டேன். ‘அதான் தெரியலே’ண்டாரு! நான் தெரியிறவரைக்கிம் விடலே. இதனாலெ என்னா நன்மை? எதையும் தெரிஞ்சிக்க முடியும்ங்குற தைரியம் வரும். தெளிவும் வரும். இந்த சக்தி இருக்கு நம்மள்ட்டேங்கிற நம்பிக்கையை சொல்லலை…தெரிய ஆரம்பிச்சிடும் – உண்மை.

நான், ஓதிப்பாக்குற ஜனங்கள்ட்டெ கேட்பேன், ‘நம்புறியா?’. ‘கொஞ்சம் நம்புறோம்’.”கொஞ்சம் நம்பாதே, நூத்துக்கு நூறு நம்பு..யார் வந்து சொன்னாலும் சரி, கேக்காதே. இல்லெ, யார் சொன்னாலும் என்னை நம்பாதே..அறவே நம்பக்கூடாது. கச்சடாப்பய வாஹிதுசாபுண்டு சொல்லக்கூடிய தெம்பு உனக்கு வரணும். ஆனால் நான் என்னா சொன்னாலும் கேட்கனும். கேட்டவுடனே காரியம் நடக்க ஆரம்பிச்சிடுதா? அப்புறம் தானா நம்பிக்கை வந்துடும்.

‘மழை பேய்ஞ்சு..’என்னா இது லாச்சாரா இக்கிது’ண்டு சொல்றதுலாம் மத்தவங்கள்ட்டெ உறவுகொள்ள முடியலேங்கிற ஏக்கம்தான் காரணம். அதாவது அவங்களாலே தனியா உட்கார முடியலெ. என்ன காரணம்? உத்துப்பாத்தா வெறுமைதான் இக்கிது!

நான் ஒரு புக்லெ எழுதியிகிறேன். ‘மக்கள்.. மற்றவர்கள் கருத்தை தன் கருத்தாக நினைத்து , தன் கருத்துதாண்டு சத்தியம் பண்ணுறாங்க’ண்டு. இன்னொருத்தன் ஏத்தி விட்டது. லைட்டா ஏத்திவுட்டிருக்கான். நமக்கு புரியலே. இதுக்கு யார் பேச்சையும் கேட்கக்கூடாதுண்டு அர்த்தம் இல்லே..கேட்டுத்தான் ஆகனும் சில விஷயங்கள்லெ..ஏற்றப்படுகிறோமா? சந்தோஷமா ஏத்துக்குங்க. (ஆனா) விளங்கிக்குங்க.

ஸ்கைலாப் விழப்போவுதுண்டு நெனச்சி நெனச்சி கவலைப்பட்டு, நம்ம ஊட்டுலெ வுழுவாம அடுத்த வீட்டு வாசல்ல வுழுந்து, நம்ம வூட்டுலெ வுழலேண்டு கொஞ்சநேரம் சந்தோஷப்பட்டு, மறுபடி ஸ்கைலாப் வுழுவும்போதெல்லாம் எங்கெ வுழுந்துடுமோ..பழையமாதிரி வுழுந்தா பரவாயில்லேண்டு கவலைப்பட்டு… ஏம்ப்பா மூளையப்போட்டு குழப்பிக்கிட்டு அலையிறீங்க? தேவையில்லே..மண்டையிலே வுழுவுதா? ரைட்டு, வுளுவட்டும், அவுட். வுளுவலையா? ரைட், தப்பிச்சிக்கிட்டோம். தட்ஸ்ஆல். எதுக்கு எடுத்தாலும் கவலைப்படுற பழக்கம் வந்திச்சிண்டா வாழவே முடியாது லைஃப்லெ’ – ‘S’

*

‘ஆண்டவனே ப்ராப்ளத்தை கொடு, வேணும். அதேசமயம் அதை tackle பண்ற கெபாசிடியையும் சேர்த்துக்கொடு’ – துஆ

*

‘நான் எழுதியிக்கிறேன் முதல்லெ.. உலகத்துலெ மிகப்பெரிய திறமைசாலி, Administratorட்ட ஒருமணி நேரம் (உலகை நிர்வகிக்கும்) ஆட்சியை ஒப்படைச்சா..அல்லாஹ் கொஞ்சம் நகர்ந்து உட்கார்ந்துக்குவான். ஒரு மணி நேரம் கழிச்சி பழைய நிலைக்கு கொண்டு வர்றதுக்கு ஒருகோடி வருஷம் ஆவும். பரிணாமத்துலதானே வந்திக்கிறோம்? எல்லாத்தையும் (‘திறமைசாலி’) மாத்திடுவாங்க! பொண்ணுக்கு கொட்டையை கொடுத்துடுவான், ஆணுக்கு முலையை கொடுத்து – மீசையை முளைக்க வுட மாட்டான், கடலை தரையாக்கிடுவான். மலையிலெ கடலை உண்டாக்கிடுவான், வேர்வை ஜில்லாப்பா வரும் – ஒரே ஒருமணி நேரம்!’ – – ‘S’

*

முந்தாநாள் இரவு கனவு. ஐயோ, பெரிய மினாரா ஏன் இடிந்துபோய் இப்படிச் சிறுத்து , ஒரேயொரு அடுக்குடன் இருக்கிறது? துணையை நினைத்து நினைத்து காமத்தில் எழும்பியடங்கும், பின் சிறுத்துப்போகும் குறியா இது? அல்லது ‘எட்டு ரக்-அத்’தைச் சேர்ந்த பையன் தேர்தலில் ஜெயித்துவிடும் குறியா? ஆசைகளும் லட்சியங்களும் மேற்கொண்டு எழுப்பப்படாமல் இடிந்து விழுகின்றதா? இனி மேற்கொண்டு பெரிய மினாராவில் இரண்டு மூன்று அடுக்குகள் கட்ட முடியாதுதான். அதற்குள் இறந்து போகவேண்டுமா? எனக்கு பயமாக இருந்தது. அட்டையாக முதலில் வந்த பெரியமினாராவுக்கு இது பரவாயில்லையா? முதலில் வந்ததைக் கெட்ட கனவல்ல என்று சர்க்கார் சொல்லியிருக்கிறார்கள். இந்த கனவு பற்றி அவர்களிடம் கேட்க வேண்டும். இடிந்தால்தானே புதியனவும் எழும்? ஆர்.எஸ்.எஸ் கலவரத்தில் எரிந்த மணிமேடை (மண்டபம்) விதிவிலக்கு!

*

உம்மாடி என்ன சூடு! அவீர் எங்கும் ஆவி அனலாகப் பறக்கிறது. அடித்த மழைக்கு ஈடுகட்டுமோ என்னவோ.. ஒருவாரத்திற்கு முன்பு துபாய்க்கு புதிதாக வந்த பையன் ஒருவன் பயந்துபோய் என்னிடம் கேட்டா ‘என்னா நானா இது, இப்படி கொளுத்துது, அடுத்தமாசம் சரியாடும்லெ?’

மஸ்தான்மரைக்கான் சமாதானப்படுத்தினான், ‘தம்பி, இதுதான் ஆரம்பம்!’

