சார்வாகன் ஒரு அபூர்வம். எதுக்குச் சொல்றேன்னா…

‘லீவு லெட்டர் கூட இருபது பக்கம் எழுதுகிறார்கள்!’ என்று நண்பர் யுகபாரதி கிண்டல்செய்வது போல – தினம் மூன்று நாவல்கள், முன்னூறு ‘அறிவார்ந்த’ கட்டுரைகள், எழுநூறு சிறுகதைகள் – எழுதிக் குவிக்கும் எழுத்தாளர் அல்ல இந்த சார்வாகன். 30 ஆண்டுகளில் இரண்டே சிறுகதை தொகுதிகள். அவ்வளவுதான். இப்போது எங்கியிருக்கிறார் என்று தெரியவில்லை எனக்கு. ‘க்ரியா’ வெளியீடான சார்வாகனின் சிறுகதைத் தொகுப்பிலிருந்து , புகழ்பெற்ற ஒரு கதையை பதிவிடுகிறேன். சிறுகதை’ எழுத முயற்சிப்பவர்கள் படிக்க வேண்டிய கதை இது. முக்கியமாக , நான் படிக்கவேண்டும்!

1993ல் வெளிவந்த தொகுப்பில் , சார்வாகன் தன்னைப் பற்றிச் சொல்ல விரும்பியது: ‘தாமரை, எழுத்து, ஞானரதம் ஆகிய பத்திரிகைகளில் (எப்போதாவது) அப்பப்போ எழுதியிருக்கிறார். சிறுகதை (25-30), குறுநாவல் (4), கட்டுரை (1-4) எழுதியிருக்கிறார். நாடகம், சினிமா, வசனம், ரேடியோச் சித்திரங்கள் எழுதினதில்லை. எழுத்தைத் தொழிலாகக் கொள்ளாததனால் மனம்போனபடி எழுதுகிறவர். அது அவர் அதிர்ஷ்டம். இவருடைய மகத்தான ‘மாஸ்டர்பீஸ்’ இனிமேல்தான் உருவாகப்போகிறது!’

33ஆவது சென்னை புத்தகக் கண்காட்சிக்கு நாளை கடைசி தினமா? க்ரியாவின் ஸ்டால் எண்: 224 & 225. வாங்கிப் படியுங்கள்.

இதெல்லாம் எதுக்குச் சொல்றேன்னா… நண்பர் தாஜ் அனுப்பிய, சார்வாகனின் ‘போன ஜன்மங்களும் வேறு உலகங்களும்’ கதையை பிறகு பதிவேன் என்றுதான்! சாமியார்களை கிண்டல் செய்யும் கதை அது. பதியாமல் போவேனா? ‘இலக்கியச் சிந்தனை’ அமைப்பால் தேர்ந்தெடுக்கப்பட்ட அவருடைய ‘கனவுக்கதை‘யையும் பிறகு பதிவிடுகிறேன் – ‘க்ரியா’ அனுமதித்தால்!

‘க்ரியா‘வுக்கு நன்றிகள்.