ஊரும் வீடும் போட்ட சூடு தாங்காமல்தானே இங்கே வந்தது? அதைவிட இது சூடா? ஒட்டகங்கள் பொறுத்துக் கொள்ளத்தான் வேண்டும். ‘Life in the Gulf’ என்று ஒரு ஜெர்மன்காரனின் கேலிச்சித்திரம் மிகப் பிரசித்தம். ஒருவருடத்திற்குள் மனிதன் ஒட்டகமாகிவிடுவான் அதில். இந்தியனுக்கு ஒரு வாரம் போதாதா? அரபிகளின் உஷ்ணத்தில் குளிரே சூடாகத்தானே இருக்கிறது? ‘தேரா’ போய் ஏசி வேலைசெய்யாத ஆடம்பர பஸ்ஸில் பகலில் திரும்பும் கொடூரம் தணிக்க நேற்றிரவு போகவில்லை. பக்கத்து ‘Oman transport’ பள்ளியில் ‘ஜூம்ஆ’ தொழுதுவிட்டு வரும்போது ஹோட்டலில் பெரிய கூட்டமாக இருந்தது. தந்துரொட்டி கிடைக்க தாமதமாகும். அதனாலென்ன? ஃப்ரிட்ஜில் முட்டை இருக்கிறது. பிரெட் இருக்கிறது. முட்டையை விதம்விதமாக சமைப்பதில் நான் எக்ஸ்பர்ட் . ஓட்டிலேயே ஒரு ஸ்பெஷல் dish செய்பவன் உலகத்தில் நான் ஒருவன்தான். ஏனோ ஓடு இன்று ஒத்துழைக்கவில்லை. சாப்பாடு இறங்கவில்லை. பசி..’தேரா’ போயிருக்கலாமோ? பகலும் நல்லவிதமாக சாப்பிட்டிருக்கலாம்..இரவுக்கு ஆணம் எடுத்துக்கொண்டு வந்திருக்கலாம். இந்த பசிக்கு பிரியாணி இருந்தால் நன்றாகத்தான் இருக்கும்..

3 மணிக்கு அறைக்கதவு தட்டப்பட்டது. இப்ராஹீம்.. அபுதாயில் உள்ளவர் இங்கே எப்படி? கையில் என்ன பொட்டலம்? துபாய் வந்தால் கூட அவீருக்கு இந்தநேரத்தில் வருவதற்கு பஸ்ஸும் கிடையாதே..டாக்ஸிக்கும் செலவுசெய்ய இயலாது அவரால். யாருகொண்டுவந்து அவரை இங்கு விட்டது? தம்பி செல்லாப்பாவாம்..இது அதைவிட ஆச்சரியம்! வெள்ளிக்கிழமை பகல் சாப்பாட்டுக்குப் பிறகு 2 மணி நேரம் தூங்காமல் அவன் எங்கும் கிளம்ப மாட்டான். அவீர் என்றால் இன்னும் கொஞ்சம் தூங்குவான். அவனா? சரி, இப்ராஹீம் என்ன அது பொட்டலம்?

‘மஸ்தான் மரைக்கான் கொடுத்தாரு. மீன் பிரியாணி. சூப்பரா போட்டிருந்தாரு. ஒரு வெட்டு வெட்டிப்புட்டு உங்களுக்கு எடுத்துக்கிட்டு வர்றேன்!’

அடுத்தவாரம் வரும் முஹர்ரம் விடுமுறையில்தானே துபாய் வருவேன் என்று சொல்லிக்கொண்டிருந்தார் ஃபோனில்? ஆனால் ஆபிதீனுக்கு இந்தவாரமல்லவா பசி? ஹரிஹரனின் புதிய கஜல் ‘பைகாம்’ வந்திருப்பதாகக் கேள்விப்பட்டேன். துபாயில் தேடி கிடைக்கவில்லை. அதையும் கொண்டு வந்திருந்தார். ஜப் வோ மேரே கரீப்…

*

11.05.1996 காலை..

haz1996diary - img08 - july14diary2

இன்று சனிக்கான வண்ணம் கருப்பு. ‘SS’ன்போது நான் வெள்ளை ஜட்டி அணிந்திருந்தேன். குளித்துவிட்டு வரும்போது படிக்கட்டு ஓரமாக இந்த அழகான ஒற்றை இறக்கை (என்ன கொடூரம், ஒற்றை இறக்கை அழகா?) கிடந்தது. பார்த்ததும்தான் தவறு உறைத்தது. இந்த இறக்கை சாகவில்லைதான். நாளைய Golden Yellowவும் காட்டுகிறதே..வாழ்ந்தால் இப்படி வாழ வேண்டும். (யாருடைய டைரியிலோ?!)

*

கம்பெனியில் இருக்கும் அக்கவுண்டிங் சாஃப்ட்வேரில் ஒரு குறிப்பிட்ட ஜெனரல் லெட்ஜர் Head Code க்கு கீழ் வெவ்வேறு levelகளில் subcodes இருக்கும். உதாரணமாக 5404003ஐ debit செய்யும்போது அதற்கு முன்னுள்ள levelஐ, Head Codeஐ (Ex. 5404) update செய்யும். ஒவ்வொரு codeன் master-இலும் அதற்கு உண்டான முதல்நிலை code குறிக்கப்பட்டாலும் இந்த லாஜிக் எனக்கு விளங்காமல் இருந்தது. Acct.Dbf ஃபைலையும் பார்க்க இயலாமல் protect பண்ணி வைத்திருந்தார்கள். Not a database File..! Debug மூலமாக இதை உடைத்து Structureஐ , fileஐப் பார்த்தாலும் இதற்காக – நான் தனியாக டெவலப் செய்ய இருக்கும் Abedacc Financial Manager Softwareக்காக – எழுதும் ப்ரோக்ராம்கள் அதன் லாஜிக் காரணமாக தோல்வியைத் தந்துகொண்டிருந்தன. நான் எனது புத்திசாலித்தனத்தை அதிகம் காட்டினேனோ என்னவோ. இரண்டு நாளைக்கு முன்பு ‘இஸ்மு’க்குப் பிறகு இது இன்று வெற்றியாக வேண்டும் என்று ஃபோகஸ் செய்தேன். அன்று பகல் ‘தேரா’வில் சாப்பிட்டுவிட்டு தூங்கி எழுந்திருக்கும்போது ‘பளிச்’ என்று ஏதோ புகுந்தமாதிரி இருந்தது. அட, ரொம்ப சிம்பிள்! முன்நிலை codeஐ எடுத்துக்கொண்டு அது blankஆகும்வரை தொடர்ந்து replace செய்யவேண்டும். Codeஐ PopUp மூலமாக முதலில் பெற்றுக்கொள்ள வேண்டும் (தனியாகவும் read பண்ணி பெறலாம்). பிறகு Amountஐ read செய்து Update பண்ணிவிட வேண்டும்.

mcode = a_code && Account Code
magain = .t.
do while magain
seek mcode
repla a_balance with a_balance+mamount
mcode=a_pcode && previous code
magain=iif(mcode=space(10),.f.,.t.)
enddo

மெயின் லாஜிக் இதுதான். மற்றபடி Assetல் – Provision வருவதுபோன்ற நிலைகளில் – replace செய்யும் முறை மாறுமே தவிர மூளை இதுதான். குறித்துக்கொண்டு வந்து செயல்படுத்தினேன். இந்த வயதில் Basic கற்று, Perpetual Calendarஐ கண்டுபிடித்த சர்க்காரின் (‘for’ loopஐ பயன்படுத்தி கண்டுபிடித்தார்களாம்) சீடன் நான். வெற்றி கிடைக்காமலா போய்விடும்? அது புகுந்த விதம்..!