***

எதுக்குச் சொல்றேன்னா…
சார்வாகன்

அவன் பேசிக்கொண்டே போனான்: ” என்ன செய்கிறது சொல்லுங்கள். நாம் என்ன, கேட்டுக்கொண்டா பிறந்தோம். இல்லை, நம்முடைய அப்பா அம்மாவை நாமே தேடிக்கொண்டோமோ. யாரோ ரெண்டு பேர் என்னமாவோ முடிச்சுப் போட்டுக்கொண்டாங்க, நாம வந்து விழுந்தோம். பாலும் சக்கரையும் கலந்து வெக்கறப்போ ஈ வந்து விழுந்த மாதிரி. இது பொருத்தமில்லையோ? அப்போ சிரங்கிலே புழுவந்து தோணின மாதிரின்னு வெச்சுக்குங்களேன். எதுக்குச் சொல்றேன்னா , நாம வந்ததுக்கு நாம பொறுப்பாளியில்லே. ஆனாலும் வந்துட்டோம். வந்த பிறகு போகிறதுக்குள்ளே இருக்க வேண்டிய பொறுப்பு மாத்திரம் நம்மதாயிட்டுது. ஏன், நமக்குக்கூட சில சமயம் தோணுறதில்லையா, எல்லாத்தையும் ஒழிச்சிட்டு ஒரேயடியாப் போயிட்டா என்னன்னு? ஆனா எவ்வளவு பேர் அப்படித் துணிஞ்சு செய்யறோம். இயற்கையோட விதி நாம் இருக்கிறதுக்காகத்தான் வழி செய்துகொள்ளச் செய்யுதே தவிர இறக்கிறதுக்கு வகை செய்யறதில்லை. ஆனாலும் அதிசயம் பாருங்க, நாம் இருக்கிற ஒவ்வொரு நாளும் சாவை நோக்கியே ஒரு படி. எதுக்குச் சொல்றேன்னா, வாழ்வு என்கிறது பொறுப்பத்த வழியிலே ஆரம்பிச்சு, ஒரு நாள் நிச்சயமாப் பொக்குன்னு போகிற போக்கத்த வியாபாரம். இதிலே எதுக்கய்யா நாம அனாவசியமா நம்மைக் கஷ்டப்பட்டு வறுத்துஎடுக்கனும். என்ன வேதாந்தம் பேசறேன்னு பாக்கறீங்களா, வேதாந்தமும் இல்லை வெண்டைக்காயுமில்லை. அப்பட்டமான உண்மையைத்தான் சொல்றேன். உண்மைக்கும் பொய்க்கும் என்ன வித்தியாசம் சொல்லுங்க. உண்மை மாதிரி இருக்கும், ஆனால் அது உண்மையில்லை, அதுதானே பொய்? வேதாந்தமும் அந்தமாதிரி பொய். நீங்களே சொல்லுங்க நம்ம வாழ்விலே எது நிஜம்? நேத்து நடந்ததெல்லாம் போயிட்டுது. செத்துப்போனது. நாளைக்கு வரப்போகிறது வந்த பின்னாலேதான் நிச்சயம். அதுவரைக்கிம் அதுவும் நிஜமில்லைதான். நாளைக்கு குத்தப்போகிற முள் இன்னிக்கு வலிக்குதா? இல்லை, முந்தாநாள் தின்ன பாகற்காய் இன்னிக்குக் கசக்குதா? சும்மா பிணத்திலே ஊறுகிற புழு மாதிரி முந்தாநாள் நடந்ததிலேயே மனசை நெளிச்சுக்கிண்டிருந்தா எப்பிடி சுகம் வரும். நாளன்னிக்கி வரப்போகிற ஜிலேபியை நெனைச்சு நாக்கைச் சப்புக் கொட்டிக் கொண்டிருந்தால் இன்னிக்கு வயறு நெறைஞ்சுடுமா?

தொடை மாமிசத்தைக் கடித்து இழுப்பதற்காகச் சில வினாடிகள் பேச்சை நிறுத்தின அவன் மீண்டும் தொடர்ந்தான். “எதுக்குச் சொல்றேன்னா, இப்போ, இந்த நிமிஷம், இந்த க்ஷணம்தான் நெஜம். அதுதான் உண்மை. அதுதான் எனக்குத் தெரியும். அதால்தான் என்னை உறைக்க முடியும். அதைத்தான் என்னால் உணர முடியும். மீதியெல்லாம் செத்ததோ, இல்லை இன்னம் பிறக்காத வெறும் கனவோதானே. ஆனாலும் பாருங்க, விஷயம் சுளுவாயில்லை. ஆழ்ந்து பார்த்தா இந்த நிமிஷம், க்ஷணம்கூட கொஞ்சம் வலுவில்லாததுதான். நிமிஷமோ வினாடியோ நின்னாத்தானே, அதுதான் ஓடிக்கொண்டேயிருக்கே, இதுதான் இந்த வினாடின்னு நான் எதைச் சொல்லுறது? சொல்லுகிறப்பவே ஓடிப் போச்சே, வேறே வினாடி வந்துட்டுதே. இந்த வயத்தெரிச்சலுக்கு என்ன செய்கிறது. அப்போ நிஜம்னு ஒண்ணும் கிடையாதா? எல்லாம் பொய்யின்னா அதிலேயும் ஒரு சங்கடம் இருக்கு.”