*

13-20.10.95 கேஸட்டிலிருந்து..

‘இலக்கியம்ங்குறதெல்லாம் ‘வானத்தை தொட்டுக்கிட்டிக்கிது மலை’ங்குறது. அளஹான இலக்கியம். 413 அடி 3 இஞ்ச் – இது சயின்ஸ். எல்லாருமே அறிவாளியா ஆயிட்டாங்கண்டு சொன்னா எண்ணெய் தேய்க்காத தலையும் அழுக்குள்ள கழுத்துப்பட்டியும் மஞ்சள்காமாலை வந்தமாதிரியுள்ள கம்கட்டும்தான் பார்க்கலாம். அழகு உண்டாக்குறது குழந்தைகளும் பெண்களும்தான். purely emotional creatures. இப்ப நான் கேட்குறேன், நாமல்லாம் rational creaturesண்டு சொல்லிக்கிட்டிருக்கோமுலெ? உண்மைதானா அது? rational creaturesஆ இருந்தாக்கா பொருளாதார சம்பந்தமான பயம் வருமா வராதா? கேள்வி கேட்டுக்கிட்டே இக்கிறேனேண்டு நெனைக்காதீங்க, (சும்மா) சொல்றேன்!’ – ‘S’

‘பணத்தைப் பத்தி கவலை பணக்காரனுக்கும் இக்கிது’ – ரவூஃப்

‘நான் கேட்டது அது அல்ல. நம்மள்ட்டெ நிறையா பணம் இக்கிது. இது கம்ப்ளீட்டா சூறையாடப்பட்டாலும் சரி, with in a week, with in a month நாம மறுபடியும் பெருசாயிடலாம் அப்படீங்குற நம்பிக்கை இக்கிதா? கண்ட்ரோல் பண்ணி இக்கிறாங்களா? அப்ப, தானா வந்திருக்கு! behaviourக்கும் actionக்கும் வித்யாஸம் தெரியும உனக்கு? தெரியுமாண்டா உனக்கு தெரியக்கூடாதுண்டு அர்த்தம் அல்ல, என் way of talk..இப்படித்தான் நான் பேசுவேன்.நீங்க தெருவிலே போறீங்க, ஒரு நாய் உங்க மேலே பாயுது, நீங்க பொம்பள மேலே சாஞ்சிடுறீங்க. நீங்க பொம்பளை மேலே சாய்ஞ்சது உங்க செயலா?’

‘….. ……’

‘அப்படி நீங்க அப்படி சாயும்போது அவ மார்புலே கை பட்டுடுது. என் மார்லெ கை போட்டுட்டாண்டு அவ சொல்றது ஞாயமில்லே. அப்ப இந்த செயல் குற்றமாகும்? voluntarily செஞ்சாத்தான்.. கொடி அசைஞ்சதுண்டா காத்து மேலே உள்ள தப்புதான். அதே மாதிரி பிதுரார்ஜித சொத்து, பரம்பரை சொத்து உங்களுக்கு வந்தாலே நீங்க பணக்காரன் அல்ல. நீங்க இல்லாம வேற ஆள் அங்கே நிண்டான்னா அவனுக்கு வுழுந்திருக்கும். நம்ம பிரின்ஸிபிள்லெ என்னான்டா பணத்தை இழுக்க முடியும். இழுக்கனும். இழுக்குற capacity உங்கள்ட்டெ இக்கிதுங்குறேன். இப்ப சொல்லுங்க, நம்ம ஊருலே உள்ள பணக்காரங்களுக்கு ‘நாமதான் பணத்தை இழுத்தோம்..நாம நினைச்சா நம்ம புள்ளக்குட்டிக்கு கொடுக்கலாம், செல்வம் ஒரு பொருட்டல்ல, இதே மாதிரி எத்தனையோ செல்வம் இக்கிது, எல்லா செல்வத்தையும் அடைய முடியும், ஆல்ரவுண்டா வாழ முடியும்ங்கிற நம்பிக்கை இருக்கா? இல்லே, மாத்திரைபோட்டுக்கிட்டு தூக்கத்தை வரவழைக்கிறானுவளா? இது ‘ஊர்பிஸாது’ அல்ல, நாம புரிஞ்சிக்கனுங்கிறதுக்காக சொல்றேன். பத்துகோடி ரூபாயை வச்சிக்கிட்டு இந்த மாதிரி இருக்க ரெடியா அல்லது வெறும் ரெண்டு லட்ச ரூபாய வச்சிக்கிட்டு நம்ம ரூட்டுலெ இருக்க ரெடியா?’

‘ரெண்டாவது’

‘ம்.. பணக்காரனா மட்டும்தான் ஆக முடியும் அதுலெ. வாழ முடியாது. வாழ்க்கைங்குறது டிஃபரெண்ட் from பணம். அதுக்கு சில தியாகங்கள்லாம் பண்ணித்தான் ஆகனும். இப்ப நம்ம ரசூலுல்லா மாதிரி இக்கிறோம். காஞ்ச ரொட்டிய திண்டுதான் ஆகனும். இது ஸ்கூல். படிச்சித்தான் ஆகனும். சரி, இப்படி நெனைக்கிறீங்களா? நான் சொல்லித்தந்த மாதிரி உள்ள முறையை நீங்கள யோசனை பண்ணி கண்டுபிடிக்க முடியும்டு நம்புறீங்களா?’

‘முடியாது’

‘அப்ப நான் சொல்றதை கேட்டுத்தானாகனும். கஷ்டமாத்தான் இக்கிம். ஆனா worth having.’

*

‘ரெண்டு ரூவா சம்பாதிக்கிறதுக்காக காலையிலேர்ந்து ராத்திரி வரைக்கும் பீடிக்கடை வச்சி உட்கார்ந்துகிட்டு எதிர்த்த கடையை பார்த்து எரிச்சல், போறவன் வர்றவனைப் பார்த்து எரிச்சல்..’கச்சடாப்பய சிகரெட்லெ குடிக்கிறான்!’டு.. நம்ம பீடி விக்கலையே! இதுக்குப் பதிலா , உட்கார்ந்த இடத்திலேயே ஒரு விரலை அசைச்சா அண்டசராசரத்தையே அசைக்கலாம்! இதுக்குத்தான் ஆண்டவன் உங்களை படைச்சிக்கிறான். நீங்க பலபேர்ட்டெ பழகி உங்க சக்தியை இழந்து உங்களையே நீங்க மறந்துடுறீங்க. இந்த aimக்கு நான் சொன்ன ப்ராக்டிஸ் வழிவகுத்து கொடுக்குதா? இதை தெரிஞ்சிக்கிற வழி என்னா what we are today is the result of at we were in the past-ண்டு புரியணும். இது நல்லா புரியுதுண்டா இன்னக்கி எதுவாக நாம இருக்குறோமோ அது நாளையுடைய காரணம். இந்த ரிஸல்ட் நாளைக்கி வரும். 2nd Golden Time..’

*

‘என்னெட்ட வந்த பிறகு உங்களுக்கு நோய்நொடி குறைவா இருக்கனும். மெடிக்கல் செலவு குறைஞ்சி போவனும். குறையனும்டு அர்த்தம் அல்ல. குறைஞ்சி, போயிடனும்! அறவே இருக்கக்கூடாது. மெடிகல் செலவே வராது. தலையிடி வரலாம், ஒரு மாத்திரை போட்டா சரியாவுற மாதிரி. அது வேறே..அப்ப ஹெல்த் என்கிற செல்வம் டெவலப் ஆகுதுண்டு நான் சொல்றேன். நீங்க ஒத்துக்குறீங்களா இல்லையா?’

‘ஒத்துக்குறோம்’

‘வேற என்னான்னா செல்வம் டெவலப் ஆகுது? தெளிவுச் செல்வம், அறிவுச் செல்வம் டெவலப் ஆகுதா?’

இந்த கேள்விக்கு ஒரு தலைதான் ஆடுகிறது. அதுகூட தூக்கமாக இருக்குமோ என்னவோ..

என் தலை!

*

‘பணக்காரண்டு பேங்க் கேஷியரைத்தான் சொல்லலாம். ஏன், போஸ்ட்மேனையும் கூடத்தான் சொல்லலாம். பணம் வச்சிக்கிறவன்! அந்த பணம் அவன் சேர்த்ததா இருக்கனும். எப்படி? உட்கார்ந்த இடத்துலேயே! அதுக்கு கொஞ்ச நாளாவும். ஓடியாடி சம்பாதி! நம்ம பாயிண்டே பிசினஸ் நடத்தி எப்படி செழிக்குறதுங்குறதல்ல. ஆல்ரவுண்டா- with spiritual force – வாழனும்ங்குறதுதான்’ – ‘S’

*

Practice-ஆல் கோபம் அதிகமாக வருகிறது தனக்கு என்கிறார் ஒரு சீடர். ‘இப்ப நம்ம பேச்சுல, அசைவுலே, கை வீசுற வேகத்துலே, சட்டைய வேகமா போடுற வகையிலே, பொத்தானை கிழிக்கிற வகையிலே கோவத்தை காட்டிடுறோம். அங்கே அதையெல்லாம் காட்ட முடியாது. எல்லாம் திரண்டு நிக்கிம்லெ? பொங்கித்தானே வரும்?’ என்று சொல்லும் சர்க்கார் ஒரு வழியும் சொல்கிறார்கள்:

‘ரூம்லெ பூந்துகிட்டு ‘ஒக்கால ஓலி, ங்காத்தால ஓலிண்டு கத்துற வழி , சுவத்துலே மண்டையாலெ முட்டிக்கிற வழி இக்கிது. எல்லாத்தையும் உட்டுப்புட்டு என்னோட ‘ஜம்’ பண்ணுற வழியும் இக்கிது. எது பாசிடிவ்ண்டு பாத்துக்குங்க. முந்தைய ரெண்டு பண்றதுக்கு இங்கே வரவேண்டிய அவசியம் இல்லே. வரவும் கூடாது’

சர்க்கார் பல ஸ்விட்ச்கள் வைத்திருக்கிறார்களாம். ஒன்று சட்டையை எப்படி போடுவது எப்படி என்று சொல்லும். மற்றொன்று ஒரு பிரச்சனையை தீர்க்கும் வழி சொல்லாது, செய்து விடும்! இன்னொரு ஸ்விட்ச் நமக்கு என்ன ஆகவேண்டுமோ அது எந்த மூலையில் இருந்தாலும் சரி, எடுத்துக்கொண்டு வந்துடுமாம். ‘எல்லா ஸ்விட்சையும் நான் தர்றேன். முதல்லெ (புதுவீட்டு) wiring வேலை முடியட்டும்!’ – ‘S’

*

‘முதலாவதாக உனது வாழ்க்கை என்பது என்ன, அதில் வாழ்வது என்பது என்ன என்று உனக்குத் தெரியுமா? நான் கேலி செய்யவில்லை, சாதாரணமாகத்தான் கேட்கிறேன். உங்கள் தந்தை, உங்கள் தாய், உங்கள் சமூகம், உங்கள் ஆசிரியர், உங்கள் அண்டைவீட்டார், உங்கள் மதம், உங்கள் அரசியல்வாதி ஆகியவர்கள் உங்களிடம் இதுதான் வாழ்க்கை என்று கூறுவது உங்கள் வாழ்க்கை அல்ல. உங்களுடையதோ அல்லது மற்ற எவருடையதோ அல்லாத ஓர் வாழ்வுமுறையை நீங்கள் கண்டுபிடிக்க வேண்டும். பின் அதுதான் வாழ்க்கை, பின் நீங்கள் வாழ்ந்து கொண்டிருக்கிறீர்கள்’ – ஜே. கிருஷ்ணமூர்த்தி (இறந்த வருடம் 1986. பிப்ரவரி 17)

*

13-20.10.95 கேஸட்டிலிருந்து சர்க்கார்:

‘ஒரு காரியத்தை தனிப்பட்ட முறையிலே முடிக்க முடியலே..தீர்மானிக்க முடியலே’ – சீடர்

‘Body ரிலாக்ஸ்டா இல்லாம இக்கிம். தூக்கம் குறைச்சலா இருந்தாலும் அப்படித்தான் இக்கிம். அதான் cosmic habit உங்களை பிக்-அப் பண்ணலையில்லே.. சமாளிச்சிட்டுத்தான் வரணும். என்னாண்டு கேட்டா, ‘இந்த மலைக்கு மேலே ஏறிப்பாரு, சைனா தெரியும்’டு சொன்னவுடனேயே நீங்க ரெண்டுஅடி ஏறிட்டு ‘இன்னும் தெரியலையே..இன்னும் தெரியலையே..பத்து நாளு ஏறிட்டேனே..தெரியலையே’ண்டு சொல்றமாதிரி. அங்கே 25 நாளைக்கு ஏறனும். அப்ப இந்த கேள்வியே வராது!’

‘ஒரு பொருள், இடம் வாங்கும்போது நாலுபேர்ட்டெ கேட்டு வாங்க சொல்லுது, சரியா சரியாண்டு கேட்குறேன்’ – கவுஸ்மெய்தீன்

‘இதை உடைங்க. தூக்கிப்போடுங்க. கேட்காம செஞ்சா என்னா வந்துடப்போவுது? என்னாவப்போவுது? என்னா தப்பு?’

‘அதிகமா விலைகொடுத்து வாங்கிடுவோம்டு..’