பேச்சை நிறுத்தி, எலும்பைக் கடித்து, உள்ளே இருந்த மஜ்ஜையை சத்தத்தோடு உறிஞ்சிக்கொண்டே பேச்சை விட்ட இடத்திலிருந்து ஆரம்பித்தான்:

“எதுக்குச் சொல்றேன்னா, ‘நான்’ என்று சொல்லிக்கொள்கிற ஒண்ணாவது நிஜமா இருக்கணும். இல்லாதபோனா நானே, என் பேச்சும் எண்ணமும் உள்பட பொய்யாய்ப்போகிறேன். அதேமாதிரி இந்த வினாடி, இருக்கிறவரையில், நிஜமாக இருக்கணும், அது நிகழ்காலமாயிருக்கிறதனாலேயே. ஆனா, ‘நான்’ என்கிறதே கடந்த கால அனுபவமும் எதிர்காலக் கனவுகளும் பிண்டமான ஒண்ணுதானே. எல்லாம் பொய்யால் ஆன ‘நான்’ மட்டும் எப்படி நிஜமாயிருக்க முடியும்? இப்படியெல்லாம் சந்தேகத்திலே கடைக்காலெடுத்து, காலத்தையும் கனவையும் செங்கல்லாக்கி எழுப்பின கட்டிடம் நம்ம வாழ்க்கை. இதுலே நகாசு வேலை – நல்லது கெட்டது, புண்ணியம் பாவம், ஒன்னது என்னது, ஒசந்தது தாழ்ந்தது, நாகரிகம் அநாகரிகம், கவுரம் அகவுரம், வேண்டியது வேண்டாதது, பிடிச்சது பிடிக்காதது – எத்தனை போங்கள், இதெல்லாம் யாரை யார் ஏய்க்கிறதுக்குன்னு எனக்கே வெளங்கலை. எதுக்குச் சொல்றேன்னா, என்னைப் பொறுத்த மட்டிலே இதுலேயெல்லாம் அர்த்தமிருக்கிறதாகப் படவில்லை எனக்கு. நாம நல்லதென்னு நெனைச்சா நல்லது, இல்லையின்னா கெட்டது. நியூகினீக்காரன் நல்லதுன்னா தலையை வெட்டலையா, வெள்ளைக்காரன் நல்லதுன்னா வேண்டாதவங்களைச் சுட்டுப் பொசுக்கலையா, துரோணன்கூட ஏகலைவன் கட்டை விரலைக் கடிச்சுக்கலையா, எல்லாம் மனசுலேதான் இருக்குங்குறேன். எதுக்குச் சொல்றேன்னா, இதோ பாருங்க.. நீங்களும் நானும் இப்போ ரசிச்சுக்கிட்டு சாப்பிடுறோம், கறி எவ்வளவு ருசியாயும் மெதுவாயும் இருக்கு, இந்தக் கறி நடமாடிக்கிட்டிருந்ததைப் பற்றி யோசிக்கிறாமா. ரொம்பப் பேருக்கு யோசிக்கவே பிடிக்கிறதில்லை. ஏன் அப்பிடித் தெரியுமா? நடமாடறப்போ அங்கே இருந்த உண்மை வேறே. அது அப்போ சாப்பிடுற வஸ்துவில்லை. இப்போ அந்த உண்மை இறந்தகாலமாய்ப்போச்சு. இது வேறே உண்மை. சாப்பிடுற உண்மை. இதுதான் இப்போ உண்மை. இதைச் செத்துப்போன பழைய உண்மையோடே எப்படிச் சேர்த்துப்பாக்குறது? எதுக்குச் சொல்றேன்னா, நமக்கு புத்தி இருக்கு. விருப்பு வெறுப்பில்லாமல் கொஞ்சம் யோசனை பண்ணலாம். பண்ணனும். வார்த்தைகளைக் கண்டு மலைச்சுப்போகக் கூடாது. வார்த்தைகளோடே சண்டை போடக்கூடாது, வார்த்தைதான் வாயிலேயிருந்து வந்தா காத்தாப்போச்சே! இதைப் பாருங்க, இந்தக் கறி இன்னைக் காலலயிலேகூட ஓடியாடிக்கிட்டிருந்தது. அப்போ அதுக்குத் தெரியாது, இப்போ நம்ம வயித்துக்குள்ளே போகப்போகிறோம்னு. கொஞ்சிற்று. பாட்டுப் பாடிற்று. ஒரு க்ஷணம் அது இருந்தது. ஒரு வெட்டு. மறு க்ஷணம் அது இல்லை. நமக்குச் சாப்பாடு. இதுதான் உலகம். இது என்ன மிருகம்னு கேட்கிறீங்களா, இதைப் பாருங்கள்.”