‘சரி, மயிர்ல ஒண்ணு போச்சு! நீங்க சம்பாதிச்சதுதானேங்க? கையை வெட்டியா கொடுத்தீங்க? கையிலெ இருந்த பீயைத்தானே கொடுத்தீங்க? அதை சம்பாதிச்சிடப்போறீங்க. ஏன் ஏங்குறீங்க? உங்க திறமையாலே வாழும்போது மட்டும் கரெக்டா வாழ்ந்துட்டீங்களோ? உங்களுக்கு தெரியாம அவனவன் அமுக்கிட்டு போயிட்டானே, அதுக்கு என்னா செய்வீங்க? இன்னொரு ஆளுட்டெ கேட்குறீங்களே..அவர் யாரு? நிலத்தைப் பத்தி தெரிஞ்சி, பொருளாதாரத்தைப்பத்தி தெரிஞ்சி..உங்கமேலே அக்கறையும் உள்ளவரா? என்னெட்டெ கேளுங்க. நான் உங்கமேலே பிரியம் வச்சிக்கிறேன். அக்கறை, ஆசை வச்சிக்கிறேன் – நீங்க நம்புனா! மத்த யாரையும் நம்பாதீங்க. உங்களுக்குள்ளேயே ஒவ்வொரு ஆளையும் நம்பமுடியுமாண்டு நான் பிறகுதான் சொல்லனும்!’ – ‘S’

*

‘நம்மள்ட்டெ சக்தி இருந்தாக்கூட நான் அதை பண்ணுவேண்டு பேசுறதை விட இல்லாததுமாதிரி நடிக்கிறதுதான் நல்லது. அப்படி அல்லாம சேலஞ்ச் பண்ண ஆரம்பிக்கிம்போது பலமாதிரியான விளைவுகள் ஏற்படும். குனிஞ்சி போற மாதிரி காட்டுறது தப்பல்ல. ஆனா நீங்க சும்மாதான் குனியனும், உள்ளத்தாலல்ல!’ – ‘S’

*

‘கொடுக்குறதுலேயே சிறந்த பொருள் ஏதாவது இருக்குதா? என்னக்கிம் மறக்க முடியாத பொருள், நீங்களும் நினைச்சி சந்தோஷப்படுறமாதிரி பொருள். சொல்லுங்க’ – ‘S’

‘மொஹப்பத்’

‘ஏன் அரபிலெ சொல்றீங்க? நீங்க மாஸ்டரா? ஏன், அன்புண்டு சொல்லாமுல்லே? காதல்ண்டு சொல்லலாமுல்லெ? அன்பை விட உசத்தி காதல். ஹை, சிரிப்பைப் பாருங்க, ஆண்டவன் போட்டு பின்னி வச்சிக்கிறான் மனுஷனை!. அன்பைக் கொடுங்க. கெட்டவனா இருந்தாலும் சரி.. ‘ஆண்டவனே நல்லவழி காட்டு இவனுக்கு’ண்டு கேளுங்க. நீங்க கேட்குறதுனாலே பலிக்கப்போறதில்லே..பலிக்காது. ஆனா பலிச்சா பலிச்சிட்டு போவட்டுமேங்க! ஒருவனை வெறுப்பதன் மூலமா கசப்பை மனசிலே ஏற்படுத்தி நீங்க ஏன் நரகவேதனை அனுபவிக்கிறீங்க? இமாம் ஜாஃபர் சாதிக் ரலியல்லாஹ் சொல்லியிக்கிறாஹா ஒரு இடத்துலே.., நான் எழுதியிருக்கிறேன், ‘அவனைப்பார்த்து நீ எரிச்சல் படுறா.. நீ எரிச்சல் படும்போது நீ என்னான்னா அவதிப்படுறாண்டு அவன் புரிஞ்சிக்கிட்டான்னா அவுத்துப்போட்டு டான்ஸ் ஆடுவான், ‘ஹையா.ஹையா’ண்டு கூத்தாடுவான்’டு. இப்படி எழுதலே, சாரம் அதுதான்’

*

‘எந்தப் பிரச்சனை இருந்தாலும் தீர்க்கமுடியும்ங்குற நம்பிக்கை இக்கிற வரைக்கிம் பிரச்சனையே கிடையாது. பிரச்சனைண்டா என்னாண்டு அர்த்தம்? Question without Answer. Once Answer கெடச்சிட்டா there is no problem. இல்லே, கிடைக்கிம்டு நம்பிட்டாவே முடிஞ்சிபோச்சி. இப்ப அடுத்த கேள்வி வருது. problem அறவே இல்லாம வாழமுடியும்டு தோணுதா இல்லையா?’

‘தோணுது’

‘சரி, நீங்க சொன்னீங்களே.. பிரச்சனை வரும்போது இன்னொரு ஆளுட்டெ சொல்லி கேட்குறது..அதுக்கு இங்கேயே ஒரு similarity சொல்லுங்க. எல்லாத்தையும் similarity வச்சிதான் கொண்டு போவனும். பெரிய செயலை மாத்தாதீங்க. முடியாது. அதுக்கு மூலமா உள்ள சின்ன செயல், சின்ன அசைவுதான் முக்கியம்’

உட்காருகிற மாதிரி நடித்துக்கொண்டு தூணோடு சாய்ந்திருக்கிற சாவன்னாசாபுதான் similarity. (‘அதென்னா, புள்ள பெறுற மாதிரி!’ – ‘S’)

*

‘சிஹாபுநானா நானா காலையிலே மெட்ராஸ¤லேர்ந்து ·போன் பண்ணி , ‘காலையிலே வவுத்தாலே போனிச்சி..மாத்திரை போட்டேன் தேவலை’ண்டாரு. நான் கூட கேட்டேன், ‘குசு வந்திச்சா’ண்டு. அதை அவர் சீரியஸா, நான் ஏதோ spiritual lineலெ ஏதோ சொல்றேண்டு நெனைச்சிக்கிட்டு, ‘இல்லே..பீதான் வந்திச்சி’ண்டாரு’ – ‘S’

ஜே.கே.. வாழ்க்கையில் குசுக்கள் தவிர்க்க முடியாதவை, நீங்கள் அல்லது உங்களின் சீடர்கள் விட்டிருக்கிறீர்களா?

*

கையைக் கட்டுப்படுத்து:

‘எத்தனையோ குமரை (கன்னிப்பெண்) கரைசேர்த்தவள்ற மவ இன்னைக்கி குச்சிக்காரியா இக்கிறா. ஞாபகமிருக்கா, மாலிமார்த்தெருவிலே போய்க்கிட்டிக்கிம்போது ஒத்தவ என்னைய கூப்புட்டாளே..நான் போயி காசு கொடுத்துட்டு வந்தேனே..எத்தனை குமரை அவ கரைசேர்த்தா தன் காலத்துலெ! ‘கையை ரொம்பவும் நீட்டாதே.. கழுத்தோடவும் கட்டிக்காதே’ண்டு ஹதீஸ் இக்கிது. ஆயத்து இருக்கு. எப்படி நீட்டணும், எந்த அளவு நீட்டனும்டு ஒரு கணக்கு இக்கிது’- ‘S’

இறந்த சினிமா வசனகர்த்தா ஜனாப். இனியவன் சர்க்காரின் ‘ரியாலத்’ பண்ணியவர்தான். தொடர்ந்து செய்ய மாட்டாராம். ‘விட்டாக்கூட அந்த ரியாலத்தோட பவர் கொஞ்சநாளைக்கி இக்கிது’ம்பான். பேங்க்லெ உள்ள பணத்தை எடுத்தாக்கூட எடுக்க எடுக்க வருதுண்டா எத்தனை நாளைக்கி வரும்? நீ மேலும் போட்டுக்கிட்டே இருந்தா எடுத்துக்கிட்டேவுலெ இருக்கலாம்! ஒண்ணு செய்யும்போது பாசிடிவ் குவாலிடியைத்தான் டெவலப் பண்ணிக்கனும்’ – ‘S’

*

‘வெள்ளித்தூளு, இரும்புத்தூளு, தங்கத்தூளு.. எல்லாத்தையும் ஒரு பாட்டில்லெ போட்டு ஒரு குலுக்கு குலுக்குங்க. ஒரு கோடி தடவை குலுக்கினாலும் சரி, ஆரம்பத்துலே இருந்த மாதிரி வரவே வராது. ‘க்ளைடாஸ்கோப்’ பாத்திக்கிறீங்களா? ஒரு தடவை வர்றது மறுபடியும் வராது. வரும், உள்ளெ போட்டிருக்கிற சில்லு கொஞ்சமா இருந்தா. அதிகம் போட்டிங்கண்ட வரவே வராது. மாத்தி மாத்தித்தான் வரும். அதேமாதிரி இந்த தூளையெல்லாம் காய்ச்சி ஊத்திட்டா என்னா செய்வாஹா? தனியா பயிற்சி பன்றது காய்ச்சி ஊத்துறமாதிரி. எங்கே இருந்தாலும் சரி, நாம நாமளாத்தான் இருப்போம். The Great Minds think alike அப்படீங்குறாங்களே..அவங்கள்லாம் தனியா இருந்து – அல்லது சமுதாயத்திலே இருந்தாக்கூட – நன்மையா இக்கிறதா நெனைச்சி , எண்ணி எண்ணி வளர்ந்தவங்க. நமக்குலாம் ஒரு சின்ன மனாராடி காத்து போதும்! எதுக்கு சொல்றேண்டா நீங்க சொசைடில இக்கிம்போது ‘நாம தனியா வாழனும்.. We must be different from othersண்டு நெனைச்சிக்கிட்டே இரிங்க, அதாவது towards பாசிடிவ் சைட். இல்லே, நினைக்க வாணாம். இந்த பிராக்டிஸ் (‘SS’) பண்ணுங்க’

‘ரொம்ப கெட்டிக்காரன் யாருண்டா ஜனங்கள்ற பார்வையை வச்சே வளர்ந்துடுறவன். at the same time அவன் ஜனங்களுக்கு தீங்கு செய்யக்கூடாது. ரொம்ப ஈஸி. கொஞ்சம் கண்ட்ரோல் வேணும். ‘ஒவ்வொரு பொருளும் அதற்கு எதிர்மறையானதை வச்சித்தான் கண்டுபிடிக்கப்படுது, உணரப்படுது, விளங்கப்படுதுண்டு சொல்வாங்க. ஆண் என்றால் என்ன? பெண்ணுக்கு எதிரானவன். தண்ணிக்கு எதிரானது நெருப்புண்டு சொன்னாக்காக்கூட ஆக்சுவலா அப்படி அல்ல. தண்ணி நெருப்பை அணைக்குது. நெருப்பு பெருசா இருந்தா தண்ணியை அழிச்சிடுது – நீராவியா மாத்திடுதுல்லே! அது இதை அழிக்குது, இது அதை அழிக்குது.. ஃபுட்பால் கேம் மாதிரி. ஒரு டீம் ஒரே நேரத்துலே இந்த சைட்லெ இருப்பான். இன்னொரு நேரத்துலெ அடுத்த சைடுலெ இருப்பான்’

‘அழுக்கு சட்டையைப் போட்டுக்கிட்டு , கடைத்தெருவுலெ நாலுநாளு சோர்ந்துசோர்ந்து நடந்து போங்க – காத்தடிச்ச இலைமாதிரி, பூனைக்கிழவி பறந்துபோற மாதிரி. நாலாவது நாள் உங்க லைஃபை உத்துப்பாருங்க. இப்படி இல்லாம, வச்ச சாமானை எடுக்கப்போறமாதிரி ‘விருட்’டுண்டு போங்க. சும்மா! யார்ட்டேயும் பேசாதீங்க. ‘சர்ட்’டுண்டு போயிட்டு ‘சர்ட்’டுண்டு வாங்க! முதல்லெ ஹெட்வெயிட்ம்பான். அப்புறம் , ‘ஏதோ இக்கிது போலக்கிது’ம்பான், ‘பரவாயில்லையே..வெள்ளையும் சள்ளையுமா இக்கிறானே’ம்பான். அப்ப, ஜனங்களை வச்சி நாம வாழுறோம். இந்த அளஹான வாய்ப்பு நாம பயன்படுத்துறதுக்கு காத்துக்கிட்டிக்கிது. சமுதாயத்துல கிடைக்கிற பெஸ்ட் ரிஸல்ட் இது’ – ‘S’

*

‘நடக்கும்போது, பேசும்போது, கண்ணால பாக்கும்போது, பாக்குற பார்வையை அசைக்காம பாக்குறது – அசைக்காம பாக்குறோம்டு தெரியப்படுத்தாம பார்க்கனும்- அங்கெதான் திறமை இக்கிது. கடைக்குப் போறீங்க, 555 (சிகரெட்) இருக்கா? இருந்தா வாங்கிட்டு நேரா பொய்டுங்க. ‘என்னா மரைக்கான், சௌக்கியமா இக்கிறியா’ண்டு ஆரம்பிச்சா… முடிஞ்சிச்சி!’
*

‘ஜனங்கள வச்சே வளர்ந்துடுலாம்டு சொல்லிப்புட்டேன்..சரி ஜனங்கள்ட்டேர்ந்து என்னா அடைவீங்க?’ – ‘S’

‘அவங்களோட நாம உயர்ந்தவங்கன்ற எண்ணத்தை அடையிறோம்’ – பரமசிவம்

‘என்ன , ஒரு ரெண்டு இஞ்ச் உசரமா இருந்தா பரவாயில்லையா?! செல்வமா அடையிறது? அடையிறது செல்வம் மட்டுமில்லேங்க, எல்லாத்தையும் அடையிலாம். நடக்குற வேகத்துலே சுறுசுறுப்புக்காரன்ங்கறதை அடையிலாம், ஹெல்த்தை காட்டலாம், பணம் காசு எடுக்குற கொடுக்குற முறையிலே செல்வத்தை பெருக்கிக்கிடலாம். ஆக, அவன்ற சக்தியை வச்சி நாம வளரலாம். அந்த ஹராமான காசுலெ வளர்ந்து பிறகு சோறு ஆக்கிப்போட்டுறுங்க! அவங்க காசுல அது! தெரியாத்தனமா உங்களுக்கு கொடுத்துக்கிட்டிக்கிறான். தனக்குத்தானே யூஸ் பண்ணுனா அவன் மேலே பொய்டுவான்!’

*

‘வெறும் காசை மட்டும் நெனைக்க வாணாம். மத்த செல்வத்தையும் அடையனும். Correctness, Neatness, சொன்னா சொன்ன மாதிரி நடக்குறது’ – நேற்று வருவதாகச் சொல்லிட்டு இன்று வந்த சீடரைக் காட்டி , ‘இவர் மாதிரி’ என்று ஒரு வெடை! – ‘எல்லாத்தையும் அடையனும். once இந்த குணங்களை உண்டாக்கிட்டா அடுத்த தடவை தவறு செய்யும்போதுகூட ‘அப்படி உள்ளவனல்ல’ண்டு சொல்ல ஆரம்பிச்சிடுவான்’

‘அழுக்கு ரப்பர் சுவைச்ச புள்ளைக்கி புது ரப்பர் கொடுத்தா சூப்பாது! அழுக்கு நாத்தத்துலே ஒரு இன்பம் அதுக்கு. நாம அழுக்கை விட்டு மேலே போலாம்டு ஆசைப்படுறோம். நம்மள்ட்டெ எது இல்லையோ அதை அடைய முயற்சி பண்ணுறோம். வெறும் முயற்சி பத்தாது. full practice. mind கூரா ஆவனும். Man is the creation of habits’

‘பம்பரம் விளையாடும்போது பாரு. பார்த்து ரசி. ‘பொதக்’ விளையாடும்போது பார்த்து ரசி. பக்கத்துலே (மட்டும்) உட்கார்ந்துடாதே!’ – ‘S’

*

சர்க்கார் திருந்தி விட்டார்கள் ! :

‘நானும் ஒரு கூட்டாளியும் நூக்கடைத்தெருவுலெ வந்துக்கிட்டிக்கிறோம்.. ஜூம்-ஆ தொழுவிட்டு ஜனங்க வந்துக்கிட்டிக்கிறாஹா.. அப்பவுலாம் நான் திருந்திட்டேன், தொழுவுறதில்லே! ஏண்டா, ‘ஜூம்ஆ’ தொழுவும்போது நீங்க என்னா செஞ்சீங்கண்டு (என்னை) கேப்பீங்கள்லெ?! இதுதான் கேட்கப்படாத கேள்விக்கு பதில்ங்குறது! – ‘S’, ஒரு பழைய சம்பவம் சொல்லும்போது.

*

‘மக்களோடு பழகும்போது தன்னை திருத்திக்கொள்ளாதவன் தனிமையில் தன்னைத் திருத்திக் கொள்ள முடியாது’ – ‘S’

*

‘நம்ம பிரச்சனையை நாமதான் சமாளிக்கனும். அதாவது அதை சமாளிக்கிறதுக்கு என்ன சக்தி தேவையோ அதை டெவலப் பண்ணிக்கனும். இதை செய்யச் செய்ய , எனக்குத் தெரியாத செய்திகள்லாம் உங்களுக்குத் தெரிய ஆரம்பிக்கும். என்னெட்டெ அப்ப கேட்டுக்கனும். அதை இம்ப்ரூவ் பண்ணித் தர்றேன். யாருக்காச்சும் சொல்லவேண்டிய வாய்ப்பு இருந்த அதை சொல்லுவேன்’

*

‘கொஞ்சம் என்பதும் இல்லை என்பதும் equal’

*

‘Mainஆ உள்ள அசைவு ஃபர்ஸ்ட் எங்கே வருது? நீங்க ஒண்ணு செய்யிறீங்க, செயல் எங்கே வருது முதல்லெ? ‘டீ போடு புள்ளே’ண்டு வாயினாலே சொல்றீங்க. இதுக்கு முன்னாலே எண்ணம் வருது.. டீ குடிக்கனும்டு நெனைப்பு வருது. அடுத்து போடச் சொல்லனும்டு நெனைப்பு வருது. சொல்ல நெனைச்ச உடனேயே , பொண்டாட்டி இக்கிறாளா, டீ தேயிலை இக்கிதா, அடுப்பு இக்கிதா, செய்வா-ளா…? எல்லாம் தீர்மானிச்சிட்டு சொல்றீங்க. அப்ப வெளிலெ சாதாரணமான செயல் என்பது ‘டீ போடு’ங்கிறது. Physical Bodyஐ பொறுத்தவரைக்கும் 3 மாதிரி action இக்கிது. ஒண்ணு Voluntary. அடுத்தது Semi Voluntary..அடுத்தது Involuntary. கண்ணு சிமிட்டுறது இக்கிது பாத்தீங்களா அதை கண்ட்ரோல் பண்ணலாம். Heart Beatலாம் Voluntary. Semi Voluntaryங்கிறது மூச்சோட்டம், கண் சிமிட்டுறது.. puslse-ஐக் கூட கண்ட்ரோல் பண்ணலாம். kidney, liver, digestive function இதெல்லாம் involuntary..ஆனா digestionகூட… ஒரு கவலை வந்துடுச்சிண்டா நிண்டுடுது. சாப்பிட்டாலும் செரிக்காது. அப்படி சாப்புட்டுட்டு தூங்கிட்டு 8 மணி நேரம் கழிச்சி முழிச்சி பாருங்க. 10 மணிக்கு முன்னாலெ உள்ள சாப்பாட்டு ஏப்பம் இப்ப வரும். ஏன் அப்படி வருது? செரிச்சி குசு வர்ற நேரத்துலெ எப்படிங்க ஏப்பம் வரும்? நீங்க பாக்குறதில்லே. அப்படீண்டா , ஆண்டவன் அறிவை எடுத்துக்கிட்டு பாரு பாருண்டு கொடுக்க கொடுக்க எனக்கு வேற வேலை இக்கிதுண்டு தள்ளி வுட்டுட்டீங்கண்டுதானே அர்த்தம்? இப்ப சொல்லுங்க, உங்க செயலிலேயே சின்ன செயல், ஈஸியான மிக மிக சின்ன செயல் எது?’

சர்க்கார், மெல்லிய நூலில் கட்டப்பட்ட வண்டின் கதையைச் சொல்கிறார்கள். வண்டு, 25 வருடங்களுக்கு முன்பு பறந்தமாதிரி அப்படியே பறக்கிறது!

‘இந்த மெல்லிய நூல் இக்கிதே.. அது மாதிரிதான் மூச்சு. நீங்க முச்சை கண்ட்ரோல் பண்ணுனா எதையும் செய்யலாம். How to control it?அதை நான் சொல்லித் தர்றேன். அதுக்கு சில basement இக்கிது. இந்த பயிற்சிலாம் அதுக்குத்தான். எல்லாமே களிமண்ணைக் குழைக்கிற மாதிரியுள்ள பயிற்சிதான். அப்புறம் விரலாலே ஒரு அமுக்கு! எனக்கு ரொம்ப ஈஸி. உங்களுக்கும் ஈஸி. என்னா செய்றோம்டு தெரியாமலேயே மேலே போயிருப்பீங்க! இத பாக்குறதுக்கு முன்னாலே பேசும்போது, கோவப்படும்போது, intercourse பண்ணும்போது, மூச்சோட்டம் எப்படி இக்கிதுண்டு கவனியுங்க. அதே மாதிரி ‘இபாதத்’ பண்ணிக்கிட்டிக்கும்போது, செக்ஸ்ல உள்ள மூச்சோட்டத்தை கொண்டு வந்தீங்கண்டா இபாதத், செக்ஸா மாறிடும். அப்ப எல்லா நியமத்தையும் எண்ணத்துக்கு அடுத்தபடியா , நெனைப்பு அடுத்தபடியா, மூச்சுலெதான் ஆண்டவன் வச்சிக்கிறான்’

*
ராஜயோகம் பற்றி சற்று விரிவுரை.

மலத்துவாரத்திற்கும் ‘மானி’க்கும் இடையில் ஃபோகஸ் செய்வதற்குப் பெயர் : தாரணை.
சமாதிநிலை : மஹாக்கபா-> முராக்கபா-> முஷாஹதா-> முகாலஃபா.

‘நம்ம ரூட்டுலெ முதல் நிலையிலேயே சமாதி நிலை வந்துடும்’ – ‘S’

*

‘ஓதும்போது எழுத்தைப் பார்த்து ஓதுங்க. மனப்பாடம் பண்ணுனதுலெ ஒரு வார்த்தைக்கூட – ஒரு வரிகூட – வரக்கூடாது’ – ‘S’

*

‘படிக்க முடியும்; அதே சமயத்துலெ வண்ணான் கணக்கையும் பார்க்க முடியும்டா என்னா அர்த்தம்? நீங்க படிக்கவே இல்லைண்டு அர்த்தம்! புஸ்தகத்தை கையிலெ வச்சிக்கிட்டு வண்ணான் கணக்கையும் பாத்துக்கிட்டிக்கிறீங்கண்டு அர்த்தம். இந்த பாயிண்ட் புரியாம நீங்க , படிக்கிறோம், மனசுல பதிய மாட்டேங்குதேண்டு நெனைக்கிறீங்க! எதையும் கவனிச்சி செய்யனும். கவனிச்சி செய்யிற பழக்கம் வரனும், செய்ங்கண்டு சொல்றேன். உங்க வேலை செய்யிறதுதான்!’

*

‘ரியாலத் நூத்துக்கு நூறு பழக்கமாயிடனும். அதாவது , எது பழக்கமாவனும்டு சொல்றேனோ அது பழக்கமாயிடனும். ஏன்னா, அதுக்கு ஒரு similarity இருக்கும் – மேலேயோ கீழேயோ. நாம செண்டர்லெ ஒரு பழக்கத்தை உண்டாக்கினோம்டா அதுக்கு மேலேயுள்ளதும் கீழேயுள்ளதும் மாறும். concentration நடுவாலே உள்ளதுதான். concentrationனால ஆயிரம் காரியத்தை சாதிக்கலாம். எல்லாமே concentrationதான் – மேலே உள்ளது. at the same time, கீழே உள்ளதையும் கண்ட்ரோல் பண்ணனும். நடக்கும்போது ஸ்டெப்-ஐ கரெக்டா வக்கிறது, சட்டை பட்டனை கரெக்டா மாட்டுறது, வாட்ச் ஓடுதாண்டு பாக்குறது, பேனா குத்துனா சாயம் இக்கிதாண்டு பாக்குறது, இப்ப ரீஃபிள் இருக்குதாண்டு பாக்குறது, டார்ச் எடுத்தா பவர் இருக்குதாண்டு பாக்குறது.. இப்ப உங்களுக்கு ஈசியா சொல்லலாம்டா, சைக்கிள்லெ உட்கார்ந்த உடனேயே பிரேக் வேலை செய்யிதாண்டு பாக்குறது. இதே similarityதான் கடைக்குப் போயி பசியாறதுக்கு முன்னாடி proper காசு இக்கிதாண்டு பாக்குறதும். கையிலே காசு இல்லாம போயி மாவாட்டுற நிலைமை வந்துடக்கூடாதுல்லே? ஒரு சின்ன செயலுக்கு உள்ள எஃபக்ட்-ஐ பாத்தீங்களா! அதாவது லைஃப்லெ each and everything linked to each other. linkஐ புரிஞ்சிக்கிறதோட பிராக்டிஸ்லெயும் கொண்டு வரணும்’

*

சீடர்களின் ‘ரியாலத்’தில் குறை இருக்கிறது.

‘நீங்க பண்ணுங்க எல்லா பயிற்சிகளும். அதே நேரத்துலே – ascimilating force, thought force, memory contents.,இந்த memory contentsலேர்ந்து நமக்கு தேவைப்படுறதை பிக்-அப் பண்ணிக்கிறது..for example, ஒரு செய்தி நமக்குத் தெரியனும், தெரிஞ்சாவனும்.. நம்மள்ட்டெ எல்லா செய்திகளும் இக்கிது; எதைத் தட்டிவுட்டு, எதைத் தோண்டி அந்த பாயிண்ட்-ஐ கொண்டு வர்றது, அதுக்கு எப்படி உட்கார்றது, எப்படி மூச்சோட்டம் இக்கினும்..அப்ப்டீங்குற பக்குவம்லாம் (உங்களுக்கு) இன்னும் வரலே. அதனால ரியாலத்-ஐ ஸ்பீட்-அப் பண்ண யோசனையா இக்கிது (எனக்கு)’ – ‘S’

*

‘கீழே போயி , at the same time , கீழே போறோம்டு தெரியாம இக்கிறான். இவனும் முட்டாப்பயதான். மேலேபோயி , மேலேபோறோம்டு தெரியாம இக்கிறவனும் முட்டாப்பயதான். இதுக்கு வேற உதாரணம் சொல்லுங்க பார்ப்போம்’ – ‘S’

‘….. …… ….. ‘

‘கையிலெ காசில்லாம இக்கிறது தப்பில்லே. இல்லேண்டு புரிஞ்சிக்கனும். காசுள்ளவன், இவ்வளவு காசு இக்கிது, வளர்ந்துக்கிட்டிக்கிறோம்டு உணர்ந்துக்கனும். குடையை கம்கட்டுலெ வச்சிக்கிட்டு இருக்குறவனுக்கு அது ஞாபகமில்லே! என்னா செய்வான்?’

‘மழையிலெ நனைவான்’

‘உஹும், இன்னொருத்தன்டெ பிச்சை கேட்பான்! ‘கொஞ்சக்கோனு இடம் கொடு’ம்பான். இல்லை, இன்னொரு ஆளோட குடையை வாங்கிக்கிட்டு – கம்கட்டுலெ உள்ள குடையோடு – செடிக்கு தண்ணி ஊத்துவான்!’ – ‘S’

சர்க்காரின் உதாரணங்கள் போல சில சீடர்களும் முயற்சிக்கிறார்கள்.

‘என் கோட்டுலேயேதானே வர்றீங்க.. பக்கத்துல இன்னொரு கோடு போட்டு வாங்களேன்!’ – ‘S’

இந்தக் கோடும் கோணல்!

‘தில்லானா மோகனாம்பாள்’லெ ஒரு பாட்டு இக்கிது. ‘மறைந்திருந்து பார்க்கும் மர்மம் என்னா’ண்டு..நீங்க ‘மறைந்திருந்து’ங்கிற வார்த்தைக்கு பதிலா ‘ஒளிந்திருந்து’ண்டு போட்டு, ‘மர்மம் என்னா’ங்கிறதுக்கு பதிலா ‘ரகசியம் என்னா’ண்டு போட்டு சொன்னா? அது ‘தில்லானா மோகனாம்பாள்’ பாட்டுதான்! இப்படியும் சொல்லலாம், ‘டடங்டடங்டங் டாங்டாங் டடங்டடங்டாங்..’ண்டும் சொல்லலாம்! இதுவும் ஒண்ணுதான்; அட, வேறமாதிரி சொல்லுப்பா; என் சந்தத்தை வுட்டுடு!’ – ‘S’

(தொடரும்)

குறிப்புகள் :

ரியாலத் – பயிற்சி
அவுலியா – மெய்ஞ்ஞானி
பிஸாது – அவதூறு
லாச்சாரா – தொந்தரவாக
துஆ – பிரார்த்தனை
எட்டு ரக்-அத் – ‘நஜாத்’ பிரிவினர்
ஜூம்ஆ – வெள்ளியன்று நடக்கும் கூட்டுத்தொழுகை
ஆணம் – குழம்பு
இஸ்மு – மந்திரம்
ஹராமான – விலக்கப்பட்ட
இபாதத் – இறைவனைப் பற்றிய சிந்தனை
நியமத் – அருட்கொடை

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s