அவன் தன் ஜோல்னாப் பையிலிருந்து ஒரு சிறு குழந்தையின் தலையொன்றை எடுத்து வெற்றிப் புன்னகையோடு காண்பித்தான். நான் எச்சில் கையோடு அங்கேயிருந்து ஓடிவிட்டேன்.

(END)

*

11 பின்னூட்டங்கள்

  1. ஜெயக்குமார் said,

    09/01/2010 இல் 11:01

    இதென்ன திகில் கதையா? .

  2. 11/01/2010 இல் 05:53

    திகில் கதைதான் – பல எழுத்தாளர்களுக்கு. நம்மால் மறக்கவே இயலாத ‘எஸ்தர்’ கதையை எழுதிய வண்ணநிலவனையே பிரமிக்க வைத்த எழுத்தாளர் சார்வாகன்.

  3. 02/10/2010 இல் 12:28

    அன்பின் ஆபிதீன் அண்ணனுக்கு,

    சார்வாகனின் கனவுக்கதை எஸ்.ரா. தொகுத்த நூறு சிறந்த சிறுகதைகளின் வரிசையில் ஒன்று. தாங்கள் தயவு செய்து அனுமதிபெற்று அந்தக் கதையையும் வலையேற்றலாமே… வாசிக்க ஆர்வமாக இருக்கிறேன். அல்லது சார்வாகனின் ’கனவுக்கதை’யை எனக்கு ஸ்கேன் செய்து அனுப்பி வைக்க இயலுமா?

    • 02/10/2010 இல் 15:27

      வாங்க சென்ஷி, நலமா? இப்படி திடீர்னு கேட்டா எப்படி? தேடிப்பார்த்து பதிவிடுகிறேன், அல்லது தங்களுக்கு ஸ்கேன் செய்து அனுப்புகிறேன். நன்றி.

  4. 03/10/2010 இல் 12:06

    அன்பின் ஆபிதின் அண்ணனிற்கு,

    தங்கள் மறுமொழி மகிழ்வூட்டியது. மிக்க நன்றிகள்.. எனது மின்மடல் முகவரி – senshe.indian@gmail.com

  5. 06/12/2010 இல் 09:36

    வெறும் திகில் கதை என்று மட்டும் ஒரு சிறிய சட்டகத்துக்குள் வைக்க முடியவில்லை. என்ன மாதிரியான தர்க்கங்கள்! அந்தத் தர்க்கங்களைப் பேசுவதற்கு ஒரு திகில் முடிவுடன், உரையாடல் (அதுவும் monologue) வடிவத்துடன் கதை. இவ்வளவு எளிமையான வடிவில், இவ்வளவு நல்ல கதையா? ரொம்ப யோசித்தால் கதை என்ற ஒன்றே இதில் இல்லை என்றும் தோன்றுகிறது. நல்ல வாசிப்பனுபவம். நன்றி பாஸ்.

    அனுஜன்யா

  6. 09/04/2013 இல் 17:06

    கதை அல்ல. இன்றைய கவிதைகளை எடுத்துகொண்டு பார்த்தால் பல கவிதைகளின் அடுக்கு. ஆபிதீன் மறுமொழி அபாரம் – திகில் கதைதான் – பல எழுத்தாளர்களுக்கு.

  7. 26/01/2014 இல் 17:10

    எனக்கும் கனவுக்கதை பிரதியொன்றை அனுப்பிவிடுங்கள் தோழர்.

  8. 21/10/2016 இல் 08:30

    வெற்றிப் புன்னகையோடு காண்பித்தான்

    சாத்தியப்படாத வரிகள்.


மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s

%d bloggers like this: